Roomunko 2

[Alla kiite]

Ayiwa an ga ɲa serandanbe su yi, anken gaa seron ya jalagini, yanpeye nta ɲaana an maxa. Nan toxo seron jalagini, an na an yinme ya jalagini. Na a toxo ti anken be gaa jalagindini an yinme wa kun me dabarini. 2 O wa a tu nan ti ku beenu gaa ku fiinu kundu ɲaana, Alla na i kiitini ti tonŋun ya yi. 3 Sero be gaa ku fiinu dabarini, an wa i jalagini, anken yinme xa wa i me dabarini. An wa a sinmana nan ti, an kisiini Alla kiitinden ŋa ya ba ? 4 Yaala an na a fonnansiraaxu xooren do a muɲun do a sabariyen ya yeebe-yeebene ba ? Ma anken ma a tu nan ti Alla ke fonnansiraaxu ra wa an geesunu katta durasaageyen ŋa ya ? 5 An bara durasaageyen ŋa ti an kiiluranxotaaxun do an xandunxotaaxun ya yi. Ken kuŋa an na a kanma na yanganxatan konpen ya taga an yinme xanne maxa Alla butten yanganxatan do a kiiti teleŋonten bange koota.

6 A wa be su tugana ti i ɲangollen ŋa. 7 Bireyi duumanten wa seron ya da, ku beenu gaa i duruxotono fiisiriɲanŋen ŋa, na nooron do darontaaxun do ŋalintaaxun muuru. 8 Xa yanganxatan butuyi xoten wa seron da, ku beenu ga ni sagoɲanŋaanon ŋa, i nta tonŋun batta, i batini do teleŋontanbalaaxun du ya yi. 9 Yanganxatan do tooran wa fiiburiɲanŋaanan su da, na a wutu Yehuudiyan ŋa, nan daga a wara xabiila tanan ŋa. 10 Nooron do darontaaxun do xeerin wa fiisiriɲaŋaanan xa su da, ken ga ɲa sere su yi, na a wutu Yehuudiyan ŋa, nan daga a wara xabiila tanan ŋa. 11 Baawo fasanŋuntaaxu nta Alla noqu.

12 Fo wo fo ga da junuubu ɲa tuwaaxun kanma ga fe, an yanganxateene ya xa Muusa Sariyan kanma ga fe. Fo wo fo ga da junuubu ɲa sariya ke tuwaaxun kanma, an kiitini sariyan ya kanma. 13 Baawo a feti xo nan ti sariya ke terinkaanon ya baarinton ni Alla jon me naxa, ken fe. Ku beenu gaa gollini ti a yi, kun ya n jaate baarinto yi. 14 Ayiwa xabiilan tananu ku be ga nta Muusa Sariyan tu, xa i gaa sariya ke gollun ɲaana ti i du yi kundun ŋa, ken ŋa i yinmenu da sariya tigi i du da, na a ɲi Muusa Sariya ke nta i maxa. 15 Kun da a koyi ya nan ti sariyan ga da ke be xanu, ken safanten ya na i sondomun ŋa. I yinmenu yonkinun wa seedene ti ken ŋa. I sinmeyun wa i jalagini waxatinu, na i faasa waxatinu. 16 Ken su ya n bangeene koota yogo, xoyi in waajunden gaa a koono moxo be : Alla wa seron fi muxunton kiitini ti Isa kitten ŋa.

[Yehuudiyanun do Annabi Muusa Sariya]

17 Xa ganta Yehuudiyantoxon ya gaa an ŋa ; an tuuganten na Muusa Sariyan ya yi, an wa fateduwasene ti an Alla yi. 18 An wa Alla liŋun tu, an da sariyan xara, an wa fi siren tu bakka fi buren ŋa. 19 An yinme saxunten wa a yi nan ti finkinton kandandaanan ŋa ; ku be gaa biten ŋa, an ɲaŋi i da xureyen ŋa, 20 samunton jikkundaanan ya ni an ŋa, leminaanun xaranmoxon ya ni an ŋa. Ke su ni ya tuwaaxun haxiixan do a tonŋun gaa an maxa sariya ke noxo. 21 Ayiwa saado an gaa tini an wa tanan xaranŋundini, iyo an nta an yinme xaranŋundini fina ? An wa waajundini ti fayiye n maxa ɲa ; anken yinme xa gaa fayini ? 22 An wa jeeniyen kabana ; anken yinme xa gaa jeenini ? An wa ɲeqe munubatten ŋa, an xa gaa yillene fayini munubatikaanun ŋa xadi ? 23 An wa du koono ti Muusa Sariyan ŋa ; an xa gaa yillene ken sariya baananne kutana xadi, na Alla roxo ? 24 A na ŋa kundu yinme ya yi nan ti : « Alla toxon bono ti axa sababun ya yi xabiila kuttun maxa ».

25 Selli an gaa sariyan batta, nafan wa sunnanden ŋa an da, sikka yinme nta ken ŋa. Xa selli an gaa sariyan kutana ya, xiima nta sunnantaaxun ŋa anken da diinanta sunnantanbalaaxun ŋa keeta de. 26 Selli sunnantanbalin ga na sariyan killun tanga kuŋa, a sunnantanbalaaxu ke nta jaatene xo sunnantaaxun ya yi sa ? 27 Anken Yehuudiya be sariyan do sunnanden gaa an maxa, an gaa sariyan kutana ken su kanma, ke be ga feti Yehuudiya yi, a suufun ga ma kuti, aken gaa sariyan maxafakka, a na an jalagini ya de ! 28 Baawo Yehuudiyaaxun feti ke be gaa wariini ; sunnanden feti taagumanse ke be xa gaa wariini faten ŋa. 29 Xa sondomen sunneyen be ga nta wariini de, ken ya ni Yehuudiyaaxun ŋa. Ken gilli ya yi. Sariya safante ke fe mene ! Ken kaman ya ni seren ŋa, a tiiganden gaa gilli Alla yi, xa a nta gilli seron ŋa.