Orâ chre ganahuin sí naꞌhue gìsìkìꞌ nneè kú giꞌhiaj Ma̱ꞌan Jesús
2
Ni̱ gachîn do̱j nej gui ni̱ gatûj ñûn Ma̱ꞌan Jesús ruhuâ yumanꞌ Kapernaúm;
ni̱ gunïn nej guiì si nne ruhuâ ꞌngo̱ hueꞌe.
2 Ni̱ ganaraꞌhuiꞌ ûta gàꞌì nej guiì,
ni̱ nda gachra chre ruhuâ rahueꞌe mân ninj ni̱ huê danj na̱nj naꞌhue gùchìꞌ riñan rahueꞌe gimàn ninj;
ni̱ gidigân Ma̱ꞌan Jesús si-nùguànꞌ Ma̱ꞌan Ñaꞌanj an riñan ninj.
3 Ni̱ ata gaꞌânj ranꞌ nej síi ꞌngo̱ sí naꞌhue gìsìkìꞌ nneè kú,
ni̱ gaꞌnaꞌ nej sôꞌ riñan Ma̱ꞌan Jesús.
4 Sani̱ ñan nitaj dàj huaj gùchìꞌ nej sôꞌ ñan nne Ma̱ꞌan Jesús,
dadinꞌ màn ûta gàꞌì nej guiì hiuj dânj,
huê danj ni̱ gaꞌnêj nej sôꞌ sa tàj yichrá hueꞌ ñan nne Ma̱ꞌan Jesús,
ni̱ gutâꞌ nej sôꞌ ꞌngo̱ hiuꞌuj u yichrá hueꞌ dânj,
ni̱ hiuj dânj guduninj nej sôꞌ nna tàj sí aꞌnanꞌ dânj.
5 Ni̱ nga giniꞌin Ma̱ꞌan Jesús si guyumân yìtï̀nj ruhuâ nej sôꞌ,
ni̱ gata gu̱nïn sí naꞌhue gìsìkìꞌ nneè kú:
—Da̱ꞌninj gàꞌ ginikâ nimân nìko rayiꞌî nej si-ga̱kï̂nt na̱nj ánj.
6 Ni̱ nne da̱ꞌa̱j nej sí chru̱n ley hiuj dânj,
ni̱ nadigiꞌñûn nej sôꞌ ngà ruhuâ nimân nej sôꞌ.
7 “Nùnj huin saj ni̱ gataj sí nânj dànanj ràꞌaj.
Gaꞌmin kï̱j sôꞌ riñan Ma̱ꞌan Ñaꞌanj an.
Ni̱ ahuin sí ga̱ꞌhue gi̱nikaj nimân nìko rayiꞌî nej gakï̱nꞌïn ràꞌaj,
man ꞌngo̱ rïn Ma̱ꞌan Ñaꞌanj an huin sa ga̱ꞌhue gi̱nikaj nimân nìko rayiꞌî nej gakï̱nꞌïn na̱nj ánj.”
8 Orâ ni̱ garânj daꞌngaꞌ ruhuâ Ma̱ꞌan Jesús ngà nanè nimanj,
dàj nadigiꞌñûn nej sí nânj ngà nda ruhuâ nimân nej sôꞌ niꞌin nej sôꞌ Ma̱ꞌan ni̱ gata:
—Nùnj huin saj ni̱ ganï̂n ruhuâ nej suj dànanj ngà ruhuâ nimân nej suj ràꞌaj.
9 Ahuin goꞌngo̱ nguèj sun nânj hua chìꞌ doj gi̱ꞌhiâ ràꞌaj,
guendâ gàtà gu̱nïn sí naꞌhue gìsìkìꞌ nneè kú:
“Gàꞌ ginika nimân nìko rayiꞌî nej si-ga̱kï̂nt” nej si gàtà:
“Ga̱na̱chi sòꞌ,
ni̱ ga̱na̱ka̱j na tàj dan ni̱ ga̱che̱ râj.”
10 Dùgùnàj huaj gi̱ni̱ꞌin nej suj si nìkà suun riñan hioꞌóo guendâ ga̱ꞌhue gi̱nika nimân nìko rayiꞌî nej gakï̱nꞌïn.
Ni̱ gataj Ma̱ꞌan Jesús gu̱nïn sí naꞌhue gìsìkìꞌ nneè kú dânj:
11 —Riñan sòꞌ gàtà:
Ga̱na̱chi sòꞌ,
ni̱ ga̱na̱ka̱jꞌ na tàj dânj,
ni̱ na̱nꞌ dukuât ráj.
