Yohanna Linjiili
Yohanna Linjiili roraqe
« Taagumansun ɲeri kitaabe »
Yohanna yinme ya n da ke kitaabe safa, Isa faarun du baananbe ya ni. A ɲi kapa a faari tinkun xa ya yi. I ga da Isa genge do sallibinsollen ŋa koota be, Isa da i ma Mariyaamu xaliifa ken Yohanna ya yi.
Ke kitaabe safe katta kame siina fanan lagaren ya yi Isa bangeyen falle. Yohanna ɲa Yefeesi debidunkon isanjaman yinmanken ŋa, non ya ni Turuki yi lenki. A nan xawa o jikki siren maxa ke kitaabe ga safe Yefeesi ya yi.
Ke Linjiili maana yogo ni seedaaxun ya yi. Isa wa a xurandini i ga ni ke be yi, xa Yohanna wa fo gabu tana koono, kun gaa a koyiini Isa ga ni ke be yi :
- Annabinyin fanon sefe a xibaaren kanma Tawureeta do Jabuuri noxon ŋa (\xt 1.45 ; 5.39).
- Annabi Yahaya gaa wanqindini, a da Isa fin ko (\xt 1.29-34).
- Alla yinme da Isa fin ko Yahaya da saado a gaa wanqinden jopana (\xt 1.32).
- Isa yinme ga da taagumansi xooro be dabari, kun xa wa seedene a da (\xt 10.24-25).
Isa wundiyen falle, a xaranlen gabe seede nan ti i da a wari birantaaxun ŋa (soora 20-21). Yohanna yinme da i seedaaxun kafu ken ŋa (19.35 ; 21.24-25). A hanmin ɲi na Isa biremoxon tinmanten ya laxami, xoyi Linjiili kitaabu ku safandaanon su ga da a laxami moxo be.
Ke kitaabe safemaanan wa koniini nan xura soora \xt 20.30-31 :
Isa da taagumansi gabe tana dabari i xaranlenmon jon ŋa, xa kun ma safe ke kitaabe noxon ŋa. Xa ku be ga safe kundu, ken ni ya axa na saxu a yi nan ti Isa ni Kisindaana ke ya yi, Allanlenmen xa ya ni, axa ga na saxu a yi, axa wa bireyen kitta ti a toxon ŋa.
Yohanna Linjiili ra wa taxandini taxandu tunmi, kun ga ni :
1) Joŋaaru : Alla Daale (\xt 1.1-18),
2) Isa gollen jopaadu (\xt 1.19-51),
3) Isa golle jaman ŋa, a do taagumansi xooron ɲeri (soora \xt 2-12),
4) Isa do i xaranlenmon duransefanlenmaaxulagare (soora \xt 13-17),
5) Isa koyi lagare : a rageye, a kiitiyen do a gengende do sallibinsollen ŋa (soora \xt 18-19),
6) Isa wundiyen do a dukoyiye (soora \xt 20-21).
Isa ga da taagumansi xooro be dabari, taxandi sikkande ke sefene kun ya kanma. Ken saabu da, i wa tini a da : « taagumansun ɲeri kitaabe ».