Luka 9

[Isa Alimasiiwu faarun tanmi do fillon xayiye]

(Mace 10.1, 9-11 ; Maarika 6.6b-13)

Isa Alimasiiwu da i faarun tanmi do fillon kafu me yi, na senben do kandan kini i ya i na jinnanun xata bakka seron ŋa, do i na watunton sahandi. 2 Ken falle a da i xayi telle i na gangu do seron ŋa, do i na watunton sahandi. 3 Isa ti i da : « Axa ga na ɲi telle, axa do fo wo fo nan maxa daga do du yi : guma wo, fudi wo, yigande wo, xaalisi wo, axa do ku fo wo fo nan maxa daga. Axa do hari doroko filli nan maxa daga. 4 Axa ga na ro ka be yi, xa maxa giri ken ka yi nan daga yanqa ka tana yi, o do axa gaa gilli ken debe yi. 5 Debe wo debe seron ga na bara axa bisimillana, axa na axa taaranɲiiɲon konko nan giri ken debe yi, ken na ɲa i da seeda yi. » 6 Xaranlenmo ku janbandi. I daga debun su yi na gangu, do na watunton sahandi banŋe wo banŋe.

[Heroodi lasamaye Isa fin ŋa]

(Mace 14.1-2 ; Maarika 6.14-16)

7 Fo wo fo ga ɲaŋi, tunka da a su mugu. A lasame baawo sero yogonu wa tini : « Annabi Yahaya ya n wundi bakka furun naxan ŋa. » 8 Yogonu xa wa tini : «  ya n yille riini xadi. » Yogonu xa ti : «  fano ku yogo ya faayi ke yi a ga yille bangeene. » 9 Heroodi ti : « Nke ken xa da Yahaya yinmen kutu ya de ! Xa, n gaa yugo ke be xibaaren mukku, ko baane ni ? » A da a xanu na Isa wari.

[Yiganden gabondiye jaman da]

(Mace 14.13-21 ; Maarika 6.32-44)

10 Ayiwa, Isa ga yille riini, i ga da fo wo fo ɲa, i da a ko a da. A do i duran daga kaara yi katta debe yogo yi, ken debe toxon ga ni . 11 Xa seron ga da ken tu tan, i daga do a batten ŋa. Isa da i bisimilla siri, a sefe i da Allantunkaaxun fin kanma, na watunton xa sahandi. 12 Kiyen ga tinko xenne, faaru ku tanmi do fillon tinko Isa yi nan ti a da : « An nta jaman walla i nan daga debun do dabbaayun ŋa, ma i wa yigande do saxura kitta non ŋa, baawo o na gunjuran ya yi yere. » 13 Xa Isa ti i da : « Axakun yinmenu na yigande kini i ya ke ! » I ti a da : « Buuruyinmu karagi do ɲexenlenmu filli baane ya na o maxa. Ma an na a mulla o nan daga yiganden ya xobo ke jama su da ? » 14 I da ken ko ya, baawo jama ke wa wujunu karagi yugo bakka. Isa ti i xaranlenmo ku da : « Xa da seron taaxundi sapa sapanun ŋa, sapa su nan ɲa tankarage sere yi. » 15 Xaranlenmon da a ɲa ken moxo yi : i da seron su taaxundi. 16 Ken falle, Isa da buuruyinmu ku karagi do ɲexenlenmu ku filli wutu ; a da i dellen wutu kanmun ŋa na Alla tiiga yigandu ku kanma yi. A da i kutu-kutu na i kini xaranlenmon ŋa ti i na i taxandi jaman ŋa. 17 I su yige nan fogu. Buurun do ɲexe be kutten ga toxo, ken da kando tanmi do fillo faga.

[Isa ni manne yi ?]

(Mace 16.13-21 ; Maarika 8.27-31)

18 Koota yogo Isa baane gaa allanbatini, a xaranlenmon wa a kaaran ŋa. A da i tirindi ti : « Seron maxa, nke ni manne de ? » 19 I ti : « Yogonu maxa, ya ni an ŋa ; yogonu maxa, annabi Hiliyaasu ya ni an ŋa ; yogonu xa maxa, annabinyinme tana ya n yille bangeene. » 20 Isa ti i da : « Axakun yinme maxa, nke ni manne de ? » Piyeeri ti : « Alla xayinte ke ya ni an ŋa. » 21 Isa da i gongo na a xotondi i maxa, ti i n maxa ke ko sere su da.