12 Hiôꞌ ni̱ ganachi sí dânj orâ chre,
ni̱ ganakaj sôꞌ na tàj sôꞌ,
ni̱ gahui sôꞌ ni̱ gaꞌanj sôꞌ ni̱ giniꞌin daranꞌ nej guiì màn hiuj dânj,
hiôꞌ ni̱ ûta gahuin ña̱ꞌanj ruhuâ ninj ni̱ gaꞌmin hueꞌê ninj rayiꞌî Ma̱ꞌan Ñaꞌanj an,
ni̱ gataj ninj:
—Nitaj gàꞌ si ꞌngo̱ ñùn giniꞌin nêꞌ sí gi̱ꞌhiaj dànanj gàꞌ mánj.
Gakḯn Ma̱ꞌan Jesús Leví
13 Neꞌ rùkù ni̱ gahui ñûn Ma̱ꞌan Jesús gaꞌan ñan nu̱n nne ña̱ꞌa̱nj;
ni̱ gaꞌnaꞌ daranꞌ nej guiì riñan Ma̱ꞌan ni̱ gidiganj si-nùguànꞌ Ma̱ꞌan Ñaꞌanj an riñan nej guiì màn hiuj dânj.
14 Ni̱ gachîn Ma̱ꞌan Jesús hua hiuj dânj,
ni̱ giniꞌin Leví huin daꞌní Alfeo,
ni̱ nne sôꞌ riñan ꞌngo̱ chrun yîla guendâ gaꞌnêj sôꞌ sanꞌanj an riñan nej guiì yùmànꞌan,
ni̱ gata gu̱nïn sôꞌ:
—Gi̱nikòꞌ sòꞌ rukú.
Ni̱ ganayumàn sôꞌ ni̱ gaꞌanj sôꞌ ngà Ma̱ꞌan Jesús.
15 Ni̱ nga nne Ma̱ꞌan Jesús rukû Mesa ruhuâ dukuâ Leví,
ni̱ nne ûta gàꞌì nej sí gaꞌne̱j sanꞌanj an guendâ sí ni̱ka̱j su̱n riñan Roma ngà nej sí giꞌhiaj gakï̱nꞌïn ni̱ huê danj na̱nj nne nej sí ꞌna̱ꞌ ga̱huin chru̱n riñanj;
ni̱ màn ûta gàꞌì nej guiì ginikòꞌ Ma̱ꞌan Jesús gaꞌnaꞌ ninj.
16 Ni̱ giniꞌin nej maestrû chru̱n ley ngà nej sí fariseo,
si nne Ma̱ꞌan Jesús yaj ngà nej sí gaꞌnêj sanꞌanj an ni̱ ngà nej sí gakï̱nꞌïn,
ni̱ gataj nej sôꞌ gu̱nïn nej sí ꞌna̱ꞌ ga̱huin chru̱un:
—Nùnj huin saj ni̱ giꞌhiaj Ma̱ꞌan si-Maestrû nej suj dànanj,
ni̱ nne sôꞌ yâ sôꞌ ni̱ goꞌo sôꞌ ngà nej sí gaꞌnêj sanꞌanj an ni̱ ngà nej sí gakï̱nꞌïn ràꞌaj.
17 Ni̱ nga gunïn Ma̱ꞌan Jesús nej nuguanꞌ nânj ni̱ gata:
—Nej sí hua̱ sàꞌa ni̱ nitaj si nanaꞌhuiꞌ nej sôꞌ sí gònòꞌòo mánj,
sani̱ nej sí aꞌnanꞌan ni̱ nanaꞌhuiꞌ nej sôꞌ sí gònòꞌòo.
Ñùnj ni̱ nun gàꞌnàj guendâ gàkï̀n nej sí ganï̂n ruhuâ si huin nej sôꞌ sí ni̱ka̱a mánj gaꞌná guendâ nej sí giꞌhiaj gakï̱nꞌïn na̱nj ánj.
Gachín naꞌanj nej sij rayiꞌî guendâ ga̱ gi̱ni̱ne̱j nej sij
18 Ni̱ ga gi̱ni̱ne̱j nej sí gaꞌnaꞌ ga̱huin chru̱n riñan Juan ngà nej sí gaꞌnaꞌ ga̱huin chru̱n riñan nej sí fariseo;
ni̱ gaꞌnaꞌ nej sôꞌ ni̱ gataj nej sôꞌ gu̱nïn Ma̱ꞌan Jesús:
—Nùnj huin saj ni̱ nej sí ꞌna̱ꞌ ga̱huin chru̱n riñan Juan ngà nej sí ꞌna̱ꞌ ga̱huin chru̱n riñan nej sí fariseo ni̱ ga gi̱ni̱ne̱j nej sôꞌ ràꞌaj;
nùnj huin saj ni̱ nej sí ꞌna̱ꞌ ga̱huin chru̱n riñan Ma̱ꞌân rèꞌ ni̱ nitaj si ga gi̱ni̱ne̱j nej sôꞌ ràꞌaj.
