9
Isa Alimasiiwu ti i xaranlenmon da :
« Tonŋu,
n na a ko axa da,
ke jama be gaa yere,
axa su nta kalla ma yogonu kun ga da Allantunkaaxun riyinten wari a do senbe xoore. »
[Isa Alimasiiwu giyan yilleye]
2 Bito tunmi dangi falle,
Isa da Piyeeri do Yaaxuba do Yohanna baane xiri do i nan daga gidi gille yogo kanma.
A giyan yille i jon ŋa.
3 A yiraamun xa xura ma i nan toxo ɲelunqene ;
sere su nta kitene ɲiiɲen kanma a ra gaa yiraame xurandini kundun ŋa.
4 Annabi Hiliyaasu do annabi Muusa bange i da,
i do Isa wa sefene.
5 Piyeeri ti Isa da :
« Xaranmoxo,
o gaa yere a siro de !
O na gupu sikki sigindi :
anke baane,
annabi Muusa baane,
annabi Hiliyaasu baane. »
6 Piyeeri ntaxa a tu i gaa ke be koono,
baawo a do xaranlenmo ku kanu moxoburu.
7 Xaba yogo xufi i kanma,
sefexanne xa giri xaba ke noxon ŋa nan ti :
« Ke ni in Ren xanan ya yi.
Xa da a terinka de ! »
8 I ga da i kaaron faayi ken sigira su yi,
i maxa sere tana su wari kafiini du yi,
ma Isa baane.
9 I yanqanto bakka giden ŋa,
Isa da a xotondi i maxa nan ti i ga da ke be wari,
i nan maxa a ko sere su da ma Seren Renmen ga na giri bakka furun naxan ŋa bire be.
10 Sefe ke toxo i haqilun ŋa.
Xa,
i toxo me mullin tirindini nan ti :
« Nan giri furun naxa,
ken xa wure ni manne yi ? »
11 I da a tirindi ti :
« Manne saabu da sariyanxaranmoxonun ga ti annabi Hiliyaasu fina ya nan xawa riini ? »
12 A ti i da :
« Yabo,
Hiliyaasu fina ya nan xawa riini na fiinun su moxo sirondi,*
xa manne saabu da a ga safe Safandi Sennun noxon ŋa nan ti Seren Renmen wa riini toore,
i gaa a roxondini ?
13 Ayiwa,
n wa tonŋun koono axa da nan ti :
Hiliyaasu ri kuŋa.
Fo wo fo ga n liŋi seron da,
i da a su ɲa a yi,
xoyi safefoonun ga da a ko moxo be. »
[Leminan jinnagumen sahande]
14 I riyinto katta xaranlen kuttun ŋa,
i yaaxen wa jama xoore yi i kaaron ŋa,
i do sariyanxaranmoxonun gaa manqanŋa.
15 I yaaxen gaa Isa yi riini,
ken da i ju.
Jaman su dire nan daga gemu a yi do a na me kuuɲi.
16 A da i tirindi nan ti :
« Axa do i manqanŋa do manne yi ? »
17 Yogo da du toxo jaman ŋa nan ti :
« Xaranmoxo,
n do in renmen ya n ri katta an ŋa,
jinnan ga da a muumundi.
18 A wa a ragana noqun su yi.
A ga na a xenundi,
xanqan wa bakka a raqen ŋa,
a na i kanbon xici me yi nan kaawa.
N ti an xaranlenmon na a xata bakka a yi,
i ma katu a yi. »
19 Isa da sefen taŋandi i ya nan ti i da :
« Ke jama danqanaaxuntanbali !
N toqo do axa batten ŋa ma kan bire ?
Axa toqo banbini in ŋa ma kan bire ?
Axa do a nan ri katta in ŋa. »
20 I do a ri katta a yi.
Gelli jinnan ga da Isa wari,
a da leminen raga ragandi xote,
na a wara yanqana ɲiiɲen ŋa ma a nan toxo bilinqene,
xanqan gaa bakka a raqen ŋa.
21 Isa ti leminen faaba da :
« Ke da a jopa gelli kan bire ?
» A da a jaabi nan ti :
« Gelli a bucinne.
22 Waxatinu,
a wa hari a xenundini yinben ŋa,
ma jin xa,
kuudo a na kara.
Xa,
selli an ra gaa a yi,
hinne o yi an na o deema. »
23 Isa ti a da :
« An ma ti selli in ra gaa a yi ya ?
Sere su danqanaaxun tinmanten ya ga ni,
fo wo fo nta kontono ɲaana ken da. »
24 Ken sigira,
leminen faaba xaaru nan ti :
« N danqanaaxu,
xa in danqanaaxun ma tinme.
