[Alla Fanka Sennen riye]
16
Isa Alimasiiwu saage tini i xaranlenmon da :
« N da ke su ko ya,
kuudo axa danqanaaxun ya nan maxa bono.
2 I wa riini axa xata bakka allanxarankaanun ŋa.
Hari kootan wa riini axa kallaanon gaa a sinmana nan ti axa karinden ni batiyen ya yi Alla maxa.
3 I riini ken dabari ya,
baawo i nta inke tu,
i nta in faaba xa tu.
4 N da ke su ko axa danŋa ya,
kuudo ken bire ga na ri,
axa na sinme nan ti in demu na a ko axa da.
« N ma ku fiinu ko axa da gelli joŋaarun ŋa,
baawo o ɲi finna doome.
5 Xa saasa,
n wa dagana katta ke be ga da in xayi.
Ayiwa,
axa du baananbe su ma in tirindi nan ti :
“ An telle minna ? ”
6 Xa in ga da ke ko axa da,
ken saabu da,
axa sondomun suno.
7 Ken xa,
n na tonŋun ya koono axa da nan ti :
axa xeerin na in dagayen ya yi,
baawo in ga ma daga,
Deemandaanan ra nta riini axa yi.
N ga na daga ya ni,
n na a wara katta axa yi.
8 A ga na ri,
a wa dunadunkonun yangoburugumaaxun sigindini i ya junuubun do teleŋontaaxun do kiiten xibaaren kanma.
9 Ke be ga ni junuubun xibaaren ŋa,
ken ni ya i ga bara saqa in ŋa.
10 Ke be ga ni teleŋontaaxun xibaaren ŋa,
ken ni ya in gaa saagene katta in faaba yi,
axa ga ntaxa in walla xadi.
11 Ke be ga ni kiiten ŋa,
ken ni ya Ibiliisa be ga ni dunadunkamanen ŋa,
a kiiten ga kuti nan duguta.
12 « Fo gabe ya na in maxa in ga n xawa a koono axa da,
xa saasa,
i faamunden nan xoto axa da buru.
13 Xa Fanka Sennen ga na ri bire be,
aken be gaa tonŋun koyini,
a na axa kanda katta tonŋun su yi,
baawo a nta sefene ti i yinme yi,
a ga da ke be mugu,
a na ken ya koono axa danŋa,
ken do fiinu be gaa riini.
14 A na in darontaaxun xa koyi,
baawo ke be gaa in ŋa,
a na axa xibaarini ti ken ya yi.
15 Fo wo fo gaa in faaba maxa,
ken wa in xa maxa.
Ken ya ni in ga ti ke be gaa in ŋa a na axa xibaarini ti ken ya yi. »
[Xaranlenmon sunoyen yillaye sewoye yi]
16 « Fonne sa axa ntaxa in walla,
wucinne,
axa na yille in walla. »
17 Xaranlenmon yogonu da me tirindi nan ti :
« A na a mulla na manne ko o da kundu yi de,
a ga ti :
“ Fonne sa axa ntaxa in walla,
wucinne,
axa na yille in walla ”,
a do xadi,
a ga ti :
“ N wa telle katta in faaba yi ” ? »
18 I yille tini :
« Ken “ fonne sa ” be a gaa koono,
a wure ni manne yi ?
O nta a tu a gaa do fo wo fo yi ke yi. »
19 Isa da a faamu nan ti xaranlenmo ku na a mulla na i tirindi ya,
a ti i da :
« N ga da sefo ku be ko,
axa faayi gaa me tirindini kun ya maanan ŋa ba,
n ga ti “ Fonne sa,
axa ntaxa in walla,
wucinne,
axa na yille in walla ” ?
20 Tonŋun-tonŋu,
n na a ko axa da,
axa wa riini wu nan sonqo,
dunarenmun gaa sewoyen ŋa.
Axa sunoono ya mene,
xa axa suno ke lagarun ni sewoyen ya yi.
21 Xotoye na xenpe yaxaren jalan ŋa,
baawo renmen saare biren ya n kiɲe,
xa a ga na ken renme kita,
a wa ɲaxalini ma a ga mungu do jalan xotoyen ŋa,
baawo a da renme kita.
22 Ken ya ni,
axa xa faayi xotoyen ya noxon ŋa,
xa in do axa xa ga na yille me walla,
axa buttun wa fakka ɲaxaliye yi,
sere su ra ga nta ɲaxaliye be boosini axa yi.
23 Ken koota ga na kiɲe,
axa ntaxa in tirindini sefe su wure yi.
Tonŋun-tonŋu,
n na a ko axa da :
axa ga na in faaba ɲaaga fo wo fo yi ti in toxon ŋa,
a wa ken ɲaana axa da.
24 Harisa,
axa ma fo wo fo ɲaaga ti in toxon ŋa.
Xa ɲaage,
axa na kite kuudo axa ɲaxaliyen na tinme. »
[Duna fanqande]
25 « N faayi ga da misaalen ya ko axa da ke su yi,
xa kootan wa riini,
n ga ntaxa sefene axa da ke moxo yi.
Fo wo fo ga ni in faaba xibaaren ŋa,
n wa a su xullen koono axa da.
26 Ken koota,
axa sefen su taŋene in faaba yinme ya yi ti in toxon ŋa.
Ken koota,
n nta hari du tanpindini in faaba xanjono axa da.
27 Baawo in faaba wa axa mulla,
na a sababun ɲa axa ga da in xanu,
nan saxu a yi nan ti in giri a ya yi.
28 N giri in faaba ya yi nan ri duna yi ;
saasa in faayi gilli duna yi,
nan saage katta in faaba yi. »
29 A xaranlenmon ti :
« Keeta ke,
an da sefen su xurandi,
misaale fe.
30 A xura o da xa nan ti an wa su tu,
an wa hari o ŋanniyun tu o tirindindun kaane.
Ken ya saabu da,
o saxu a yi nan ti an giri Alla ya yi. »
31 Isa ti i da :
« Axa toŋondi keeta ?
32 Ayiwa,
waxatin wa riini,
a kiɲe wo,
axa su wa sanqini,
baane su na daga ti kaara yi na in baane toxo.
Xa in baane fe,
baawo in faaba wa do in ŋa.
33 N da ke xa ko axa danŋa ya,
kuudo axa na jamu do xeeri kita ti in ŋa.
Axa wa toorene duna noxon ŋa moxosiri,
xa,
xa maxa jikkirankuti :
nke ken da duna fanqa. »