[Isa koyi lagare : a rageye, a kiitiyen do a gengende do sallibinsollen ŋa]
(18.1-19.42)
[Isa Alimasiiwu rageye]
18
Isa Alimasiiwu ga duguta ke allanɲaageye yi,
a do i xaranlenmon da Xidoroona xoolen kutu,
nan ro naaxo yogo noxon ŋa non ŋa.
2 Yehuuda,
janbante ke,
a wa non tu siri,
baawo waxati gabe,
Isa do i xaranlenmo ku ɲi riini non ŋa.
3 Sadaxakiɲandaananyinmankon do Farisigankon ga da sorodaasinu be do Allanbatikaxooren tangandaano be kini Yehuuda yi,
a ware i kaane katta naaxo ke yi.
Ɲoomon do lanpanun do gajanyokkun wa kuranlenmo ku maxa.
4 Fo wo fo su gaa katta Isa yi,
a yinme wa a tu.
A tere katta i ya nan ti i da :
« Axa na ko muurunu ? »
5 I ti a da :
« O na Isa Nasaaranke ya muurunu.
» A ti :
« Nke ya ni.
» Yehuuda ke be gaa Isa janbana,
a wa do jama ke yi.
6 Isa ga ti i danŋa baane :
« Nke ya ni »,
i fallanbogu nan ware yanqana ɲiiɲen ŋa.
7 A da i tirindi ta fillandin ŋa nan ti :
« Axa na ko muurunu ?
» I ti :
« Isa Nasaaranke. »
8 Isa ti :
« N da a ko axa da nan ti inke ya ni.
Axa ga ri inke ya muuru,
xa da kuttu ku wara i n daga. »
9 Isa ga da fo be ko ke fi ɲanŋen kaane,
a tinme kundu ya yi,
a ga ti :
« N faaba,
an ga da ku be kini in ŋa,
baane ma sanku bakka i ya. »*
10 Ken da jaraxon ɲi Simoona Piyeeri maxa,
a da a bagandi,
na sadaxakiɲandaananyinmanken komen sanpa,
na a taru tayen kutu.
Kome ke toxon ya ni Malooxi.
11 Isa ti Piyeeri da :
« An jaraxon saaga i ŋanan ŋa.
N faaba ga da xaraxan xaraxace ke be rakutu in da,
n ma xawa a minni ya ba ? »
[Isa dagaye Hanna banŋe]
12 Sorodaasinun do i yinmanke,
kafiini Allanbatikaxooren tangandaano,
i da Isa raga na a yetu.
13 I do a daga katta Hanna ya yi fina.
Kaafa ke be ga ni sadaxakiɲandaananyinmanken ŋa a siine,
a ya kallu yugo ni Hanna yi.
14 Ken Kaafa ya n ɲi ga da a ko jaman da nan ti :
« Sere baane nan kara o xabiilan danŋa,
ken ya n fasu de ! »*
[Piyeeri kuteta fana]
15 Simoona Piyeeri do xaranlenma yogo sukke do Isa yi.
Sadaxakiɲandaananyinmanke ke wa ken xaranlenma tu nan xaso.
A do Isa su ro doome sadaxakiɲandaananyinmanke ke kan ŋa.
16 Piyeeri ken toxo fonlaqen ŋa.
Xaranlenma ke saage bakka nan sefe tangandaana yaxaren da,
na Piyeeri rondi.
17 Yaxare ke ti Piyeeri da :
« Yugo ke xaranlenmon yogo ya feti an ŋa gani ?
» Piyeeri ti :
« Aayi !
Nke nta kapa i yi de ! »
18 Komon do Allanbatikaxooren tangandaanon da yinben kumu na a yoori,
i gaa taxamunu baawo,
mullen wa du yi.
Piyeeri xa daga kafu i ya nan taxamu.
[Isa sikke Sadaxakiɲandaananyinmanken jon ŋa]
19 Sadaxakiɲandaananyinmanken da Isa tirindi a xaranlenmon do a xaranŋundinden xibaaren ŋa.
20 Isa ti a da :
« N xan xooren ya n sefe duna su naxan ŋa.
Abada in xaranŋundindini allanxarankaanun do Allanbatikaxooren noxon ŋa Yehuudiyanun su jon ya yi.
N ma fo wo fo ko muqe yi.