19 Ni̱ gataj Ma̱ꞌan Jesús:
—Ga̱ꞌhue ga̱ gi̱ni̱ne̱j nej sí huaj guruguñuꞌunj ñan hua̱ giꞌñanj ñan garan ra̱ꞌa ꞌngo̱ síi,
nga nï̀nꞌ nne sí ga̱ra̱n ra̱ꞌa dânj na̱nj nîꞌ.
Si̱ gaꞌhue ga̱ gi̱ni̱ne̱j nej sôꞌ mánj.
20 Sani̱ gùyùmàn gui nga ga̱ꞌna̱ꞌ ga̱ꞌne̱ nej sij,
sí huin nika siyànà nânj hiôꞌ ni̱ hua̱ da̱ꞌa̱j nej gui ni̱ ga̱ gi̱ni̱ne̱j nej sij na̱nj ánj.
21 ’Nitaj gàꞌ si ꞌngo̱ síi ganaꞌnḯn ꞌngo̱ dasû atsîj nàkàa riñan atsìj i reꞌè gàꞌ giyiꞌneꞌ mánj,
dadinꞌ huê gè atsìj i nàkà dânj gi̱ꞌhiaj gìyìꞌnèꞌ atsìj i reꞌè dânj,
hiôꞌ ni̱ dànanj ga̱huin nìko ñan guyutù dânj gàꞌ na̱nj ánj.
22 Gàꞌ si ꞌngo̱ síi nitaj si gachra nne bino nàkàa ruhuâ nnïnj reꞌèe;
dadinꞌ nne bino nàkà dânj gi̱ꞌhiaj gùyùtù nnïnj reꞌè dânj;
ni̱ ga̱ña̱nj nï̀nꞌ nne bino ni̱ gi̱rë̱ꞌ nnïnj dânj;
Sani̱ nne bino nàkàa ni̱ ruhuâ nnïnj nàkàa daꞌhuîꞌ ga̱chrôꞌ.
Ganaranꞌ nej sí ꞌnaꞌ ga̱huin chru̱n riñan Ma̱ꞌan Jesús kaa ya nej sôꞌ gui ganarânj rûhua
23 Gahuin ꞌngo̱ gui dânj nga gachîn Ma̱ꞌan Jesús ñan gunun nej sij ni̱ gahuin gui ganarânj ruhuâ,
hiôꞌ ni̱ nga aché nej sí ꞌna̱ꞌ ga̱huin chru̱un riñan Ma̱ꞌan huaj nej sôꞌ;
ni̱ gayiꞌì nej sôꞌ ni̱ girihiâj nej sôꞌ kaa.
24 Hiôꞌ ni̱ gataj nej sí fariseo:
—Gi̱ni̱ꞌhiaj sòꞌ dadinꞌ nùnj huin saj ni̱ giꞌhiaj nej sôꞌ dànanj ni̱ gui ganarânj ruhuâ huin gui nânj ni̱ nun gìyìꞌnï̀nꞌ suun si gi̱ꞌhiaj nej sôꞌ dànanj ràꞌaj.
25 Sani̱ gataj Ma̱ꞌan Jesús:
—Nun ga̱hia̱ nej suj dàj giꞌhiaj David nga hua sa gàchin riñan sij,
ni̱ nga ganachinj yiꞌnaa riki sij ni̱ huê danj na̱nj ganachinj yiꞌnaa riki nej sí ni̱ka̱j duguiꞌ ngà sij mínj.
26 Dàj giꞌhiaj sij nga gatûj sij ruhuâ dukuâ Ma̱ꞌan Ñaꞌanj an,
nga gahuin Abiatar rej huin ña̱n nï̀nꞌïn,
ni̱ yâ sij rachrún gè tàj riñan Ma̱ꞌan Ñaꞌanj an ni̱ nun gìyìꞌnï̀nꞌ suun si ya̱ nej sí nàsìnùnj un rachrún dânj,
dadinꞌ man ꞌngo̱ rïn nej rej huin sa ga̱ꞌhue ya̱ nej rachrún dânj,
sani̱ gaꞌhuiꞌ David yâ nej sí ni̱ka̱j duguiꞌ ngà sôꞌ rachrún dânj.
27 Ni̱ gataj Ma̱ꞌan Jesús: