Luka 5

[Isa Alimasiiwu xaranlen fano]

(Mace 4.18-22 ; Maarika 1.16-20)

Ayiwa koota yogo yi, Isa Alimasiiwu daga sigi Kinereeti xaaran xannen ŋa. Jama yogo da me ɲi a kaaron ŋa i wa me yontono katta a yi kuudo na Alla digaamen terinka. 2 A da tangifuuru filli wari sikki jinxannen ŋa, tangaanon ga bogu i noxon ŋa, i gaa ɲagamen bakka i jalon ŋa. 3 Isa ro fuura baane noxon ŋa, Simoona ya fuure ni. A ti Simoona na fuuren girindi bakka jinxannen ŋa fonne na a deni jin kanma. Isa taaxu fuure ke noxon ŋa na a ɲa jaman xaranŋunden ŋa.

4 A ga duguta sefen ŋa bire be, a ti Simoona da : « Fuuren deni noqu jupe yogo yi, an do an kapanlenmon na axa jalon sedi non ŋa nan tangi. » 5 Simoona ti a da : « Xaranmoxo, o da wuron muuman su ɲa tangiyen ya yi, o ma fo wo fo kita, xa keeta, an ga ti in na jalon sedi jin ŋa, n wa i sedde. » 6 Ken ya ni, i da jalon sedi jin ŋa na ɲexen gaben raga ma jalon ga ɲaana xoyi i wa booxene ɲexen gaboyen saabu da. 7 I xosi i kapanlen baanu ku gangu, i gaa fuura fillandi ke yi, ti i nan ri i deema. I ri na fuuru ku filli su faga ɲexen ŋa, ma i gaa ɲaana xoyi i wa yoolene. 8 Ayiwa Simoona Piyeeri ga da ken wari, a tusi Isa jon ŋa nan ti a da : « N Kamanyugo, laato bakka in ŋa, baawo inke ni sere ya yi in gaa junuubungollun ɲaana ! » 9 Simoona do i kapanlenmo ku su kaawa ɲexe ke gaboyen ŋa. 10 Sebede ren yugun filli, do Yohanna, kun xa ga ni Simoona kapanlenmon ŋa, i xa kaawafi. Xa Isa ti Simoona da : « Maxa kanu ! An saagene seron ya tangini keeta xoyi an ga da ɲexon tangi moxo ke be. » 11 I da i fuurun deni jinxannen ŋa, na fo wo fo su wara nan sukke do a yi.

[Fatanwattun jaareye]

(Mace 8.1-14 ; Maarika 1.40-45)

12 Koota yogo yi, na Isa toxo Galiile maran debe yogo yi, a do yugo yogo gemu, fatanwatti buren gaa a yi ; watte ke da a faten noqun su kita. A ga da Isa wari, a xurufu na i taŋen ro ɲiiɲen ŋa na a muuru a maxa nan ti a da : « Kamanyugo, an ga na duŋe, an ra wa in senondini. » 13 Isa da i sooxen fuutu nan kati a yi nan ti : « N duŋe. Seno ! » Ken sigira yi, a watten saha. 14 A da yugo ke gongo nan ti a nan maxa a laxami sere su da, xa a da a ɲaamari ti : « Daga na an wari an gaa moxo be. Annabi ga da sadaxa be ko senoyen fin kanma, an na ken bagandi kuudo a na xura seron su da nan ti an seno. »

15 Ken moxo, Isa fiinun wa tallan sanqini. Jaman gaben wa me ɲiini a banŋen ŋa na a digaamun terinka, a na i wattun xa sahandi. 16 Xa Isa ga na ɲi Alla batta, a bakka jama ke noxon ŋa ya nan daga noqu xiidinten yi.

[Muruxunten sahandiye]

(Mace 9.1-8 ; Maarika 2.1-12)

17 Isa ga ɲi xaranŋundindini koota yogo yi, do sariyanxaranmoxonun wa taaxunu i gaa terinkene. I giri maran do maran debun su ya yi, a do . Tunka Duumanten senben ɲi do Isa batten ŋa, ken ya ga ɲa sababu yi a gaa watunton sahandini.

