[Isa Alimasiiwu sikke Pilaati jon ŋa]
15
Gelli suxuba fana,
sadaxakiɲandaananyinmankon do xirisun do sariyanxaranmoxonun da me ɲi,
kafiini Kiitikutaanon sapan su yi.
I da Isa Alimasiiwu yetu nan daga a kini Pilaati yi.
2 Pilaati da a tirindi nan ti :
« Yehuudiyanun tunkanyugon ni an ya yi ba ?
» Isa ti a da :
« An ga da a ko. »
3 Sadaxakiɲandaananyinmankon da jalagindi gabe taŋandi a yi.
4 Pilaati saage a tirindini xadi nan ti :
« An nta sefene,
ma an taron nta a yi ya ga ni i gaa ke su roono an kanma ? »
5 Xa ke su,
Isa bara sefene ma Pilaati ken yinme nan lasame.
[Isa do Baraaba]
6 Pesaxansalle su ga na kiɲe,
kasoranke be waranden ga n liŋa jaman da,
Pilaati wa a walla.
7 Ken da a ɲi yugo yogo wa kason ŋa a toxon ga ni Baraaba,
a ya do i kapanlenmon nan muruti katta Roomunkon ŋa ma i na sere yogo kari.
8 Jaman ri katta Pilaati yi nan ti a ga demu ke be ɲaana i da,
a na a me ɲa.
9 Pilaati ti i da :
« Axa wa a mulla in na “ Yehuudiyanun Tunkanyugon ” wara axa da ba ? »
10 Na a tugu ti a da a faamu nan ti sadaxakiɲandaananyinmankon da a haasidaaxu ya tan.
11 Sadaxakiɲandaananyinmankon da jaman ɲonqi nan ti i nan ti a na Baraaba ya wara.
12 Pilaati ga da sefen wutu xadi,
a ti i da :
« Axa gaa ke be xilli “ Yehuudiyanun Tunkanyugo ”,
axa na a mulla in na manne ɲa ken ŋa ? »
13 Jaman su xaaru nan ti :
« A genge do sallibinsollen ŋa ! »
14 Pilaati da jaman tirindi ti :
« A da manne golli bure ken baane ɲa de ?
» I tallan xaaru nan ti :
« A genge ! »
15 Pilaati wa a mulla na jaman liŋun dabari,
a da Baraaba wara,
xa a da katundaanon wara Isa yi.
Ken falle a bogu i do a naxan ŋa i na a genge.
[Sorodaasinun soyiye Isa yi]
16 Sorodaasinun do Isa daga buuru ka xooren noxon ŋa,
na i jaman kutten su xiri.
17 I da tunkandoroke yogo rondi a yi,
na saasinkufune yogo tulu na a ro a dellen ŋa kuudo nan soyi a yi.
18 I xenu a kuuɲinden ŋa nan ti :
« Yehuudiyanun tunkanyugo,
an kuuɲinden faayi ! »
19 I wa a katta i dellen ŋa ti guman ŋa,
nan tufa a yi,
nan tusi na i taŋon ro ɲiiɲen ŋa a jon ŋa.
20 I ga soyi a yi nan tanpi,
i da tunkandoroke ke bagandi a yi,
na a yinme yiraamun ro a yi.
Ken falle,
i da a bagandi na a genge do sallibinsollen ŋa.
[Isa gengende do sallibinsollen ŋa]
21 Kireenenka yugo yogo,
a toxon ga Simoona,
Lekandooro do Ruufu faaba ya ni,
a girinten gaa gunnen ŋa,
sorodaasinun da Isa sallibinsollen senbentan tiŋandi a yi.
22 I do Isa daga i gaa noqu ke be xilli « Gologoota »,
ken wure ga ni « Yinkollanxotten dingira ».
23 I da kanbare yogo kafu reesendolon ŋa,
kuudo Isa na a mini,
xa a bara a yi.
