Isa Alimasiiwu faarun
Ɲangollu
Roraqe
Seron kisinden feera be rakutunten gaa Alla maxa, Isa ga da ken xaliifa sero be yi, Linjiili da kun ya xiri « Faaru ». Faarun Ɲangollun kitaaben wa sefene Isa xaranlenmon yogo gollun kanma, kun ga ni xo Piyeeri do Pawulu. Ken ya ni, ke kitaabe ga ma xotoye ro faarun xibaaren kanma. Xa feera be ga ɲi Alla maxa, ken gaa tinmeene ti Isa xaranlenmon biremoxon ŋa, a xoto ken ya kanma. Isanxaranlenmon kitaabi sennun su yi, xawaara nta ke kitaabe yi. Batijama fanan ga ɲi moxo be Isa wundi falle, a baane ya n sefe ken kanma.
Luka da kitaabu filli ya safa Laayidu Kurunban noxon ŋa : Luka Linjiili, kafiini ke yi. Luka ni Pawulu teranlenman ya yi, jaarandaanan xa ya ni. Pawulu da terendu yogo dabari, a gaa xirindini. A do Luka daga doome kun terendu yogo yi. An wa kun walla ke kitaabe noxon ŋa (soora 16 ; 20-21 ; 27-28). Saado a gaa ku kitaabu safana, a da muurundi gabe dabari Isa biremoxon kanma, ken do Xibaari Liŋen sanqinde na a wutu Yerusalaamu nan daga a wara Roomu yi, ken ɲa katta 62 siine Isa bangeyen falle. A hanmin ɲi na Isa biremoxon tinmanten ya laxami, xoyi Linjiili kitaabu ku safandaanon su ga da i laxami moxo be.
Ke kitaabe aayi fanan wa a do a kitaabi fana ke tokkini me yi, a wa ke kitaabe xa safemaanan koono :
Tuufulo, Isa Alimasiiwu ga da fo wo fo ɲa, a do a ga da fo wo fo xaranŋundi, gelli a fi ke joŋaaru, nan daga a wara ma a segekoota, n da a su ko in kitaabi fana ke noxon ŋa. Ganta, saado a gaa segene, a da sero ya sugandi na i ɲa faaru yi, na i xaranŋundi golle ke dabarimoxon ŋa ti Alla Fanka Sennen senben ŋa.
Isa Alimasiiwu ti i faarun da : « Fanka Sennen ga na yanqa axa kanma bire su, axa wa fankan kitta. Axa na ɲaŋi in da seedaano yi Yerusalaamu noxon ŋa, axa na ɲaŋi in da seedaano yi Yehuuda maran su yi, hari Somooro mara, nan daga a wara ma duna yinmen ŋa. » (1.1-2, 8).
Isa yinmotoonun gollen ni na Xibaari Liŋen ya gangu do Yerusalaamu do duna xabiilanun su yi. Sigira be gaa Alla Fanka Sennen ŋa ken gollen noxo, ke kitaabe na ken sigira ya koyini.
Faarun Ɲangollun kitaaben ra wa taxandini taxandu karagi, kun ga ni :
1) Faarannaaxun moxosironde (soora \xt 1),
2) Faarun seedeye ti Isa Alimasiiwu yi Yerusalaamu yi (\xt 2.1-8.3),
3) Xibaari Liŋen kiɲande Yehuuda maran do Somooro maran ŋa (\xt 8.4-12.25),
4) Sawulu dagaye faarannaaxun ŋa (\xt 13.1-21.16),
5) Pawulu kasorankaaxu Kesaariye do Yerusalaamu do Roomu yi (\xt 21.17-28.31).