[Yaxun do wareyen xibaare]
10
Isa Alimasiiwu giri non ŋa nan daga Yarade ken kaara baane yi,
Yehuuda maran ŋa.
Jaman da me ɲi a kaaron ŋa xadi,
a wa i xaranŋundini xoyi a ga demu a yi moxo be.
2 Farisiganko yogo tinko a yi na a tirindi ku yi ti :
« A daganten ni yugo na i yaqen wara ba ?
» I ɲi a mulla na a kita feteqe ya yi.
3 A da i jaabi nan ti :
« Annabi Muusa da kan ɲaamarindixanne kini axa yi ? »
4 I ti :
« Muusa da a deni an na warandibataaxen kini yaxaren ŋa. »
5 Isa ti i da :
« Axa xandunxotaaxun ya saabu da ni,
Muusa ga da ke ɲaamarinde kini axa yi.
6 Ken ga fe,
duna joŋaarun ŋa,
Alla da seren taga yugo do yaxare ya yi.*
7 “ Ken ya saabu da,
yugon gaa fatene bakka i ma do i faaba yi,
nan kafi i yaqen ŋa,
nan ɲa baane yi.*
8 Ken ya saabu da,
i ga ntaxa jaatene sero filli,
sere baane ya ni keeta. ”
9 Ken kuŋa,
Alla ga da fo beenu kafu me yi,
sere n maxa i bogu me yi. »
10 I ga saage katta kan ŋa,
xaranlenmon saage a tirindini ke fi baane kanma.
11 Isa ti i da :
« Sere wo sere ga da i yaqen wara na yaxare tana yaxi,
an jeeni ya.
12 Yaxare xa be ga na i kiina wara,
nan yaxi yugo tana yi,
an jeeni ya. »
[Leminun bisimillande]
13 Seron do leminun gaa riini katta Isa yi kuudo a na i sooxen saxu i yinmun ŋa,
xaranlenmon wa doxono i ya.
14 Isa ga da ken wari,
a da a tooro moxoburu,
a ti :
« Xa da leminun wara i n ri katta in ŋa ;
xa maxa i kaba,
baawo sero beenu gaa xo leminun moxo,
Allantunkaaxun na i ya da.
15 Tonŋu,
n na a ko axa da,
sere wo sere ga ma Allantunkaaxun raga xo leminun moxo,
a nta roono. »
16 Ken sigira,
a da leminun xandunsunbu,
na i sooxen saxu i yinmun ŋa nan duwa i da.
[Bannanun roye Allantunkaaxun ŋa]
17 Isa dagante,
yugo yogo wurunten ri tusi a jon ŋa nan ti a da :
« Xaranmoxo sire,
n nan xawa manne ɲaana kuudo in na bireyi duumanten kita ? »
18 Isa ti a da :
« Manne saabu da an gaa in xilli “ xaranmoxo sire ” ?
Sere su sire fe,
Alla baane ya siren ni.
19 An wa Alla ɲaamarindixannun tu,
kun ga ni :
maxa sere kari,
maxa jeeni,
maxa fayi,
maxa seedanjuuraaxu,
maxa fo bure su ɲa sere yi,
an ma do an faaba daro. »
20 Yugo ke ti :
« Xaranmoxo,
n da ke su tanga gelli in gaa leminaaxun ŋa. »
21 Isa da a faayi ti xanuye yi :
« Fi baane da an kuma harisa :
daga,
fo wo fo gaa an maxa,
an na a su gaaga na a sadaxi misikiinun ŋa,
ken ŋa,
an na bannaaxun kita kanmun ŋa,
ken bire an na ri sukke do in ŋa. »
22 Yugon ga da ku sefo mugu,
a diinan fina ;
a sunonta xooren daga,
baawo kitayi xooren ya na a maxa.
23 Isa ga da i kaaron faayi,
a ti i xaranlenmon da :
« Bannan royen xoten ya ni Allantunkaaxun noxon ŋa de ! »
24 Ken sefe da xaranlenmon lasama.
Xa Isa saage a yi nan ti :
« Leminu !
Allantunkaaxun royen xoten ya ni de !
25 Ɲogomen nan bogu ti mesellen boten ŋa,
ken nan newu bannan nan ro Allantunkaaxun noxon ŋa. »
26 Sefe ke kaawafin tallan xooro xaranlenmon maxa,
i toxo tini me da :
« Ko xa n kisiini keeta ? »
27 Isa da i yaaxen sigindi i ya nan ti i da :
« Ken na seron ya kaaɲana,
xa a nta Alla ken kaaɲana,
baawo Alla ken ra wa fo wo fo su da. »
28 Piyeeri ti a da :
« Ayiwa,
oku xooni da fo wo fo wara nan sukke do an ŋa. »
29 Isa ti :
« Tonŋu,
n na a ko axa da,
sere wo sere ga na buru i kan ŋa,
nan buru i waaxi yugun do i waaxi yaxarun ŋa,
nan buru i ma do i faaba yi,
nan buru i renmun ŋa,
nan buru i soxanteenun ŋa do inke ya do Xibaari Liŋen batten ŋa,
30 ken kaman wa ken ka me kame kitta,
na kun waaxi yugu do kun waaxi yaxaru me kame kita,
na i ma do i renmun me kame kita,
na kun soxanteenu me kame kita.