22 A yille tini : « Waajibin ya ni, nke be ga ni ŋa, n yonkin nan toore siri, xirisun do do na bara in ŋa, na in kari, n kallen bita sikka, n na wundi. »

[Isa sukkanlenmaaxu]

(Mace 16.24-28 ; Maarika 8.34-9.1)

23 Ken falle, a ti sere ke su da : « Sere be gaa a mulla nan sukke do in ŋa, an nan kaari an yinme yi, na an wutu do du yi koota su, an na sukke do in ŋa. 24 Baawo sere wo sere gaa a mulla na i yonkin ya kisi, a wa bonno a yi. Xa sere wo sere yonkin ga na bono do inke ya batten ŋa, ken kaman yonkin wa kisini. 25 Sere be ga na duna muuman su kita nan bone yonkin ŋa, ma nan halaki, ken na manne sirono a kaman ŋa ? 26 Sere wo sere ga na yaagu ti inke ya yi, ma an ga na yaagu ti in sefon ŋa, nke be ga ni Seren Renmen ŋa, koota be in do in nooron do in Faaba nooron do maliika sennun nooron ga na yille riini, n xa wa yaagunu ti a kaman ŋa. 27 N wa a koono axa da tonŋun ŋa ti, ke jama be gaa yere, axa su nta kalla ma yogonu kun ga da Allantunkaaxun wari. »

[Isa nooroye]

(Mace 17.1-9 ; Maarika 9.2-10)

28 Koye me Isa ku digaamu konŋen falle, a sege gide yogo kanma, nan daga Alla batu non ŋa. A do Piyeeri do Yohanna do ya n daga doome. 29 Na a toxo allanbatiyen noxon ŋa, a giyan yille ; a yiraamun xa xura ma i nan ŋaali. 30 Ma a faayi ke ! Sero filli xosi ri katta Isa yi, i do a gaa sefene. Sero ku filli ni annabi Muusa do annabi Hiliyaasu ya yi, 31 i gaa Alla nooron noxon ŋa. Isa ga n xawa dagana Alla sagon tinmandi nan faati non ŋa moxo be, i do a ɲi sefene ken ya kanma. 32 Ken da Piyeeri do i kapanlenmon ɲi xenqo jupe noxon ŋa. Xa i ga wulli, i da sero ku filli do Isa wari i gaa nooro ke noxon ŋa. 33 Sero ku filli gaa gilli Isa yi bire be, Piyeeri ti a da : « Xaranmoxo, o gaa yere a siro de ! O na gupu sikki sigindi : anke baane, annabi Muusa baane, annabi Hiliyaasu baane. » Xa Piyeeri ntaxa a tu i gaa ke be koono. 34 Na a toxo sefen noxon ŋa, xaba yogo ri xufi i kanma ; xaranlenmo ku ga ro xaban noxon ŋa, i kanu. 35 Sefexanne yogo xosi bogu xaba ke noxon ŋa nan ti : « Ke ya ni in Renme ke be in ga da a sugandi, xa da a terinka ! » 36 Sefexanne ke ga dangi tannu, Isa baane ya n toxo sikki beran ŋa. Xaranlenmo ku kuuru ; i ga da fo be wari a waxatin ŋa, i ma a laxami sere su da.

[Murunte yogo sahandiye jinnan gaa a yi]

(Mace 17.14-21 ; Maarika 9.14-29)

37 A bita fillandin ŋa, Isa do xaranlenmo ku sikki yanqa bakka giden kanma, jama xoore ri Isa gemundi. 38 Yugo yogo xosi luuke jama ke noxon ŋa nan ti : « Xaranmoxo, n renmen faayi in da jawoye, a baane ya na in maxa ! 39 Jinna yogo ya na a yi ; a ga na ri a yi, a luukene ya, a na a kaawandi, ma baabon ga bogu a raqen ŋa. A nta a walla a ga ma a tooro moxoburun ŋa ya ga fe. 40 N da an xaranlenmon ɲaaga, ti i na jinna ke xata bakka a yi, xa i ma katu. » 41 Isa da sefen wutu, a ti : « Ku finbonondaano ku, danqanaaxuntanbalinu ku ! N toqo do axa batten ŋa ma kan bire ? Axa toqo banbini in ŋa ma kan bire ? An renme ke riiti yere ! » 42 Lemine ke daga katta Isa yi. A ga tinko a yi tannu, jinnan da a sedi ɲiiɲen ŋa na a kaawandi. Xa Isa ga xiribe jinna ke yi tannu, a bogu leminen ŋa. Lemine ke saha, Isa da a kini faaben ŋa. 43 Seron su kaawa Alla darontaaxun ŋa.