18 Ayiwa seron ri katta Isa yi, muruxunte yogo gaa saqa i maxa sanbaxan ŋa, i da a xanu na muruxunte ke rondi na a saxundi Isa jon ŋa xuben ŋa. 19 Xa jaman gaboyen saabu da, i lasame i gaa a rondini xube ke noxon ŋa moxo be. Ken ya ni, i do a sege xube ke kanma na boten bagandi xube ke kanma na a do sanbaxan yanqandi ti ken bote yi na a saxundi seron su naxa, Isa jon ŋa. 20 Isa ga da sero ku danqanaaxun wari, a ti muruxunte ke da : « Yugo, an junuubunun xafari. » 21  do Farisigankon ti i noxoodu : « Ko ni ke yugo yi, a gaa du ragana Alla yi ? Ko xa n katta junuubu xafarini Alla baane ya ga fe ? » 22 Xa, Isa da i sinmeyen tu, a ti i da : « Manne saabu da ku sinmayin danbu gaa axa sondomun ŋa ? 23 Nan ti muruxunten da : “ An junuubunun xafari ”, ma nan ti a da : “ Giri, an nan tere ”, kan nan newu ? 24 Ayiwa ken kuŋa, axa wa a tuunu ti inke be ga ni ŋa, ɲaamariyen wa in maxa ɲiiɲen kanma na junuubunun xafari. » A ti muruxunte ke da : « Giri, an na an sanbaxan wutu, an nan daga an kan ŋa ! » 25 Ken sigira su yi yugo ke giri seron su yaaxon ŋa, a ga ɲi saqa sanbaxa ke be yi, a da a wutu nan daga i kan ŋa, a gaa Alla tiigana telle. 26 I su kaawa ken ŋa. I toxo Alla kuufana, i kanunta xooro, i wa tini : « O ga da fo be wari lenki, o ma demu na a me wari abada ! »

[Leewi xiriye]

(Mace 9.9-13 ; Maarika 2.13-17)

27 Ken dangi falle, Isa giri non ŋa nan daga. A danginten ŋa, a da yogo taaxunten wari sagallitugeran ŋa, a toxon ga ni Leewi. Isa ti a da : « Sukke do in ŋa ! » 28 Leewi da i kitten bogu fo wo fo su yi nan sukke do a yi. 29 Ken falle a da baasi xoore dabari Isa da i kan ŋa. Sagalliragaana gabu do sero tananu ri nan kafi i ya yigeyen ŋa. 30 Farisigankon do sariyanxaranmoxonun xumu-xumu, na Isa xaranlenmon jalagi nan ti i da : « Manne saabu da axa do sagalliragaanon do junuubuɲaŋaanon ya gaa yigeene doome yi ? » 31 Isa da i jaabi, a ti : « Sahante haajun nta jaarandaana yi, watunton ya haajun na a yi. 32 Sero beenu gaa du walla xo seri teleŋonto, n ma ri kun xiri ; ku beenu gaa du walla xo junuubunto, n ri kun ya xiri kuudo i na du rasaaga. »

[Isa sefe suumiyen kanma, fo xasen do fo kurunba]

(Mace 9.14-17 ; Maarika 2.18-22)

33 Jama ke yi, sero yogonu ti Isa da : « Waxatinu yi, Yahaya xaranlenmon do Farisigankon xaranlenmon wa suumini na Alla batu ; an xaranlenmon kun wa yigene, i wa minni. » 34 Isa ti i da : « [N na xoyi maaɲuyugon ya yi.] Yaala maaɲuyugon feddanlenmon ra wa suumini na i do maaɲuyugon toxo doome maaɲaaxun ŋa ba ? Ken ra nta ɲaana ! 35 Xa koota wa riini maaɲuyugon gaa wutiini bakka i naxa. Ken koota ya ni, i na suumi. »

36 Isa da ke xa ko i da, a ti : « Sere nta yiran kurunba booxono na yiran xase betela ti a yi. An ga na ken ɲa, yiran kurunban booxe, dunŋe be xa ga booxe bakka a yi, a do yiran xase ke ra nta me wuttu. 37 Sere xa nta reesenji roono sumalli xase noxon ŋa. An ga na ken ɲa, reesenji ke wa buugunu na sumallen kara, reesendolon na joxi, sumallen xa na bono. 38 Ganta, an na reesenjin roono sumalli kurunban ya noxon ŋa. 39 Sere be ga na reesendolo mini, a kama nta reesendolo kurunban mulla, baawo a tini reesendolo xasen ya siren ni. »