[Isa Alimasiiwu kiitiye ti kallen ŋa]
19
Pilaati ti i na Isa Alimasiiwu katu ti jaanen ŋa kuŋa.
2 Sorodaasinun da saasinkufune yogo tulu na a ro a dellen ŋa,
na tunkandoroke yogo xa rondi a yi.
3 Ken falle,
i daga sigi a jon ŋa nan ti :
« Yehuudiyanun tunkanyugo,
an kuuɲinden faayi !
» I wa sanpon roono a yi.
4 Pilaati saage bakka katta jaman ŋa nan ti i da :
« Ayiwa,
a faayi !
N do a bogu katta axa yi sellan ŋa,
axa na a tu nan ti inke ma kara maana su kita ke yugo yi. »
5 Isa bogu sellan ŋa,
saasinkufunen gaa a yinmen ŋa,
tunkandoroken wa rondini a yi.
Pilaati ti i da :
« Sere ke faayi ! »
6 Sadaxakiɲandaananyinmankon do Allanbatikaxooren tangandaanon ga da a wari,
i toxo xaarunu nan ti :
« A genge do sallibinsollen ŋa !
A genge !
» Pilaati da a yonto katta i ya nan ti :
« Axa yinmenu na a raga axa na a genge.
Nke ken ma kara maana su kita a yi. »
7 Yehuudiyanun xirisun ti :
« Oku ba ?
Sariyan wa oku maxa a ga n xawa kalla,
na a sababun ɲa a ga ti Allanlenmen ya ni ike yi. »
8 Ku sefo mukken da Pilaati tallan kanundi.
9 A saage katta i kan ŋa na Isa tirindi ti :
« Minnanke ni an ŋa ?
» Xa Isa ma a jaabi.
10 Pilaati ti a da kuŋa :
« An balla sefene inke ya danŋa ?
An nta a tu nan ti seyen wa in maxa in ra gaa an walla,
xoyi seyen gaa in maxa in ra gaa an gengene moxo be ? »
11 Isa ti a da :
« An ra nta fo wo fo su ɲaana inke yi,
ke be ga ma giri kanmudunken ya yi.
Ken ya ni,
ku be ga da in ro an kitten ŋa,
i ga n fuŋu an ŋa junuubu yi. »
12 Gelli ke,
Pilaati wa feera muurunu ma i na katu a walla.
Xa Yehuudiyanun xirisun da fo tallan kafu i xaaruyen ŋa nan ti :
« An ga na ke yugo wara,
ken wa a koyini ti Kesaari xana feti an ŋa.
Sere be ga da du ɲa tunkanyugo yi,
a da Kesaari ya gaja. »
13 Pilaati ga da ku sefo mugu,
a do Isa bogu sellan ŋa,
a taaxu i kiitikutitaaxaaden kanma noqu yogo yi,
i gaa non xilli « Gidinlafanbanballe ».
Habaraaninxannen ŋa,
i ti :
« Gabbata ».
14 Ken gemu Pesaxansallen moxosironden koota ya yi kinsigan bire.
Pilaati ti Yehuudiyanun da :
« Axa tunkanyugon faayi ! »
15 Ken do i fi su,
i wa xaarunu nan ti :
« A nan kara !
A nan kara !
A genge !
» Pilaati ti :
« Axa tunkanyugon ya ni,
n nan xawa ken gengene ?
» Sadaxakiɲandaananyinmankon ti :
« Tunkanyugo tana nta oku maxa Kesaari falle. »
16 Pilaati bogu i do Isa naxan ŋa kuŋa,
i na a genge.
[Isa gengeye]
I da Isa xooro kuŋa.
17 I do a bogu deben ŋa,
a sallibinsollen wa a yinme kunkun kanma,
katta i gaa noqu ke be xilli « Yinkollanxotten dingira » ;
habaraaninxannen ŋa,
i ti :
« Gologoota ».
18 I da a genge kafiini sero filli tana yi non ya yi.
I da i sallibinsollun sigindi a kaara su yi,
Isa wa i naxa.
19 Pilaati da ɲaamariyen kini ti i na wallaha yogo safa i na a genge do sallibinsolle ke yi a kanma nan ti :
« Isa Nasaaranke,
Yehuudiyanun tunkanyugo. »
20 I ga da Isa genge noqu ke be,
a do deben nan tinka.
Ken saabu da,
Yehuuda gabe da a xara.
Safande ke ni habaraaninxannen do roomunxannen do gerekinxannen su ya yi.
21 Sadaxakiɲandaananyinmankon ti Pilaati da :
« Nan ti “ Yehuudiyanun tunkanyugo ”,
ken ma xawa roono a yi.
