Mace Linjiili
Mace Linjiili roraqe
Mace ni Isa Alimasiiwu faarun tanmi do fillon du baananbe ya. Haalife ren yugon ya ni, i gaa a xilli « Leewi ». Sagalliragaana ya ni Roomu fankan da Banisirayila yi. Isa kiyen ŋa, Yehuuda be ga na ɲa sagalliragaana yi Roomu yi, ken na Yehuudiyanun kuttun maxa junuubuɲaŋaana xoore ya yi. A kaman xoninten ya ni moxoburu, baawo a wa Banisirayilaganko xonnon deemana, kun ga ni Roomunkon ŋa. Xa, a hinneyen da Isa ken raga ; a da a xiri nan ti a na sagallirageye ke wara, a nan ɲa i da xaranlenma yi.
Ke Linjiili noxo, Mace wa a koyini o yi nan ti Isa ya ni Banisirayila Tunka yi, a kisindaanan xa ya ni. A bakka Tunka Daawuda fonlaqen ya yi. Alla da aken yinme ya fin ko annabinyin fanon da na laayidun wutu nan ti koota wa riini i gaa Banisirayilaganko su kisini ti a sababun ŋa.
Mace da i Linjiili ke jopa o da ti Isa burujun ya yi fina, a do Isa bangeyen xibaare (soora 1-2). Yahaya ga da Isa wanqi moxo be, a do Ibiliisa ga da Isa jaarabi moxo be, a wa ken koono (3.1-4.11). Isa ga ɲi kaawafiinu be dabarini, a wa kun koono o da, ken do Isa ga ɲi masayilanu be dabarini Galiile jamaanen ŋa (4.12-18.35). Linjiili ke lagaren ŋa, Mace wa a koyini o yi Isa ga daga Yerusalaamu yi moxo be, a xonnon ga da a genge do sallibinsollen ŋa noqu ke be yi, a do a ga wundi bakka kallen ŋa non be yi (19.1-28.15). Ken falle ya ni, Isa do i xaranlenmon ga da me ɲi gide yogo kanma Galiile yi (\xt 28.16-20).
Ke Linjiili noxo, o wa a faamunu nan ti Isa da i xaranŋundi fo gabe yi, fo be gaa taŋene Allantunkaaxun xibaaren ŋa. Ken xaranŋunde noxon ŋa, Mace da waajundi gillu karagi sugandi, i faayi ku :
1) Isa da i xaranŋundi seren ga n xawa du ragana moxo be Allantunkaaxun noxon ŋa (soora \xt 5-7),
2) Isa da i xaranlenmon xaranŋundi i ga n xawa Allantunkaaxun xibaaren sanqini jaman ŋa moxo be (soora \xt 10),
3) Isa sefe ti masayilanun ŋa fo be gaa taŋene Allantunkaaxun xibaaren ŋa (soora \xt 13),
4) Isa sefe junuubun do junuubuxafariyen kanma (soora \xt 18),
5) Isa sefe duna lagaren kanma, a do a gaa seron kiitini moxo be (soora \xt 24-25).
Mace Linjiili ra wa taxandini taxandu tunmi, kun ga ni :
1) Isa bangeyen do a leminaaxu (soora \xt 1-2),
2) Isa moxosironde katta i gollen ŋa (\xt 3.1-4.16),
3) Isa golle jaman ŋa (\xt 4.17-20.34),
4) Isa xaranŋunde Yerusalaamu yi (soora \xt 21-25),
5) Isa koyi lagare : a rageye, a kiitiyen do a gengende do sallibinsollen ŋa (soora \xt 26-27),
6) Isa wundiyen do a dukoyiye (soora \xt 28).