24 I da Isa genge na sokkun wutu na a yiraamun taxandi,
sere su ga n xawa fo be kitta.
25 I da a genge beeteyen biren ya yi.
26 I da a karayinmen safa wallaha yogo yi a kanma nan ti :
« Ke ni Yehuudiyanun tunkanyugon ya yi. »
27 I da fayaano filli genge Isa kaaran ŋa,
baanen wa a tayen ŋa,
baanen wa a noogen ŋa. {
28 ¤}
29 Killidundangaanon xa wa i yinmun yonkono na Isa ka nan ti :
« Eeyi !
Anken ya ma ti an ra wa Allanbatikaxoore ke gurujana nan yille a tagana bito sikki noxo ?
30 Du kisi kuŋa !
Yanqa bakka sallibinsollen ŋa ke ! »
31 Ken moxo baane ya ni,
sadaxakiɲandaananyinmankon do sariyanxaranmoxonun xa gaa soyini a yi,
nan ti me da :
« A da seron kun kisi mene,
xa a ma katu i yinme ken kisini de.
32 Kisindaanan ya ga ni,
Banisirayila tunkanyugo,
a n yanqa bakka sallibinsollen ŋa kuŋa o na saxu a yi !
» A do hari ku be gengenton gaa me kaaran ŋa,
kun xa na a kaana ya.
[Isa kalle]
33 Kinsigan ŋa,
jamaanen su bita ma sallifanan do laxasaran naxa.
34 Ken waxati,
Isa ferenpenti nan ti :
« Eli,
Eli,
lema sebaxitani ?
» Ken wure ga ni :
« N Alla,
n Alla,
manne ni an ga da in sedi ? »
35 Sero yogonu da ken mugu i ti :
« A faayi annabi Hiliyaasu ya xilli kundu de ! »
36 Yogo wurunten daga yiranxasen deebi binegaran* ŋa nan ri a ro sollen ŋa na a wutu katta a yi ti a nan mini,
nan ti :
« Dugu o na a faayi ma Hiliyaasu wa riini a yanqandi. »
37 Xa Isa ga ferenpenti,
a faati.
38 Ken sigira,
yirankutaade be gaa Allanbatikaxooren ŋa,
a booxe kiru filli gelli kanmu ma wureedu.
39 Sorodaasinxirise be gaa sikki Isa jon ŋa,
a ga da a karamoxon wari,
a ti :
« Tonŋun-tonŋu,
ke yugo ni Allanlenme ke ya yi. »
40-41 Yaxaru yogo xa ɲi do Isa yi i gaa a deemana gelli a gaa Galiile yi bire be,
kun ga ni Maariya Magadalanke do Yaaxuba tugunnen do Yuusa ma Maariya,
a do Saalumu.
Yaxarin gabu tana xa sege do a batten ŋa Yerusalaamu yi.
I su sigi laatoyen ŋa kuŋa,
i gaa Isa faayini.
[Isa firinde]
42 Laxasaran falle,
ken ni tuumayinkootan moxosironden biren ya yi,
43 kiitikutaano ku seri xooron du baananbe ri,
a toxon ya ni Yuusufu.
Harimaatanken ya ni,
a ɲi Allantunkaaxu ke ya dukku.
A da i duruxoto nan ro Pilaati kan ŋa nan ti i na Isa furen kini i ya.
44-45 A da sorodaasinxirisen xiri na a tirindi selli a ga dalla nan faati.
Isa faatiyen ga jawo moxo be yi kundu,
ken kaawafin da Pilaati raga.
A da Isa furen kini Yuusufu yi kuŋa.
46 Yuusufu da kasanken xobo na Isa yanqandi na a kasanka.
A daga a ro xabura soxonte yogo yi giden ŋa,
na gidinlafan bilinbili roono a raqen ŋa.
47 Maariya Magadalanke do Yuusa ma Maariya wa a faayini a gaa a roono noqu be.