21 An na inke tirindini manne yi ?
Ku be ga da in terinka,
kun tirindi ke.
N ga da ke be ko i da,
i wa a ken tu. »
22 A ga da ku sefo ko,
ken da tangandaana yogo ɲi sikki a kaaran ŋa,
a da a fenta nan ti :
« An na sadaxakiɲandaananyinmanken ya jaabini kundu ? »
23 Isa ti a da :
« Selli in ga da sefe bure ko,
ken sefe bure ko ke.
Selli in ga ma sefe bure ko xa,
n fentandi maana ? »
24 Hanna da a yetunten wara katta sadaxakiɲandaananyinmanken ŋa,
ken ga ni Kaafa yi.
[Piyeeri kuteta fillandin do sikkandi]
25 Ken wuce su yi,
Simoona Piyeeri ken wa taxamunu yinbinxannen ŋa.
Yogonu ti a da :
« Xoyi an xa feti yugo ke xaranlenmon du baananbe ya yi ?
» Piyeeri nakkari xadi,
a ti :
« Aayi !
Nke nta kapa i yi de ! »
26 Sadaxakiɲandaananyinmanken komon du baananbe tana ri,
ken waaxin ya ni Piyeeri ga da ke be taron kutu.
A xa ti a da :
« Tonŋu mene xoyi inke ma anken do a wari doome naaxo ke noxon ŋa ? »
27 Piyeeri nakkari xadi.
Ken noqu,
selinganman sefe.
[Isa kiitiye]
28 Ken falle,
i do Isa giri Kaafa noqu do a nan daga katta buuru ka xooren ŋa yillankaro.
Ku be do a ga daga,
ikun yinmenu ma ro ka ke yi,
i laadan senoyen tanganden saabu da,
kuudo i na katu Pesaxan ɲaaxamen yigana.
29 Pilaati bogu katta i ya sellan ŋa kuŋa na i tirindi ti :
« Axa da ke yugo raga do manne yi ? »
30 I ti a da :
« A ga n maxa fo bure ɲa,
o nta riini a kini an ŋa. »
31 Pilaati ti i da kuŋa :
« Axa do a nan daga axa yinmenu na a kiiti ti axa sariyan ŋa.
» Xa i ti a da :
« Ɲaamariye nta o maxa,
o ra gaa sere karini. »
32 Isa ga da i kara moxo be ko nan xaso,*
ken ya n tinme kundu yi.
33 Pilaati saage katta i kan ŋa na Isa sigindi nan ti a da :
« An ya ni Yehuudiyanun tunkanyugon ŋa ba ? »
34 Isa ti a da :
« An yinme ya n da ken ko,
ma seron ya n da in fin ko an danŋa ? »
35 Pilaati ti :
« Nke ni Yehuudiya ya yi ba ?
An yinme xabiilan do sadaxakiɲandaananyinmankon ya n da an ro inke kitten ŋa de.
An da manne ɲa ? »
36 Isa da a jaabi nan ti :
« Nke tunkaaxun feti ke duna tunkaaxu yi.
N tunkaaxun gan ɲi ke duna ya yi,
n sukkanlenmon ɲi fanqemoxon su dabarini kuudo in ga nta roono Yehuudiyanun xirisun kittun ŋa.
Aayi,
tonŋun ga ni ke be,
nke tunkaaxun feti ke duna yi. »
37 Pilaati ti :
« Ken kuŋa,
anke tunkanyugo ?
» Isa ti :
« An yinme da a ko ti in ni tunkanyugon ya !
N teeri ti ken ya yi,
n ri duna yi ti ken ya yi,
kuudo nan seede tonŋun da.
Sere be gaa tonŋun ŋa,
a wa in sefon terinkana. »
38 Pilaati ti a da :
« Manne ni tonŋu ?
»
Na i toxo ku sefo yi,
Pilaati bogu katta Yehuudiyanun ŋa nan ti i da :
« Nke gaa ke be tu, n ma kara maana su kita ke yugo yi.
39 Xa,
axa laadan ya ni Pesaxansalle su,
n na kasoranka baane wara axa da.
Axa wa a mulla in na “ Yehuudiyanun Tunkanyugon ” wara axa da ba ? »
40 I luuke xadi nan ti :
« Aayi !
Baraaba ya wara !
» Na a ɲi xa de,
Baraaba ni murutinte ya yi.