A nan safe ti :
“ Ke yugo yinme ya n ti :
‘ Nke ni Yehuudiyanun tunkanyugon ya yi.
’ ” »
22 Pilaati da i jaabi nan ti :
« Nke ga da ke be safa,
ken ya n toqo a yi. »
23 Sorodaasinun ga da Isa genge bire be,
i da a yiraamun taxandi dunŋu naxati,
sere su dunŋe.
A doroken baane ya muuman nan toxo,
ken ɲi kiri baanen ya yi gelli kanmu ma wureedu.
24 Sorodaasinun ti me da :
« O nan maxa a booxo de ;
o na sokkun wutu a kanma,
sere be ga na a kita.
» Safandi Sennun ke sefe tinme kundu ya yi,
i ga ti :
« I da in yiraamun taxandi i naxa,
i da sokkun wutu in doroken ŋa.
»*
Sorodaasinun da ken yinme ya dabari.
25 Isa ma do i waaxiyaxaren do Koloopa yaqe Maariya,
kafiini Maariya Magadalanke,
i wa sikki Isa sallibinsollen kaaran ŋa.
26 Isa yaaxen wa i ma do i xaranlenxanan ŋa,
i gaa sikki.
A ti i ma da :
« N ma,
an renmen faayi. »
27 A ti xaranlenma ke xa da :
« An ma faayi.
» Gelli ken koota,
xaranlenma ke da Isa ma kiɲa du yi i kan ŋa.
[Isa faatiye]
28 Isa ga da a tu ti fiinun su tinme keeta,
a ti :
« Daqun wa in ŋa.
» A da ke ko ya kuudo Safandi Sennun sefon ya na tinme*.
29 Selebenŋen ɲi ken noqu,
a fakkan ga ni binegaran ŋa.
I da yiranxasen deebi a yi,
na a fana do tulunbannen sollen ŋa,
na a wutu katta Isa raqen ŋa.
30 A ga da a temu,
a ti :
« A su tinme keeta.
» A da i dellen yuurandi na i yonkin kini Alla yi.
31 Xoyi ken gaa genme Tuumayinkootan moxosironden ŋa,
Yehuudiyanun xirisun nta a mulla furun nan toxo sallibinsollen kanma ke koota yi,
baawo ke ni Tuumayinkoota xoore¤ ya yi.
I daga katta Pilaati yi na a muuru a maxa i na seri gengenton taanun xoso i na i furun yanqandi bakka sallibinsollun ŋa.
32 Sorodaasinun ri kuŋa na yugu fanan taanun xoso,
na fillanden xa taanun xoso.
33 I ga kiɲe Isa yi,
i da a tu nan ti a kara,
i maxa aken taanun xoso.
34 Ganta sorodaasinu ku du baananbe da i tanmen sooti a kaaran ŋa,
a ga da tanmen fuutu bakka,
foren do jin bogu.
35 Sere ke be ga da ku fiinu ko,
a da i wari ti i yaaxen ya yi,
a ga seede ti ke be yi,
tonŋun ya ni.
A yinme wa a tu ti i da tonŋun ya ko kuudo axa na toŋondi.
36 Ke su ɲa ya kuudo Safandi Sennun ga da ke be ko,
a na tinme,
ken ga ni :
« Xotte su nta xoseene a da. »*
37 A safe Safandi Sennun noqu tana xa yi nan ti :
« I yinmenu ga da ke be sufa,
i wa riini a wari ti i yaaxon ŋa. »*
[Isa firinde]
38 Ku fiinu falle,
Yuusufu,
ken ga ni Harimaatanke yi,
a daga a muuru Pilaati maxa,
i na Isa furen wutu.
A xa ni Isa xaranlenman ya yi,
xa a bangante fe,
baawo a wa kanna Yehuudiyanun xirisun ŋa.
Pilaati duŋe,
Yuusufu daga Isa furen wutu.
39 Nikodeemu,
ke be ga demu telle katta Isa yi wuron ŋa,*
a xa do timiliŋu yogo ri,
kanbare do fo be gaa xilli :
« alowe », i ɲaxaminten tanjikke kilo.
40 I sero filli da Isa furen wutu na a kasanka,
na timiliŋun ro a yi,
xo Yehuudiyanun gaa i furen dabarini moxo be.
41 I ga da Isa genge noqu ke be,
naaxo yogo ɲi a kaaran ŋa,
xabura yogo ɲi naaxo ke noxo,
sere ma demu buliini a yi abada.
42 Xoyi ken koota lellen ga gemu Yehuudiyanun Tuumayinkootan moxosironden ya yi,
i da Isa ro ken ŋa,
baawo a ya tinken ni.