Bataaxe katta
Roomunko
[Bataaxen roraqe]
[Kuuɲinden do duwanŋe]
1
Ke bataaxe wa gilli inke Pawulu yi, Isa Alimasiiwu xidimaana. Alla da in duranxiri ya, n nan ɲa faare yi, na in sugandi, kuudo na Alla Xibaari Liŋen gangu. 2 Ken ni Xibaari Liŋe ke be Alla ga da a laayidun wutu Safandi Sennun noxon ŋa ti i annabinyinmun senequn ŋa ya nan xaso. 3 Ken Xibaari Liŋe na do a renmen ya yi, ken renme ga bange fateganke yi bakka tunka Daawuda fonlaqen ŋa. 4 Xa a allanlenmaaxun bange ti senben ŋa, na a sababun ɲa a wundiyen ŋa bakka furun naxa ti Fanka Sennen ŋa. O kaman Isa Alimasiiwu ya ni ken ŋa. 5 Nke da neeman kita ti a ya yi nan ɲa faare yi, kuudo na xabiila tananun kanda katta danqanaaxun killen batiyen ŋa a toxon darontaaxun da. 6 Axakun xa duranxiri ya kuudo axa n ɲa Isa Alimasiiwu foyaaxun ŋa ; axa xa kapa kun xabiilanu ya yi. 7 Axakun beenu su ga ni Alla xananun ŋa Roomu yi, axa ga sugandi nan ɲa seri sennu yi ti Alla gangunden ŋa, bataaxe ke na katta axa su ya yi : O faaba Alla, do o kama Isa Alimasiiwu neeman do i xeerin gan na ɲa axa kanma.[Allanɲaageye]
8 N na joŋa in Alla tiigana axa su kafumanton danŋa ti Isa Alimasiiwu yi, baawo axa liimaanagankaaxun xibaaren wa koniini do duna noqun su yi. 9 N na Alla batta ti in yonkin su yi ti a renmen Xibaari Liŋen gangunden ya yi. Alla ya ni in seedan ŋa, axa toxonun ya na in raqen ŋa bire su yi allanɲaageyen noxon ŋa. 10 N wa Alla ɲaagana bire su xa yi, kuudo in nan katu dagana axa noqun ŋa keeta Alla duŋeyen kanma. 11 Na a toxo ti axa wariyen nan liŋa in da moxosiri, kuudo na Fanka Sennen kuye yogo kiɲandi axa yi, ma sa axa liimaanagankaaxun na xalasi. 12 Ma walla xa o na me buttun xotondi non ŋa, ti liimaanagankaaxu ke be ga da inke do axakun kafu. 13 N waaxinu, n nta a mulla na a toxo axa da sankon ŋa, nan ti in da axa noqun dagayen ŋanniya ta gabe ya yi, ma in dageyen wa saarene ti isanjaman jiidiyen ŋa axa noqu, xoyi xabiila kuttu ku moxon ŋa. Xa hari sa in ma katu telle. 14 Gereesinkon do yinmanbinnen su tanbon ya na in ŋa, a do haqilanten do haqilanloxe : n nan xawa Xibaari Liŋen gangunu do a su ya yi. 15 Ken ya saabu da ni axakun be gaa Roomu yi, n gaa a mulla moxosiri na Xibaari Liŋen gangu axa xa noqu.
[Baariye ti liimaanagankaaxun ŋa]
16 Baawo in nta yaaguntaaxunu ti Xibaari Liŋe ke yi, na a toxo ti Alla senben ya ni, sere su ga na danqanaaxu ti ke Xibaari Liŋe yi, na a wutu Yehuudiyan ŋa fina, nan daga a wara xabiila tanan ŋa, a kaman wa kisiini. 17 Baawo baarintaaxu Alla jon me naxa, ken bangeene ti Xibaari Liŋe ke ya yi, a sababun ni liimaanagankaaxun baane ya yi, liimaanagankaaxun do fo tana fe. A wa Safandi Sennun ŋa ke moxo yi nan ti : « Seri baarinten bireene ti liimaanagankaaxun ya yi.* »
[O junuubuntaaxu Alla jon me naxa]
[Haadamarenmun fallakoyiye Alla yi]
18 Alla butten yanganxatan bangeene gilli kanmun ŋa seron allankannanbalaaxun do i teleŋontanbalaaxun su ya xanne maxa, ku beenu gaa tonŋun kasono gaaren da ti i teleŋontanbalaaxun ŋa. 19 Baawo sere ra gaa ke be tuunu Alla yi, ken banganten ni ikun da, baawo Alla yinme ya n da ken bangandi i da. 20 Na a toxo ti gelli duna gaa tageene, a tinmantaaxu ke be gaa biten ŋa, ken ga ni a yinme jaatin do senbe duumante ke, haqile gaa sere be yi, an wa a walla ti a ɲangollun ŋa. Ken kuŋa yanpeye nta ɲaana kun sero maxa, 21 na a toxo ti i wa Alla tu, i nta darontaaxun saagana a yi, i nta a tiigana xa. Xa i sinmeyun du ya n bonno, i sondon burun na bita. 22 Ikun wa a sinmana nan ti fontuwaanon ya ni i ya, ken ya n da i tallan ɲa fontuwanbalinun ŋa. 23 Alla ke be ga ni abadanŋalinten ŋa, i wa darontaaxun fuŋono ken ŋa, na seransawuron ya batu, ku beenu fiinun ga nta lagarini, kun do yeliŋun do tannaxatonun sawuro, a do gonxiilo.
24 Ken ya n sigi Alla gaa i toqo sobintaaxun noxon ŋa yonkiliŋun maxa, i yinmenu duurun gaa me faton sobindini. 25 I wa Alla tonŋun faraaxunu gaaren ŋa, nan golli tagefon da, na a batu. I na tagandaanan toxo no, xeerin gaa ke be maxa ma abada. Anmiina.
26 Ken saabu da, Alla da i toxo yonkiliŋun yaagun maxa : i yaxarun da i taben wara, i do i me yaxaru ya n saqa. 27 Yugun xa na ken moxo ya yi : i da yaxarun saqanlenmaaxun toxo no, i duurun nan jaarabi do me batten ŋa. I yinme yugu duuru da yaagufiinun ya dabari, i da i sankuntaaxun muson yinme ya kita.
28 Xoyi na Alla tu, ikun ga ma ken raga fi soobe yi, Alla da i toxo i haqilibonontaaxu ke maxa : ken ya ni i gaa fon ɲaana ke be ga nta xawa. 29 Jikku buren danben su wa i ya : ɲunguntaaxu, buroye, taamaxiyen do haasidaaxu, serikallen do gajanŋe, janbeyen do fooburuɲanŋe, xajafinden 30 do maxansefende, allanxonnaaxun do battaranseraaxu, kaawaduntaaxun do dukoyintaaxu, ŋanniyiburugumaaxu, a do xatantaaxu. 31 Tuwanbalinu, laayidu nta i ya, i nta hinnene, sondonkaawanto. 32 Na a ɲi i wa Alla kiiti teleŋonten tu, nan ti i be nda ku fiinu ɲa, an kalla ya. Xa ken do i fi su, i nta fateene i ɲanŋen ŋa, ken baane fe de : ku beenu xa gaa i ɲaana, i wa kun xa toŋondini.