N deema ! »
25 Isa yaaxen gaa jaman ŋa direene riini,
a xiribe jinnan ŋa nan ti :
« Jinna !
Anken be gaa seren lungundini na a muumundi,
n da an ɲaamari,
bogu ke lemine yi,
an nan maxa saage katta a yi hari abada ! »
26 Jinnan xaaru,
na leminen yonko yonkondi xote,
nan bogu a yi.
Leminen toxo saqa xo fure,
ma a su nan ti :
« A kara dubaane. »
27 Xa Isa ga da a raga ti i kitten ŋa na a girindi,
a sigi.
28 Isa royinte kan ŋa,
xaranlenmon do a ga fese bire be,
i da a tirindi kuŋa nan ti :
« Manne ni oku ga kori jinnan xatana bakka ke lemine yi ? »
29 A ti i da :
« Ke jinnan danbe,
allanɲaageyen ga fe,
fo wo fo ra nta a xatana. »
[Isa kallen do a wundiyen konŋe xadi]
30 I giri non ŋa na Galiile jamaanen kutu.
Isa ma ɲi a mulla sere na i noqu tu,
31 baawo a da i gollen su gemundi i xaranlenmon xaranŋunden ya yi,
a wa i tini i da :
« Nke be ga ni Seren Renmen ŋa,
n wa roono seron kittun ŋa,
i gaa in karini.
N kalle bita sikkan koota,
n wa wundini bakka furun naxan ŋa. »
32 Xa,
xaranlenmon ma a ke sefeta faamu,
i wa kanna a tirindini sefeta ke xa wure yi.
[Sere xooren maxankutiye Alla da]
33 I kiɲe Kafarinoomu yi nan ro kan ŋa.
Isa da i tirindi nan ti :
« Axa ɲi manne sefe yi killen ŋa ? »
34 Xa,
i toxo kuurunu,
baawo i ɲi me kutana ya sere be ga n dara i su yi.
35 Isa taaxu na i faarun tanmi do fillon xiri nan ti i da :
« Sere be gaa a mulla nan ɲa kaananke,
a kaman nan ɲa axa su falle,
nan ɲa axa su da kome yi. »
36 Ken falle,
a da lemine yogo raga na a sigindi i naxan ŋa,
a da a xandunsunbu nan ti i da :
37 « Sere wo sere ga da ke me lemine bisimilla ti inke ya yi,
a da inke yinme ya bisimilla.
Sere xa su ga da inke bisimilla,
a ma inke baane bisimilla ;
ke be ga da in xayi,
a da in do ken ya bisimilla. »
[O xananun do o xonno]
38 Yohanna ti Isa da :
« Xaranmoxo,
o da yugo yogo wari jinnaxatene ti an toxon ŋa.
O da a kaba baawo o sukkanlenma fe. »
39 Xa Isa ti :
« Xa maxa a kaba,
baawo sere su ra nta kaawafi dabarini ti in toxon ŋa,
ken batte su a gaa yillene fo bure koono in da.
40 Sere be barante ga nta axa yi,
a kaman ni axa yogo ya yi.
41 Tonŋu,
n na a ko axa da :
sere wo sere ga da hari jiranxolla fakka baane ji ya kini axa yi ti Kisindaanan toxon ŋa,
ken kaman muson nta bonno. »
[Dukoroosiye]
42 « Na gidindunga xoore siiti an xannen ŋa,
na an do a sedi geeji,
ken tooran ya n fasu an da diinanta an na hari kun fo maxayanqanto du baananbe sankundi,
ku be saxunton gaa in ŋa.
43 Selli an kitten ya gaa ɲaana sababu na an jaarabi,
a kutu.
An do kitti baanen nan ro bireyi duumanten ŋa,
a n fasu an do kittu filli ga sedi Jahannaba yinben noxon ŋa,
yinbe ke be ga nta kalla.
44 ¤
45 Selli an tan ya gaa ɲaana sababu na an jaarabi,
a kutu.
An do ta baanen nan ro bireyi duumanten ŋa,
a n fasu an do taanu filli ga sedi Jahannaba yinben noxon ŋa.
46 ¤
47 Selli an yaaxen ya gaa ɲaana sababu na an jaarabi,
a bagandi.
An do yaaxa baanen nan ro bireyi duumanten ŋa,
a n fasu an do yaaxo filli ga sedi Jahannaba yinben noxon ŋa.
48 Ken noqu,
xuudu ku be gaa faten yigana,
i nta kalla,
yinbe ke xa nta kalla.*