[Isa Alimasiiwu jaarabiye]
4
Ken falle,
Alla Fanka Sennen da Isa Alimasiiwu geesu katta gunjuran ŋa,
kuudo Ibiliisa na a jaarabi.
2 Isa da tannaxate wuro do tannaxate kiye suumi.
Ken falle,
dullen da a raga.
3 Jaarabinte ke ri katta a yi,
nan ti a da :
« Selli Allanlenmen ya ga ni an ŋa tonŋun ŋa,
ti ke gide na du yilla buuru yi. »
4 Isa da a jaabi nan ti :
« A safanten wa Tawureeta yi ti :
“ Buuru baane nta sere birandini ;
Tunka Duumanten daale su ya na seren birandini.
” »*
5 Ken falle,
Ibiliisa da Isa wutu,
do a nan daga Yerusalaamu¤,
na a sigindi Allanbatikaxooren soorooron kanma,
6 nan ti a da :
« Selli Allanlenmen ya ga ni an ŋa,
du fitta yanqana ke !
Baawo a safanten wa Jabuuri yi nan ti :
“ Tunka Duumanten wa i maliikanun ɲaamarini ti
i nan tigiti an ŋa,
an nan maxa finbi gide yi.
” »*
7 A xa ti a da :
« A safanten wa Tawureeta yi xadi nan ti :
“ Maxa Tunka Duumanten xenpe,
an Alla.
” »*
8 Ibiliisa do a daga gidi gille kanma,
na duna tunkaaxun do yanbanŋen su koyi a yi,
9 nan ti a da :
« An ga na sujudi in danŋa,
n na ke su ya kinni an ŋa. »
10 A xa ti a da :
« Laato bakka in ŋa,
ke Ibiliisa ke !
A safanten wa Tawureeta yi ti :
“ Tunka Duumante,
an Alla,
an nan xawa a baane ya batta ;
an gollini a baane ya da.
” »*
11 A ga da ke ko,
Ibiliisa laato bakka a yi.
Ken sigira su,
Alla maliikanun ri a sorogo.
[Isa dagaye Galiile]
12 Waxati dangi falle,
Isa da a mugu ti annabi Yahaya rage kason ŋa.*
A saage katta Galiile.
13 A ga giri Nasaara yi,
a daga taaxu Kafarinoomu deben xaara xooren xannen ya yi,
Jebuluunu do Nafutaali¤ maran ŋa.
14 Ken moxo,
annabi Yesayaahu ga da sefe be ko na tinme,
a ga ti Alla ti :
15 « Ee,
Jebuluunu do Nafutaali jamaane,
axakun be gaa xaaraxooren xannen ŋa,
Yarade falle ;
Galiile,
xabiila gabun jamaane ;
16 Jama ke be ga ɲi bitanbinnen noxo,
I da xurayi xooren wari ko ;
Jama ke be ga ɲi kallen bitanbinnen noxo,
Xurayen bange i da. »*
[Isa golle jaman ŋa]
(4.17-20.34)
17 Isa xenu waajunden ŋa keeta,
a gaa tini :
« Xa da axa du rasaaga,
baawo Allantunkaaxun tinko ! »
[Isa xaranlen fano]
18 Na Isa toxo do Galiile xaaranxannen ŋa,
a da waaxinu filli wari,
kun ga ni Simoona,
i gaa riini aken xiri Piyeeri,
a do Handere.
Tangaano ya ni,
i gaa jalasediini.
19 Isa jaabi nan ti i da :
« Xa sukke do in ŋa ;
axa ɲi ɲexon ya tangini,
saasa axa na saage seron tangini katta Alla yi. »
20 I da i jalon saxundi ken sigira su yi,
nan sukke do a yi.
21 I ga laato,
a da waaxinu filli tana wari,
Yaaxuba do Yohanna,
i do i faaba Sebede,
i gaa i jalon sirondini fuuren noxon ŋa.
Isa da i xa xiri.
22 Ku sero filli xa da i faaba do fuuren toxo non ŋa ken sigira su yi nan sukke do a yi.
[Isa jaaranden do a xaranŋunde]
23 Ken falle,
Isa da Galiile su wura,
nan xaranŋundindi a allanxarankaanun noxon ŋa,
a gaa seron waajunu ti Allantunkaaxun Xibaari Liŋen ŋa.
Watten moxonma su gaa jaman ŋa,
Isa da a su jaara.
24 A toxon daga do Siiri jamaanen su yi.
Sere su jangiranten ga ni,
i do a ri katta a yi.
Jangiron danben su,
a ɲi a su jaarana :
jinnagumu,
muruxunto,
ken do xenuwatte.
25 Isa jaman kasafo :
a yogo giri Galiile ;
yogonu giri Debutanmi maran ŋa ;
foonu giri Yerusalaamu,
ken do Yehuuda maran kutten su,
nan daga a wara debu be gaa Yarade falle,
a su ri.