[Pawulu saagaye katta Maxidoona do Geresi yi]
20
Manqanŋen ga kude,
Pawulu da isanxaranlenmon kafu me yi na a ko i da nan ti i nan duruxoto.
Ken falle,
a do i sere me yi nan daga Maxidoona.
2 A da ken mara wura a gaa sefene xaranlenmon da na duruxotoyen kini i ya siri.
Ken falle,
a kiɲe Geresi¤ yi.
3 A da xasu sikki ɲa non ŋa.
A gaa a mulla na fuuren wutu bire be nan daga Siiri jamaanen ŋa,
a da a mugu nan ti Yehuudiyanun da janbayen yetu ti i ya.
A da a ŋanniya i nan saage katta Maxidoona yi kuŋa.
4 A do sero beenu ga daga doome yi,
i toxonun faayi :
Piira ren yugo Soputoro nan bogu Beeri yi,
Lisitarooxo,
do Sekundi,
kun ga ni Tesaloniixenko yi,
do Gaayi ken ga ni Dereebunke yi,
do Timoote,
kafiini Tixiiki do Torofiimu nan giri Haasi maran ŋa.
5 Ke jama daga oku kaane,
i wa o dukku Tooro yi.
6 Pesaxansallen ga dangi,
o xa da fuuren wutu Filipo bologaanen ŋa,
bito karagi o gaa jin kanma.
Ken falle,
o rage i ya Tooro na koye ɲa me kanma non ŋa.
[Pawulu Toorondagaye]
7 Koyen koota fanan ŋa,
o da me ɲi kuudo o na buurun kutu-kutu.¤
Pawulu wa a mulla nan suxubandaga.
A sare maarenmun ŋa nan sefe i da ma wuron taxande gaa kiɲene.
8 O ga da me ɲi sankanso ke be noxon ŋa,
lanpa gabe kumunten wa no.
9 Fonnanxaye yogo wa taaxunu palanteerinboten ŋa,
a toxon ni Yetiixo.
Pawulu ga dalla sefen ŋa,
fonnanxaye ke xenqe ma a gaa kokkitene bakka sankanso fillandin palanteerin kanma nan yere.
O gaa a girindini,
ken da a ɲi a kara.
10 Ken sigira su yi,
Pawulu yanqa nan jimi a kanma,
na a wutu i bunbun ŋa nan ti :
« Xa maxa jooti de !
A ma kara. »
11 Ken falle,
Pawulu sege na buurun kutu-kutu¤ nan yige.
A sukke do sefen ŋa ma fajiri gaa kiɲene,
ken falle a daga.
12 Fonnanxaye ke bireyen da a su sewondi,
i do a saage katta i kan ŋa.
[Mileetidagaye]
13 Oku fina ya n ro fuuren ŋa nan taŋe Haasi yi.
O ga na kiɲe non ŋa,
o na Pawulu wutu,
baawo aken da a xanu i nan tere katta non ŋa ya.
14 Pawulu ga da o ɲi Haasi yi,
a ro kapa o yi fuuren ŋa o daga Mitileena yi.
15 Ken yillakara,
o da fuuren wutu non ŋa nan daga ma Xiiyu jonkonmen ŋa.
A bitafilla o kiɲe Saamu yi.
Bita sikkandin ŋa,
o joofe Mileeti yi.
16 Pawulu ma a xanu nan leele Haasi maran ŋa,
ken ya saabu da o ga ma bogu ti Yefeesi yi.
A xorotinten ya ni,
baawo a ɲi a mulla ya moxo su kanma i na Fateyifanon sallen ya gemundi Yerusalaamu yi.
[Pawulu saraye Yefeesinko yi]
17 Pawulu da du toxo Mileeti yi na faaren xayi isanjaman xirisu be gaa Yefeesi yi nan ti i nan ri.
18 I ga ri,
Pawulu ti i da :
« Gelli koota fana be in ga ri Haasi maran ŋa,
in do axa ga ɲa doome moxo be,
axa wa a tu.
19 Yehuudiyanun da tooran danben su saxu in ŋa,
n da a su muɲi.
N ma Kamanen golle do dunderaaxun dabari.
20 Fo wo fo gaa axa nafana,
n da a su ko axa da duna su taanun kanma,
n ma mungu do hari baane yi,
na a ko axa da axa kaanun noxon ŋa,
na a xaranŋundi axa yi.
21 N da Yehuudiyan do xabiilan tanan su gangu ti i na du rasaaga katta Alla yi,
i nan saxu Kamane Isa yi.
22 Saasa ke,
n wa dagana Yerusalaamu yi.
Alla Fanka Sennen ya n da in ɲaamari dagana.
N nta in moxo tu non ŋa.
23 Ganta,
n ga daga debe su yi,
Fanka Sennen wa a koono in da nan ti in wa toorene nan ro kason ŋa.
24 N yonkin nan toxo a yi yinme ke.
Fi be hanmin gaa in ŋa,
ken ni na faarannaaxu ke ya tinmandi.
Kamane Isa ga da in ɲaamari fo wo fo yi,
na a su tinmandi,
ken ga ni nan seede ti Xibaari Liŋen ŋa,
ken ga ni Alla horoman ŋa,
a be ga ni fo xooren ŋa.
25 « Saasa ke,
lenki ga na dangi,
n wa a tu nan ti axa du baananbe su ntaxa inke walla,
n ga kiɲe axa be yi,
na Allantunkaaxun fin ko axa da.
26 Ken ya n sigi in gaa a xurandini axa danŋa lenki nan ti sere su ga na sanku keeta,
a jalagi nta in ŋa.
27 Baawo Alla ga da fo wo fo rakutu,
n da a su ko axa da ;
n ma mungu do hari baane yi.
28 Xa da axa kiilun toxo axa yinme yi ;
xa na axa kiilun toxo Fanka Sennen ga da axa ɲa jaxo ku be nagaanaano yi.
Xa da axa kiilun toxo Alla jaman ŋa,
a ga da i foren joxi do jama ke be batte,
kuudo na i kisi.
29 N daga falle,
n wa a tu nan ti seron yogonu wa roono jama ke noxon ŋa xoyi laxaburen gaa roono sugun jaman noxon ŋa moxo ke be.
30 Sero wa kiteene axakun yinmenu noxo ke yi,
i gaa gaaren gaben koono kuudo isanxaranlenmon na sukke do i ya.
31 Xa da axa du koroosi de !
Siino sikki,
n gaa axa baananbe su xaranŋundini wuron do kiye ma in ga wu.
Axa na sinme do ken ŋa.
32 « Keeta ke,
n da axa xaliifa Alla do i horoman digaamun ŋa,
senben gaa digaamu ku be yi,
i ra gaa axa sabatindini,
na xunbane kaanetaaxaaden dabari seri sugandinten su da.
33 Axa yinmenu wa a tu nan ti n ma lafi xaalisi do kanŋe yi ;
n ma lafi rondindiyiraame yi.
34 N golliɲa ti in senben do in futten ya yi na du birandi.
Sero beenu gaa do in ŋa,
na i xa birandi do du yi.
35 Abada in na a koyini axa yi ya nan ti axa nan golli kundu ya yi na misikiinun deema.
Axa na sinme do Kamane Isa yinme ke sefe xa yi a ga ti :
“ Wulluliŋontaaxun ni kitte be gaa kanmun ya yi diinanta kitte be gaa wureedun ŋa.
” »