[Isa sefe i faatiyen kanma xadi]

(Mace 17.22-23 ; Maarika 9.30-32)

Be su toxo kaawana Isa gollun ŋa, a ti i xaranlenmon da : 44 « Xa da in ku sefo terinka siri : nke be ga ni Seren Renmen ŋa, i wa in janbantanloono kittu yi. » 45 Xa i ma a sefe ke faamu. Alla da a wure muxundi i ya, ken ya saabu da ni, i ga ma a faamu, i xa ma saako na Isa tirindi sefe ke wure yi.

[A su seri dare]

(Mace 18.1-5 ; Maarika 9.33-37)

46 Xaranlenmon wa me kutana ti : « Ko ni o su seri daren ŋa ? » 47 Isa da a tu i sinmeyen ga ni ke be yi. A xosi lemine yogo raga na a sigindi du kaaran ŋa 48 nan ti i da : « Sere be ga na ke lemine me bisimilla ti inke ya toxon ŋa, a kaman da inke yinme ya bisimilla. Sere be ga na inke bisimilla, a kaman da ke be ga da in xayi ya bisimilla. Ken kuŋa sere be ga ni axa su fo maxayanqanten ŋa, ken kaman ya n dara axa su yi. »

[O kapanlenmo]

(Maarika 9.38-41)

49 Ken noxon ŋa Yohanna xa ti Isa da : « Xaranmoxo, o da yugo yogo wari, a gaa jinnaxatene ti an toxon ŋa. O da a kaba, baawo o sukkanlenma fe. » 50 Isa ti a da : « Xa maxa a kaba a yi, baawo sere be barante ga nta axa yi, a kaman ni axa yogo ya yi. »

[Isa golle Yerusalaamu killen ŋa]

(9.51-19.27)

[Somooro debe]

51 Isa segewaxatin ga tinko, a da Yerusalaamu dagayen kanda na a xotondi siri. 52 A da seron xayi dagana du kaane. Sero ku daga Somooronkon debe yogo yi na yanqara feera kutu a da. 53 Xa Somooronkon ma duŋe a bisimillana baawo a dangini nan daga Yerusalaamu ya yi. 54 A xaranlenmo Yaaxuba do Yohanna ga da ken mugu, i ti : « Xaranmoxo, an wa a mulla o na yinben yanqandi gilli kanmun ŋa na i halaki ba ? » 55 Isa taŋe i ya nan doxo i ya. 56 I giri non ŋa ken falle nan daga debe tana yi.

[Isa sukkanlenmaaxun tono]

(Mace 8.18-22)

57 I gaa do killen ŋa telle, yogo ti Isa da : « An ga na daga noqu su yi, n wa do an batten ŋa. » 58 Isa ti a da : « Kunmen wa ɲunxumun maxa ; sonkan wa yeliŋun xa maxa, ganta inke be ga ni Seren Renmen ŋa, hari tuumara nta in maxa. » 59 Isa ti yogo tana xa da : « Sukke do in ŋa. » Xa ken ti a da : « Xaranmoxo, yanpa in maxa, saado in faaba gaa kalla in gaa a bulunu. » 60 Isa ti a da : « Furun wara i na me bulu, xa anken nan daga Allantunkaaxun fin gangu ! » 61 Yogo tana xa ti a da : « N wa sukkene do an ŋa Xaranmoxo, xa in terinka, n nan daga sare in kaadunkon ŋa fina. » 62 Isa ti a da : « Sarinsoxaana be gaa i falle faayini, ken kaman ra nta ɲaana Allantunkaaxun noxon ŋa, baawo a ma gollen raga i sooben ŋa. »