Xa,
a kaman na tooran xa kitta ke duna yi ya de !
A na ri bireyi duumanten kita Laahara yi.
31 Ke moxo ya ni,
kaananka gabu gaa ɲaana fallanko ;
fallanka gabu xa na ɲa kaananko. »
[Isa sefe i kallen do i wundiyen kanma xadi]
32 Isa do i xaranlenmon tanmi do fillon daganton ya ni Yerusalaamu yi,
a wa i kaane.
I lasamanta xooro,
sero xa be gaa do i batten ŋa,
a su kanunten ya ni.
Isa da i xaranlenmo ku xiri xadi,
do i nan senbe.
Ke be gaa riini a kita,
a da a ko i da.
33 A ti :
« Ayiwa o faayi segene telle Yerusalaamu yi,
nke be ga ni Seren Renmen ŋa,
n wa roono sadaxakiɲandaananyinmankon do sariyanxaranmoxonun kittun ŋa,
i wa in kiitini kallaana yi.
I na in kini fankama mukkunun ŋa,
34 i na soyi in ŋa,
na raxanjin tufa in ŋa,
na in katu ti gaɲan ŋa,
na in kari.
N kalle bita sikka,
n na wundi. »
[Kaanamuuriyen ɲaagaye]
35 Sebede ren yugun filli tinko Isa yi,
Yaaxuba do Yohanna,
nan ti a da :
« Xaranmoxo,
o gaa an ɲaagana fi be yi,
o wa a mulla an na a ɲa o da. »
36 A ti i da :
« Axa na a mulla in na manne ɲa axa da ? »
37 I ti :
« O wa a muurunu an maxa o nan taaxu an kaaran ŋa ;
an ga na ro an darontaaxun ŋa bire be,
baane na taaxu an tayen ŋa,
baane na taaxu an noogen ŋa. »
38 Isa ti i da :
« Axa gaa in ɲaagana fi be yi,
xori axa wa a tu de ?
N gaa xaraxan xaraxace ke be minni,
axa ra wa a minni ba ?
Ma in gaa riini toora ke be wari,¤
axa ra wa ken me walla ba ? »
39 I ti a da :
« O ra wa a yi ke !
» Isa ti i da :
« Tonŋu,
n gaa xaraxanme ke be minni,
axa wa riini a mini ;
n gaa toora ke be walla,
axa wa a me walla.
40 Xa,
nan taaxu in tayen do in noogen ŋa,
nke ra nta ken laayidun wuttu axa da ;
a laayidun ga wuti ku beenu da,
a kiniini kun ya yi. »
41 Xaranlenmo ku tanmi ga da ken mugu,
i butu Yaaxuba do Yohanna wure.
42 Isa da i xiri kuŋa nan ti i da :
« Axa wa a tu nan ti jamon kuttun naxan ŋa,
ku be gaa du ragana yinmanko yi,
i ya na dunadunkamanaaxun ŋa.
Senbenton xa wa i sagon su dabarini kuttun ŋa.
43 Ken nta xawa ɲaana axakun duurun do me naxan ŋa.
Axa du baananbe du ya gaa a mulla nan ɲa axa su seri daren ŋa,
a kaman nan ɲa axa da kome yi.
44 Sere be gaa a mulla nan ɲa axa su kaananken ŋa,
a kaman nan xawa ɲaana axa su da kome ya yi.
45 Ke yinme ya ni Seren Renmen ri yinmen ŋa :
a ma ri sere golliɲaŋundi,
xa a ri golli seron ya da,
na i yonkin kini maxawasaade yi seren gabe da. »
[Finkinten sahande]
46 Isa do i xaranlenmon kiɲe Yeriiho.
A do xaranlenmo ku do jama xoore bogunto deben ŋa,
Teme ren yugo Barateme xa wa salumene killinxannen ŋa.
A finkinten ya ni.
47 A ga da a mugu nan ti Isa Nasaaranke ya ni,
a xenu xaaruyen ŋa nan ti :
« Tunka Daawuda renme Isa,
hinne in ŋa ! »
48 Xa seri gabe doxo a yi kuudo a nan kuuru,
xa a wa tallan xaarunu nan ti :
« Daawuda renme,
hinne in ŋa ! »
49 Isa sigi nan ti :
« Xa da a xiri !
» I da a xiri nan ti a da :
« Maxa jikkirankuti !
Giri !
A wa an xilli. »
50 Ke ga koni,
a da i doroken sedi,
a dire gilli nan daga katta Isa yi.
51 Isa ti a da :
« An na a mulla in na manne ɲa an da ?
» Finkinte ke ti :
« Xaranmoxo,
n na fo wari ta ! »
52 Isa ti a da :
« Daga,
an danqanaaxun da an sahandi.
» Ken sigira su yi,
a da fo wari nan sukke do Isa yi killen kanma.