[Warayen xibaare]
19
Isa Alimasiiwu ga duguta ku sefo yi bire be,
a giri Galiile maran ŋa nan ri Yehuuda maran ŋa,
Yarade ken kaara baane yi.
2 Jama xoore sukke do a yi,
a da i jaara non ŋa.
3 Farisigankon gaa a mulla na a kita feteqe yi,
i tinko a yi nan ti a da :
« A daganten ni yugo na i yaqen wara ba ?
Ken ga ɲa fo wo fo kanma ? »
4 Isa jaabi nan ti i da :
« Axakun ma a xara safefoonun ŋa ya nan ti Alla ga da duna taga,
a da yugo do yaxare ya taga gani ?*
5 Nan saage tini :
“ Ken ya saabu da,
yugon gaa fatene bakka i ma do i faaba yi,
nan kafi i yaqen ŋa,
nan ɲa baane yi. ”*
6 « Ken ya saabu da,
i ga ntaxa jaatene sero filli ;
seri baane ya ni keeta.
Ken kuŋa,
Alla ga da fo beenu kafu me yi,
sere n maxa i bogu me yi. »
7 I ti Isa da :
« Ken kuŋa,
manne xa saabu da annabi Muusa ga ɲaamarindi ti an ga na an yaqen wara,
an na a warandibataaxen kini a yi ? »*
8 Isa jaabi nan ti i da :
« Axa xandunxotaaxun ya saabu da ni,
Muusa ga da yaxarinwarayen denindi axa da,
xa a ma ɲi kundu duna joŋaarun ŋa.
9 Tonŋu,
n na a ko axa da ti :
sere wo sere ga na i yaqen wara na a ɲi a ma sunkandi,*
an ga na yaxare tana yaxi,
an jeeni. »
10 Isa xaranlenmon ti a da :
« Selli kundun ken ya ga ni,
nafa nta yugon ken da yaxun ŋa kuŋa mene. »
11 A ti i da :
« A su xa ra nta ken danŋa wo,
ma Alla ya ga na a newondi sere be da.
12 Fi gabe ya n da sero yogonu fata yaxini :
yogonu tagemoxon ya ni ;
yogonu tapinton ya ni ;
yogonu xa nta a mulla nan yaxi Allantunkaaxun saabu da.
Sere be ra gaa duŋene ti ku yi,
an nan duŋe ti i ya. »
[Isa do leminu]
13 Seron do leminun ri katta Isa yi kuudo a na i sooxen saxu i yinmun ŋa,
na Alla ɲaaga i da.
Xa,
xaranlenmon wa doxono i ya.
14 Isa jaabi nan ti i da :
« Xa da leminun wara ;
xa maxa i kaba riini katta in ŋa,
baawo Allantunkaaxun na sero ya da,
ku be gaa xoyi leminun moxo. »*
15 A da i sooxen saxu leminun yinmun ŋa.
A giri no.
[Maxanban banna]
16 Ayiwa,
yugo yogo ri katta Isa yi nan ti a da :
« Xaranmoxo,
n nan xawa kan fo sire ɲaana kuudo in na bireyi duumanten kita ? »
17 Isa jaabi nan ti a da :
« Alla baane ya siren ni.
Manne saabu da,
an gaa inke ya tirindini fo siren ŋa ?
An gaa a mulla na bireyi duumanten kita,
tigiti annabi Muusa ɲaamarindixannun ŋa. »
18 Yugon ti :
« Kun ni kan ŋa ?
» Isa jaabi nan ti a da :
« Maxa sere kari ;
maxa saxu do wandi yaqe yi ;
maxa fayi ;
maxa seedanjuuraaxu ;*
19 an ma do an faaba daro ;*
an seri tinken xanu ya du, xoyi an yinme moxo. »*
20 Maxanbaanen ti a da :
« N da ke su tanga.
Mannen toxo ? »
21 Isa jaabi nan ti a da :
« Selli an gaa a mulla an fiinun su nan tinme,
daga,
fo wo fo gaa an maxa,
an na a su gaaga na a sadaxi misikiinun ŋa,
an na bannaaxun kita kanmun ŋa.
Ken falle,
an na ri sukke do in ŋa. »*
22 Isa ga da kundu ko,
maxanbaane ke sunonta xooren daga,
baawo kitayi xooren ya na a maxa.
[Naaburen fitina]
23 Ken falle,
Isa ti i xaranlenmon da :
« Tonŋu,
n na a ko axa da,
bannan royen xoten ya ni Allantunkaaxun noxon ŋa de !
24 N na saaga a yi axa da nan ti,
ɲogomen nan bogu ti mesellen boten ŋa,
ken nan newu bannan nan ro Allantunkaaxun noxon ŋa. »
25 Xaranlenmon ga da ku sefo mugu,
i kaawafi buru,
i ti :
« Ko xa n kisiini keeta ? »
26 Isa da i yaaxen sigindi i ya nan ti i da :
« Ken na seron ya kaaɲana,
xa Alla ken ra wa fo wo fo su da. »
27 Ken falle,
Piyeeri da sefen wutu,
a ti Isa da :
« Ayiwa,
oku da fo wo fo wara nan sukke do an ŋa.
Kan taqe na o xa da ? »
28 Isa jaabi nan ti i da :
« Tonŋu,
n na a ko axa da :
fiinun su ga na ɲi kurunbaaxunu bire ke be,
nke be ga ni Seren Renmen ŋa,
n ga na taaxu in laareesin kanma,*
axakun be ga sukke do in ŋa,
axa wa taaxunu tunkantaaxaadu tanmi do fillo kanma na Banisirayila xabiilanun tanmi do fillon kiiten kutu.
29 Sere wo sere ga na buru i kan ŋa,
nan buru i waaxi yugun do i waaxi yaxarun ŋa,
nan buru i ma do i faaba yi,
nan buru i renmun ŋa,
nan buru i soxanteenun ŋa do inke ya yi,
taqi xoore wa ken kaman danŋa kafiini bireyi duumanten ŋa.
30 Ke moxo ya ni,
kaananka gabu gaa ɲaana fallanko ;
fallanka gabu xa na ɲa kaananko. »