[Isa Alimasiiwu ya ni reesetinŋe]
15
Isa Alimasiiwu saage tini i xaranlenmon da :
« Nke ya ni reesetin sire,
n faaba ni reesegume.
2 N kinge su ga nta renmunu,
a wa a kuttu.
N kinge su gaa renmunu,
a na ken xesu kuudo ken kinge na tallan saare.
3 Ke be ga ni axa xa yi,
n ga da xaranŋundinde be ɲa axa yi,
ken da axa senondi nan duguta.
4 Xa sabati in ŋa,
n xa na sabati axa yi.
Kinge su ra nta renmunu ti i du yi,
a tokkinte ga nta yitte ya yi ga fe.
Axa xa na ken moxo ya yi,
axa ga ma tokki in ŋa,
axa ra nta renmunu.
5 « Nke ya ni reesetinŋe,
axakun ni kingu.
Sere be gaa sabatini in ŋa,
n xa gaa sabatini a kaman ŋa,
a wa ren gabe renmunu,
baawo inke ga fe,
axa ra nta fo wo fo da.
6 Sere be ga nta sabatini in ŋa,
i wa a kaman sedde sellan ŋa xoyi kingi kutunte,
a na kaawa.
Ken falle i na a kafu me yi,
na yinben ro a yi na a buyi.
7 Xa axa ga na sabati in ŋa,
n sefon ga sabati axa yi,
ke be ga n liŋi axa da,
xa da a muuru,
axa wa a kitta.
8 Axa ga na renmu siri na a koyi nan ti in xaranlenmon ya ni axa yi,
n faaba nooron wa wariini axa yi duna su yaaxon ŋa.
9 N faaba ga da in xanu moxo be,
n xa da axa xanu kundun ya yi.
Ken kuŋa,
axa sabati in xanuyen noxon ŋa de !
10 Axa ga na tigiti in ɲaamarindixannun ŋa,
axa na sabati in xanuyen noxon ŋa,
xoyi inke yinme ga tigiti in faaba ɲaamarindixannun ŋa,
n ga sabati a xanuyen noxon ŋa moxo be.
11 « N da ke su ko axa da kuudo ɲaxaliye ke be gaa in ŋa,
a na ɲa axa yi.
Ken moxo,
axa ɲaxaliyen na tinme.
12 N ɲaamarindixannen faayi :
xa da me xanu xoyi inke yinme ga da axa xanu moxo be.
13 Xanuye na xenpe sere be ga da i yonkin kini i xanan da.
14 N xananun ya ni axa yi,
selli axa ga na in ɲaamarindixannun dabari.
15 N ntaxa axa xilli “ komo ”,
baawo komen nta i kaman fiinun xala yi.
N da axa xiri “ n xananu ” ya,
baawo in ga da fo wo fo tu ti in faaba yi,
n da a su tuyindi axa yi.
16 Axakun ma inke sugandi de,
aayi,
nke ya n da axakun sugandi.
N da axa xayi nan ti axa n daga,
axa nan renmu,
renmuye be gaa dallana.
Ken ŋa,
axa ga na in faaba ɲaaga fo wo fo yi ti in toxon ŋa,
a wa ken ɲaana axa da.
17 N ɲaamarindixannen faayi :
xa da me xanu. »
[Duna balle isanxaranlenmon ŋa]
18 Isa saage tini :
« Duna ga da axa xoni,
axa na a tu nan ti a joŋa inke fina ya xonno.
19 Axa gan ɲi dunarenmu yi,
duna wa axa xanna,
baawo a ya fo ni axa yi.
Xa dunarenmu feti axa yi,
baawo in da axa sugandi duna naxan ya yi.
Ken ya saabu da,
a gaa axa xonno.
20 Axa sinme do in ga da ke be ko axa da nan xaso :
“ Kome nta fasu i kaman ŋa abada.
”* Ku be ga da inke tooro,
i na axa xa toorono ya.
Ku be ga da in sefon daro,
i na axa xa sefon darono ya.
21 Xa i na ke su ɲaana axa yi do in toxo ke ya batte,
baawo ke be ga da in xayi,
i nta a tu.
22 N gan n maxa ri,
n gan n maxa sefe i da,
i ma ɲi ɲaana junuubunto yi.
Yanpaye ntaxa ɲaana i da i junuubunun ŋa keeta.
23 Xonnaaxun gaa sere su maxa katta inke yi,
a wa a kaman maxa katta in faaba xa yi.
24 N gan n maxa gollu ya dabari i jon ŋa,
sere su ga ma demu na kun gollu me dabari abada,
i ma ɲi ɲaana junuubunto yi.
Xa saasa i wari,
i wa finna in do in faaba xonno.
25 Xa ke ɲa ya kuudo ke be safanten gaa i sariyan noxon ŋa,
ken ya na tinme,
ken ga ni :
“ I da in xoni xafu. ”*