Luka Linjiili
Luka Linjiili roraqe
Luka ni jaarandaanan ya yi, Pawulu teranlenman xa ya ni. Ken Pawulu ni Isa Alimasiiwu faarun du baananbe ya yi. Pawulu da terendu yogo dabari, a gaa xirindini. A do Luka daga doome kun terendu yogo yi. An wa kun walla Faarun Ɲangollun kitaaben noxon ŋa (Ɲangollu 16 ; 20-21 ; 27-28). Luka da kitaabu filli ya safa Laayidu Kurunban noxon ŋa, kun ga ni : a yinme Linjiili, do Isa Alimasiiwu Faarun Ɲangollun kitaabe. A da muurundi gabe dabari Isa biremoxon kanma, ken do Xibaari Liŋen sanqinde, na a wutu Yerusalaamu nan daga a wara Roomu yi, ken ɲa katta 62 siine Isa bangeyen falle. A hanmin ɲi na Isa biremoxon tinmanten ya laxami, xoyi Linjiili kitaabu ku safandaanon su ga da i laxami moxo be.
Luka Linjiili ke ya nan xoora Linjiili kitaabu ku su yi. A do kitaabu ku su sefene Isa birewaxati ke ya xibaaren kanma. Xa, a ya n da fo gabe ko Isa kaawafintanbangemoxon kanma, ken do Mariyaamu do Jakkariyaawu do Yahaya ga da siga be dabari, a da ken su ko. Kafon ga ɲi sero ku be walla fonkaaran ŋa, kun ga ni : ku be ga feti Yehuudiyanu yi, mukkunu, yaxaru, kiinakariidonu, misikiinu, jangiranto, lonjuurunto, seri xatanto, ken do i ga bara sero beenu yi i jikku burun saabu da, Isa ga da fiinu be dabari kun sero da, Luka sefe kun ya kanma moxosiri. Do xadi, Allantunkaaxun do fo be ga n xawa, a wa ken xa koyini. Seren su biremoxon wa faraaxini, baawo Isa ni hadariyen ŋa na seren su ya deema na i kisi.
Luka wa kitaabe ke safemaanan koono soora 1.1-4 nan ti :
N xana liŋe Tuufulo, fi xooro rakutunto beenu ga ɲaŋi o maxa yere, seri gabe da a faayi nan safandi i kanma, xoyi seron ga da i laxami o da moxo ke be yi. Kun sero beenu ga da i laxami, fiinu ku ɲaŋi i ya taanun kanma gelli i joŋaarun ŋa. I yille ɲaana Alla digaamen gangundaanon xa yi. Ken ya ni, n xa da fiinu ku lewusin muuru moxosiri gelli i jopaadun ŋa. N da a wari ti in nan xawa safandini katta an ŋa i kanma xo i ga ri moxo be, kuudo an ga da fiinu beenu xara, an na katu saqa i sahaabantaaxun ŋa.
Luka Linjiili ke ra wa taxandini taxandu tunmi, kun ga ni :
1) Isa bangeyen do a leminaaxu (soora \xt 1-2),
2) Isa moxosironde katta i gollen ŋa (\xt 3.1-4.13),
3) Isa golle jaman ŋa (\xt 4.14-9.50),
4) Isa golle Yerusalaamu killen ŋa (\xt 9.51-19.27),
5) Isa koyi lagare : a rageye, a kiitiyen do a gengende do sallibinsollen ŋa (\xt 19.28-23.56),
6) Isa wundiyen do a dukoyiye (soora \xt 24).