[Isa Alimasiiwu waajunde giden kanma]
5
Isa Alimasiiwu ga da jaman wari,
a sege giden kanma nan taaxu.
A xaranlenmon tinko a yi.
2 A da xaranŋunden jopa nan ti :
3 « Wulluliŋontaaxun wa seron da,
ku beenu fodumanton gaa Alla yi,
baawo Allantunkaaxun na i ya da.
4 Wulluliŋontaaxun wa seron da,
ku beenu gaa wuunu,
baawo i yaaxanjin wa riini suure.
5 Wulluliŋontaaxun wa seron da,
ku beenu ga ni nooxu yi,
baawo ɲiiɲen wa riini taxandi i naxa.
6 Wulluliŋontaaxun wa seron da,
ku beenu teleŋontaaxun dullen do a daqun gaa i ya,
baawo Alla wa riini i faga.
7 Wulluliŋontaaxun wa seron da,
ku beenu gaa hinnene,
baawo Alla wa riini hinne i ya.
8 Wulluliŋontaaxun wa seron da,
ku beenu sondomun xalasinton ga ni,
baawo i wa riini Alla wari.
9 Wulluliŋontaaxun wa seron da,
ku beenu ga da genmen sabatindi,
baawo i wa riini xiri allanlenmu.
10 Wulluliŋontaaxun wa seron da,
ku beenu,
i ga da i roxo teleŋontaaxun saabu da,
baawo Allantunkaaxun na i ya da.
11 Wulluliŋontaaxun wa axa da,
bire be i gaa axa kaana na axa tooro,
na gaaren ko axa yi ti fo buren danben su yi do in batte.
12 Xa sewo,
axa nan ɲaxali,
baawo,
axa tugaaden xooren ya ni Alla noqu.
Annabinyinmu ku be ga da axa saama,
i da i xa tooro kundu ya yi mene.*
[Sapen do nooro]
13 « Axa ya ni duna sapen ŋa.
Yelli sapen daxanmen ga na bogu a yi,
a katta saagene a yi kan moxo ?
A ntaxa fo sirono.
A sediini ya,
seron gaa terene a kanma.
14 « Axa ya ni duna nooron ŋa.
Debe be gaa giden ya kanma,
ken ra nta muqu.
15 Lanpa kumunten rora feti xolle wure yi ;
a taaxunu lanpanjongaaden ya kanma,
a na konpen su xurandi.
16 Ken moxo baane ya ni,
axa nooron nan xawa seron xurandini ya ;
i ga na axa golli sirun wari,
i na axa Faaba kallanken tiiga.
[Isa xibaaren do annabi Muusa Sariya]
17 « Xa maxa a sinma nan ti in ri annabi Muusa Sariyan ya guruja,
ma in ri xayifaarun ya gaarandi.
Aayi,
n ri i tinmandi ya.
18 Tonŋu,
n na a ko axa da,
na kanmun do ɲiiɲen toxo duumene,
sariyan noxo :
harafi baane nta a yi,
topa baane nta a yi a ga harafen ya kanma,
ken gaa buruxeene,
yere do fiinun su gaa tinmene.
19 Ken bire,
sere wo sere ya ga da ken me fo roxe kuteye ɲa sariyan noxon ŋa,
an ga da a xaranŋundi seron ŋa,
Allantunkaaxun ŋa,
an xa ɲaana seron su seri roxonten ya yi.
Xa sere be ga na i batu,
an ga da i xaranŋundi seron ŋa,
Allantunkaaxun ŋa,
an wa ɲaana seron su seri daren ŋa.
20 N na a ko axa da :
sere wo sere teleŋontaaxun ga ma dangi sariyanxaranmoxon do Farisigankon teleŋontaaxun ŋa,
an nan ro Allantunkaaxun ŋa,
gaare !
Ken nta ɲaana.
[Butten xibaare]
21 « Axa da a mugu nan ti sariyan da a ko axa seri fanon da ti :
“ Maxa sere kari ;
sere wo sere ga na sere yonkin ya bagandi,
an wa kiitini. ”*
22 « Xa saasa,
nke yinme na a ko axa da ti :
sere wo sere ya ga na hari butu katta i waaxin ŋa baane,
an wa kiitini.
Sere wo sere ga na ti i waaxin da “ Haqilanloxe ”,
i wa an kiitini Kiitikutaanon sapan ŋa.
An ga na ti a da “ Xafu ”,
an wa roono Jahannaba yinben ŋa.
23 « An gaa dagana an sadaxan deni sadaxindiran ŋa bire be kuŋa,
ken noqu an xosi sinme an ga da fo bure be ɲa an waaxin ŋa,
24 an sadaxan toxo saqa no,
an nan daga baasi bogu an do an waaxi ke naxan ŋa fina,
ken bire,
an na ri sadaxindi.
