[Seron seri dare Allantunkaaxun noxo]
18
Ken bire,
xaranlenmon tinko Isa Alimasiiwu yi na a tirindi ti :
« Allantunkaaxun ŋa,
ko ni seron su seri daren ŋa ? »
2 A da lemine yogo xiri na a sigindi i naxan ŋa,
3 nan jaabi nan ti :
« Tonŋu,
n na a ko axa da :
axa ga ma axa jikkunun faraaxu nan ɲa xoyi ke lemine moxo,
axa nta roono Allantunkaaxun ŋa.
4 Sere be ga na du maxayanqa xoyi ke leminan lamaane moxo,
ken ya ni seron su seri wuruginten ŋa Allantunkaaxun noxon ŋa.
5 Sere be ga na lemine bisimilla ti inke ya yi,
a kaman da inke yinme ya bisimilla.
[Gongonde]
6 « Na gidindunga xoore siiti an xannen ŋa,
na an do a yanqandi geeji,
ken tooran ya n fasu an da diinanta an na hari kun fo maxayanqanto du baananbe sankundi,
ku be saxunton gaa in ŋa.
7 Bone da duna xooro na a sababun ɲa seron sankuntaaxun ŋa.
Sankuntaaxun ken ɲaana ya mene,
xa bone wa seren da,
ke be ga da seron jaarabi.
8 Selli an kitte ma an tan ya gaa an jaarabini,
a kutu bakka du yi,
an na a fitta laatoyen ŋa.
An nan ɲa kitti baane ma ta baane yi bireyi duumanten noxon ŋa,
a n fasu an muuman ga fitte Jahannaba yinben noxon ŋa,
yinbe ke be ga nta kalla abada.
9 Selli an yaaxen xa ya gaa an jaarabini,
a bagandi,
an na a fitta laatoyen ŋa,
an ga ɲa yaaxa baane yi bireyi duumanten noxon ŋa,*
a n fasu an do yaaxo filli ga fitte Jahannaba yinben noxon ŋa.
[Jaxa sankunten masayila]
10 « Xa da du koroosi ;
axa n maxa ku fo maxayanqanto roxondi.
N na a ko axa da ti :
maliikantangandaanon ya n sikki i da in Faaba kallanken jon ŋa waxatin su yi.
11 ¤12 « Yugo be kame jaxe ya gaa a maxa,
xoyi baane ga na sanku bakka i ya,
a nta tankabe ke do kabun su toxo giden kanma nan daga baane ke ya muuru ba,
ma kan moxo ?
13 A ga na a wari,
n ya faayi a koono axa da,
a ɲaxalini ti ken ya yi diinanta tankabe ke do kabun be ga ma sanku.
14 Kundun ya ni,
axa Faaba kallanken xa nta a mulla baane gaa sankunu bakka ku fo maxayanqanto yi.
[Waaxin toora]
15 « An waaxin ga na toora dabari an ŋa,
daga katta a yi ;
an na a senbendi na a tuyindi a yi.
A ga na an terinka,
an do a na ɲa baane.
16 A ga ma an terinka,
an na seri baane ma fillo kafu du yi,
axa na daga katta a yi,
kuudo fin su na sabati ti sero filli ma sikko seedaaxun ŋa.*
17 A ga na bara i xa terinkana,
an na a ko batijaman ŋa.
A ga na bara kun yinme terinkana,
a raga xoyi Allankannanbali walla sagalliragaana.*
18 Tonŋu,
n na a ko axa da,
axa ga na ke be kaba duna yi,
ken kabanten ya ni Alla noqun ŋa ;
axa ga na ke be denindi duna yi ;
ken daganten ya ni Alla noqun ŋa.*
19 « Tonŋu,
n na a ko axa da xadi :
axa ke jama su,
hari sero filli baane ya ga na me faamu ke duna yi,
i ga da in Faaba kallanken ɲaaga fo wo fo su yi,
a wa ken ɲaana i da,
20 baawo sero filli ma sikko ga da me ɲi noqu su yi ti inke toxon ŋa,
n wa i naxan ŋa. »
[Yanpayinbalaaxun masayila]
21 Ken falle,
Piyeeri tinko Isa yi nan ti a da :
« Xaranmoxo,
n waaxi be ga na in tooɲa,
n nan xawa ta manime dangindini a da nan yanpa a maxa ?
Ma ta ɲeru ba ? »*
22 Isa jaabi nan ti a da :
« Aayi,
maxa xenpe ta ɲeru baane yi de !
Yanpa a maxa ma tanɲere taaxuranu ɲeri¤ ya yi !
23 « Ke saabu da,
Allantunkaaxun gaa xoyi ke be :
tunkanyugo yogo ya ni,
a wa a mulla i do i golliɲaŋaanon na i tanbonun jaate.
24 A ga da a jopa,
i do a golliɲaŋaana yogo ri,
a wujunun wujunun tanbon gaa ken ŋa.
25 Fo nta a maxa,
a ra gaa tanbo ke tugana.
Tunkanyugon ti i na a do i yaqen do i renmun gaaga,
a do fo wo fo gaa a maxa,
kuudo ike tanbon na tuge.
26 Golliɲaŋaanan ga da ken mugu,
a da du fitta tunkanyugon taanun ŋa,
nan tusi nan ti :
“ Duruxoto an na in muɲindi,
n na a su tugana an ŋa ya. ”
27 Golliɲaŋaanan hinneyen da tunkanyugon raga ;
a da a wara nan yanpa a maxa i tanbon su yi.
28 Aken golliɲaŋaana baane bogunte,
a do i kapanlenma yogo gemu a tanbon gaa ken ŋa xasu sikki tugaadi me.
A da a raga ti i dorokoxannen ŋa na a faada,
nan ti a da :
“ N tanbo be gaa an ŋa,
a tuga ! ”
29 Kapanlenma ke da du fitta a taanun ŋa nan ti a da :
“ Duruxoto an na in muɲindi,
n na an tugana ya. ”
30 Xa aken ma duŋe,
a da yugo ke raga nan daga a ro kason ŋa,
nan ti a nta bakka ma a ga na i tanbo ke ya tuga.
31 « A golle ke digi a kapanlenmon ŋa moxoburu ;
fo wo fo ga ɲaŋi,
i daga a su ko tunkanyugo ke da.
32 Tunkanyugon da a xiri nan ti a da :
“ Ke seri bure ke,
anken ga da inke xanjo,
n yanpa an tanbon su yi.
33 Anken kori hinnene ke yi nan yanpa a maxa xoyi inke ga yanpa an maxa moxo ke be yi ? ”
34 A golle ke da tunkanyugon butundi nan dangi haqen ŋa.
A da a kini katundaanon ŋa,
i da a ro kason ŋa na a katu,
a ntaxa bakka ma a ga na i tanbo ke su ya tuga.
35 Ayiwa,
sere wo sere ya gaa kundun ŋa,
an ga nta yanpana an waaxin maxa buttu xulle kanma,
n Faaba kallanken xa na ke me ya ɲaana an ŋa. »*