[Isa Alimasiiwu allanɲaageye]
17
Isa Alimasiiwu ga duguta ku sefo yi,
a da i yinmen wutu kanmun ŋa nan ti :
« N faaba,
kootan kiɲe.
An renmen nooron sanqi,
kuudo a xa na katu an nooron sanqini.
2 Baawo an da kandan ya kini a yi duna su kanma kuudo a na bireyi duumanten kini an ga da sero ku be kini a yi.
3 Na a ɲi bireyi duumanten ni :
na anken Alla ya tu baane,
Alla haxiixa,
do na Isa Alimasiiwu tu,
an ga da ke be xayi.
4 N da an nooron tuyindi ɲiiɲen kanma.
An ga da gollu ku be xaliifa in ŋa,
n da kun xa tinmandi.
5 Saasa ke in faaba,
n feetufata ti ken nooro yi an kaaran ŋa,
nooro ke be ga ɲi in da an noqu gelli duna ga ma jope.
6 « An ga da sero ku be kini in ŋa bakka duna yi,
n da an toxon tuyindi i ya.
An ya fo ni i ya nan xaso,
an da i kini in ŋa.
I tigiti an sefexannun ŋa.
7 Keeta ke,
i da a faamu nan ti fo wo fo gaa in maxa,
a su giri an ya yi,
8 baawo an ga da faarannaaxu ke be xaliifa in ŋa,
n ga da a kiɲandi i ya,
i duŋe ti a yi.
I da a tu xa soobe maxa,
nan ti in giri anken yinme ya yi.
I saxu a yi nan ti an yinme ya n da in xayi.
9 « N wa an ɲaagana i da,
xa in nta an ɲaagana dunarenmun danŋa de,
an ga da ku be kini in ŋa,
n na an ɲaagana kun ya da,
baawo an ya fo ni i ya.
10 Fo wo fo gaa in maxa,
an ya fo ni,
fo wo fo gaa an xa maxa,
n ya fo ni.
N nooron wa warini ti i ya.
11 N ntaxa duna yi keeta,
xa ikun wa duna yi,
nke wa telle katta an ŋa.
Faaba Senne,
i tanga ti an toxo daren ŋa,
an ga da toxo ke be kini in ŋa,
ken moxo,
i na ɲa baane,
xo inke yinme do an ga ni baane yi moxo ke be.
12 N do i ga da wuce su ɲa doome,
n da i tanga ti an ken toxo ya yi.
An ga da toxo ke be kini in ŋa,
n da i tanga ti a ya yi ;
fo wo fo ma sanku bakka i ya,
a ga ma ɲa baane ke be sankuntaaxun gaa ɲaana sababu yi Safandi Sennun sefon gaa tinmene.*
13 Saasa ke,
n wa saagene katta an ŋa.
N na ke su koono in gaa duna yi ya kuudo i na sewo,
sewoye be ga ni inke yinme sewoyen ŋa,
sewoyi tinmante.
14 N da an daalen kini i ya,
dunarenmun da i xoni,
baawo duna fo feti i ya xoyi inke yinme ga feti duna fo yi moxo be.
15 N nta tini an na i bogu duna,
xa an na i tanga Ibiliisa ken ŋa.
16 Duna fo feti i ya xoyi inke yinme ga feti duna fo yi moxo be.
17 N faaba,
i senondi ti tonŋun ŋa ;
an daalen ni tonŋun ya yi.
18 An ga da in xayi riini duna yi moxo be,
n xa wa i xayini telle duna yi ken moxo yi.
19 Nke yinme wa du sugandini ti i xeerin ŋa an danŋa,
kuudo i xa na ɲa fo sennu yi ti tonŋun ŋa.
20 « N nta an ɲaagana in xaranlenmo ku baane danŋa de.
Ikun do sero beenu gaa riini saxu in ŋa in xaranlenmo ku seedaaxun saabu da,
n na an ɲaagana i su ya da.
21 N wa a muurunu an maxa,
i su nan ɲa fo baane yi xoyi an do inke yinme ga ni baane yi moxo be.
I nan ɲa baane yi,
kuudo dunadunkonun na katu saqa a yi nan ti an ya n da in xayi.
22 An ga da nooro be kini in ŋa,
n da a kini i ya kuudo i na ɲa baane,
xoyi inke do anken yinme ga ni baane yi moxo be.
23 Nke do iku :
fo baane ;
anken Alla xa do inke :
fo baane.
I nan ɲa baane yi tinmantaaxu kanma,
ken moxo,
dunadunkonun wa a tuunu nan ti an ya n da in xayi.
An ga da in xanu moxo ke be,
an da i xa xanu ken moxo ya yi.
24 N faaba,
n liŋun ga ni ke be,
ken ni ya,
an ga da ku be kini in ŋa,
n gaa ɲaana noqu ke be yi,
i xa nan ɲa non ŋa.
An ga da nooro ke be kini in ŋa,
i xa na a wari.
An da ken nooro kini in ŋa ya na a sababun ɲa an ga da in xanu saado an gaa duna tagana.
25 N faaba,
an nan teleŋonta,
duna ma an tu,
xa inke ken wa an tu.
Ayiwa,
n xaranlenmon xa da a faamu nan ti an ya n da in xayi.
26 N da an toxon tuyindi i ya,
n wa finna a tuyindini i ya kuudo an xanuye ke be sabatinten gaa in ŋa,
a na sabati i xa yi ;
nke yinme xa na sabati i ya. »