25 « Sere be nda an xiri kiite,
a soobe an do a nan gemu xanne,
saado axa gaa kiɲene kiitikutaanan ŋa,
ken ga fe,
a nan maxa daga an kini kiitikutaanan ŋa,
kiitikutaanan gaa an kinni polisinun ŋa,
polisinun xa gaa dagana an ro kason ŋa.
26 Tonŋu,
n na a ko an da :
an nta bakka kason ŋa na hari tanma baane toxo an xannen ŋa an ga ma a tuga.
[Jeeniyen xibaare]
27 « Axa da a mugu nan ti :
“ Maxa saxu do wandi yaqe yi. ”*
28 « Xa saasa,
nke yinme xa wa a koono axa danŋa ti :
sere wo sere ga na yaxare jallintan faayi,
an yaqe ga fe,
an jeeni ti an sondomen ŋa.
29 Selli an yaaxata tayen ya gaa an jaarabini,
a bagandi an na a fitta laatoyen ŋa.
An nan ɲa yaaxabaane yi,
a ya n fasu Jahannaba ga da an faten su buyi.
30 Selli an kitti tayen xa ya gaa an jaarabini,
a kutu an na a fitta ;
an ga ɲa kittibaane yi,
a ya n fasu Jahannaba ga da an faten su buyi.
[Wareyen xibaare]
31 « A koni noqu tana yi nan ti :
“ Sere be ga na i yaqen wara,
an na a warandibataaxen kini a yi. ”*
32 « Xa saasa,
nke yinme xa na a ko axa da ti :
sere wo sere ga na i yaqen wara,
na a ɲi a ma sunkandi,
an da a janba jeeniyen ŋa.
Sere wo sere ga na yaxarin warante yaxi,
an jeeni.
[Kunayen xibaare]
33 « Axa da a mugu xa nan ti a koni axa seri fanon da ti :
“ An nta kunana ti gaare yi,
an ga na kuna ti fo wo fo yi Tunka Duumanten da,
an nan xawa tigitini ken ŋa ya. ”*
34 « Xa saasa,
nke yinme xa wa a koono axa da ti :
axa nan maxa kuna ya mene.
Axa n maxa kuna ti kanmun ŋa,
baawo Alla laaraasin ya ni ;
35 axa n maxa kuna ti ɲiiɲen ŋa,
baawo a taanun yanqaran ya ni ;
axa n maxa kuna ti Yerusalaamu yi,
baawo Tunkanyugu wuruginten deben ya ni.
36 Maxa kuna ti hari an yinkollan xa yi,
baawo an ra nta yinti baane xurandini sakkati an na a finandi.
37 Axa ga na ɲi sefene,
axa ti :
“ Iyo ”,
walla “ Aayi ”,
ken ga fe,
kutte ke su ni Ibiliisa sinmayen ya.
[Haqitugeyen xibaare]
38 « Axa da a mugu nan ti :
“ Yaaxe tugeene ti yaaxe ya,
kanbe ti kanbe. ”*
39 « Xa saasa,
nke yinme wa a koono axa da nan ti :
axa nan maxa tanbu bure tuga me yi.
A fo sire,
sere be ga na fentan kara an kankanbaara tayen ŋa,
an na an kankanbaara noogen xa koyi a kaman ŋa.
40 Sere be gaa a mulla na an xiri kiite do an turukin batte,
an doroko xooren kafu a maxa.
41 Sere be ga na an killifi ti an na wujune taamande dabari,
an na a ɲa wujunu filli.
42 Sere be ga na an ɲaaga,
a ku.
Sere be ga na tanbo muuru an ŋa,
maxa bara.
[Xonnon xanuyen xibaare]
43 « Axa da a mugu nan ti :
“ ‘ An seri tinken xanu ya du,*
’ xa an nan bara an xonnen ŋa. ”
44 « Xa saasa,
nke yinme wa a koono axa da ti :
axa na axa xonnon xanu ;
axa na Alla ɲaaga axa tooɲondaanon da.
45 Ken moxo ya na a koyini ti axa Faaba kallanken renmun ya ni axa yi,
baawo a ya na kiyen bagandini seri siren do seri buren su kanma,
na kanmen texendi teleŋonten do baranten su da.
46 Ku beenu ga da axa xanu,
axa gaa kun baane ya xanna,
axa muson ɲaana manne yi keeta ?
Hari sagalliragaanon xa wa i xannaanon xanna.
47 Axa gaa axa waaxinun baane ya kuuɲini,
axa da manne kaawafi dabari ?
Baranton xa nta ken me ya dabarini gani ?
48 Axakun nan xawa tinmene ya xoyi axa Faaba kallanken tinmanten ga ni moxo ke be yi. »*