[Fatanwattiburigumen sahande]
8
Isa Alimasiiwu ga yanqa bakka giden kanma,
jama xoore sukke do a batten ŋa.
2 A gaa ken jama xoore kaane,
fatanwattiburigume yogo xosi tinko a yi,
nan daga tusi a kaane nan ti a da :
« Kamanyugo,
an ga na duŋe,
an ra wa in senondini. »
3 Isa da i sooxen fuutu nan kati a yi nan ti :
« N duŋe.
Seno !
» Ken batte su,
a seno.
4 Isa jaabi nan ti a da :
« Maxa fo wo fo ko sere da,
xa daga du koyi sadaxakiɲandaanan ŋa,
annabi Muusa Sariyan ga da sadaxa be ko,
an na ken bagandi kuudo a na xura seron su da nan ti an seno. »*
[Sorodaasin golliɲaŋaanan sahande]
5 Ken falle,
Isa taŋe Kafarinoomu yi.
A ga ro deben ŋa,
Roomunka kuranlenxirise yogo tinko a yi nan ti a na i deema.
6 Kuranlenma ke ti a da :
« Kamanyugo,
n leminen faayi saqa kan ŋa,
a ra nta hari gilli ;
a tanpinten ni moxoburu. »
7 Isa jaabi nan ti a da :
« N wa telle a sahandi. »
8 Xa,
kuranlenxirise ke ti a da :
« Kamanyugo,
anken me seri dare ma xawa roono inke kan ŋa de,
ganta,
fo ko tan in golliɲaŋaanan nan saha.
9 Baawo xirisu yogonu ya na inke yinme kandana ;
kuranlenmo yogonu wa in xa kandan noxon ŋa.
N ga na ti i du baane be da :
“ Wuyi sikki !
” a wa wuyini sikki ;
n ga na ti baane be da :
“ Kira sikki !
” a wa kirana sikki ;
n ga na ti in komo yugon da “ Ke dabari !
” a wa a dabarini. »
10 Isa ga da a mugu ku sefo koono,
a kaawa a yi.
Ku beenu gaa do a batten ŋa,
a ti i da :
« Tonŋu,
n wa a koono axa da ti,
hari Banisirayila,
n ma ke danqanaaxun me wari non ŋa.
11 N na a ko axa da ti :
kootan wa riini,
jamon gaa gilli ti kinbakkan do kinxennan ŋa nan ri,
i do annabi Ibirahiima do annabi Isiyaaxa do annabi Yaaxuba gaa yigene Allantunkaaxun noxon ŋa.
12 Xa,
ku beenu ga ɲi xawa na Allantunkaaxun xayen wutu,
i wa i sedde Jahannaba bitanbinnen noxon ŋa,
i na wu ken koota,
ma i ga giige. »
13 Ken falle Isa jaabi nan ti sorodaasinxirise ke da :
« Daga an kan ŋa !
An danqanaaxun saabu da,
an muurifon nan ɲa.
» Ken batte su,
a golliɲaŋaanan saha.
[Watunton sahande]
14 Ken falle Isa daga Piyeeri kan ŋa.
A ga kiɲe no,
a da a yaqen ma ɲi saqa,
fatankumun gaa a yi.
15 A ga kati a kitten ŋa baane,
fatankumun da a wara ken batte su yi,
a giri nan sigi a danŋa.
16 Futuron bire,
i do seri gabe ri katta Isa yi,
jinnan gaa i ya.
A da jinnan su xata ti i sefexannen ya yi,
na watunton su sahandi.
17 Ke su ni ya,
annabi Yesayaahu ga da sefe be ko na tinme,
a ga ti Alla ti :
« Aken da o tooran wutu,
nan saage na o wattun xa tiŋa. »*
[Isa sukkeye]
18 Isa ga da a wari jaman ga gabo do i kaaron ŋa,
a ti i xaranlenmon da :
« Xa ri o n kare. »
19 Sariyanxaranmoxo yogo xosi tinko a yi nan ti a da :
« Xaranmoxo,
an ga na daga noqu su yi,
n wa do an batten ŋa. »
20 Isa ti a da :
« Kunmen wa ɲunxumun maxa ;
sonkan wa yeliŋun xa maxa,
ganta inke be ga ni Seren Renmen ŋa,
hari tuumara nta in maxa. »
21 Xaranlenma tana xa ti a da :
« Xaranmoxo,
yanpa in maxa,
saado in faaba gaa kalla in gaa a bulunu. »
22 Xa Isa jaabi nan ti a da :
« Sukke do in ŋa !
Furun wara i na me bulu. »
[Fanken siginde]
23 Ken falle Isa ro fuuren ŋa ;
a xaranlenmon ro do a batte.
24 Ken sigira su,
dundu xoore xosi giri jin kanma.
Fonne ya n toxo banbuusen na fuuren toni.
Ken da a ɲi,
Isa wa xenqene.
25 Xaranlenmon tinko a yi na a wundu ti :
« He,
xaranmoxo,
an ga ma o kisi,
o faayi kalla de ! »
26 Isa jaabi nan ti i da :
« Axa kanna manne yi de ?
Axa danqanaaxun roxen ni koyi !
» A giri nan xiribe jin do fanken ŋa.
Ken sigira su,
i deeje pewu.
27 Xaranlenmon kaawa ken ŋa,
i ti :
« Ke yugo ni manne seran danbe yi ?
Hari fanken do jin xa gaa a ɲaamariyen batta ! »*
[Jinnagumun filli sahandiye]
28 Isa ga kiɲe jin ke kaara baane yi Gerasankon¤ jamaanen ŋa,
yugu filli bogu furungoorun sutten ŋa,
jinnan gaa i ya,
nan ri gemu a yi.
I burun ya ni ;
sere ra ma ɲi hari bakka ti ken kille yi.
29 Gelli i ga da Isa wari tan,
i xenu xaaruyen ŋa,
i gaa tini :
« An manne ni o maxa,
Allanlenme ?
An ri o yanganxata Alla waxati rakutunten kaane yi ya ba ? »
30 Ken da a ɲi kaadunfaringijin jama xoore yogo xa wa yigene laatoyen ŋa.
31 Jinnanu ku da Isa xanjo nan ti :
« An ga na o xata,
o ro ken faringijun jama ya yi de ! »
32 A ti i da :
« Xa daga !
» Jinnanu ku bogu sero ku filli yi nan daga ro faringijun ŋa.
Ken ga ɲa tan,
faringijun wurunton giri kanmun ŋa,
nan ri kati jin ŋa nan yoole.
33 Faringijinagaanaanon wurunton daga kaanun ŋa ;
fo wo fo ga ɲa,
i da a su laxami,
kafiini sero ku filli xa moxon ŋa.
34 Debidunkon su bogu ke ya yi nan gemu Isa yi.
I ga da a wari,
i da a muuru a maxa nan ti a n dangi i jamaanen ŋa.