[Isa Alimasiiwu ya ni kille]
14
Isa Alimasiiwu saage tini i xaranlenmon da :
« Axa butten nan maxa bono de :
axa saxu Alla yi,
axa nan saxu in xa yi.
2 Taaxuran gaben wa in faaba kan ŋa.
Tonŋu ga n maxa fe,
n nta a koono axa da.
Ken ya ni n gaa dagana taaxuran gemundi axa da.
3 N ga na taaxuran gemundi axa da bire be,
n na saage riini axa wutu na axa wara in kaaran ŋa,
kuudo in gaa noqu be,
axa xa na ɲa non ŋa.
4 Xa in gaa telle noqu be,
axa wa a killen tu. »
5 Tooma ti a da :
« Kamanyugo,
o nta hari a tu an gaa telle noqu be,
o katta kille ke tuunu kan moxo ? »
6 Isa ti a da :
« Kille ?
Nke ya ni kille ke yi,
nke ya ni tonŋu ke yi,
nke ya ni bireye ke yi.
Sere su ra nta telle katta in faaba yi,
an ga ma bogu ti inke ya yi.
7 Axa ga da in tu,
axa wa in faaba xa tuunu.¤
Saasa ke,
axa da a tu ;
axa da a wari xa. »
8 Filipu xa ti :
« Kamanyugo,
an faaba koyi o yi,
ken wa o bakka. »
9 Isa ti a da :
« Eh,
n do axa ga da ke wuce su ɲa doome,
an nta in tu harisa,
Filipu ?
Sere be ga da inke wari,
an da in faaba wari.
An katta tini in da kan moxo yi harisa :
“ An faaba koyi o yi ” ?
10 An saxunte nta a yi ya nan ti in wa in faaba yi,
n faaba xa wa in ŋa ya ba ?
N gaa ke be koono axa da,
n yinme sefe fe.
N Faaba ke be sabatinten gaa in ŋa,
a yinme ya na i gollu ku dabarini.
11 Xa saxu in sefon ŋa nan ti in wa in faaba yi,
n faaba xa wa in ŋa.
Ken ga fe,
axa na saxu in ŋa ti axa ga da a wari in gaa gollu ku kun be dabarini.
12 Tonŋun-tonŋu,
n na a ko axa da :
sere su ga saxu in ŋa,
a kaman xa wa in gollu ku me dabarini.
A wa golli xooro tana xa dabarini,
baawo in faayi dagana in faaba kaaran ya yi.
13 Ayiwa,
axa ga na fo wo fo ɲaaga ti in toxon ya yi,
n wa ken dabarini kuudo in faaba nooron na wari ti i renmen ŋa.
14 N na saage a yi nan ti axa ga na fo wo fo ɲaaga ti in toxon ŋa,
n wa a ɲaana. »
[Fanka Sennen laayidun wutunde]
15 « Selli axa gaa in mulla,
axa na sukke do in xaranŋundindun ŋa.
16 N xa na in faaba ɲaaga,
a na Deemandaana tana kini axa yi.
Ken gaa toqo do axa yi ma abada.
17 Ken ni Fanka Sennen ya yi,
a gaa tonŋun koyini axa yi.
Dunarenmun ra nta a kitana,
baawo i nta a walla,
i nta a tu xa.
Xa axakun wa a tu,
baawo a wa toqo do axa yi,
a wa axa yi xa mene.
18 N nta axa toqo xo giigiiru yi,
n saagene katta axa yi ya.
19 Fonne sa,
dunadunkonun ntaxa in walla,
xa axakun wa in walla,
baawo in biranten ya ni,
ken ya ni axa xa gaa bireene.
20 Ken koota ga na kiɲe,
axa wa a tuunu nan ti inke wa in faaba yi,
n wa axa yi,
axa xa wa in ŋa.
21 Sere be gaa tigitini in ɲaamarindixannun ŋa na i dabari,
ken ya na in mulla.
Sere be gaa in mulla,
n Faaba xa wa riini a kaman xanu.
Ma in xa ga ri a kaman xanu na du koyi a yi. »
22 Yehuuda,
ken feti Yehuuda Hisikarooti yi,
a tirindi ti :
« Kamanyugo,
manne ni an gaa du koyini oku baane ya yi,
an ga nta du koyini duna su yi ? »
23 Isa ti a da :
« Sere be gaa in mulla,
a na in sefon daro.
Ken ŋa,
n faaba xa na a xanu.
O su na ri katta a kaman ŋa,
na o dingiran dabari a noqun ŋa.
24 Xa sere be ga nta in mulla,
a nta in sefon batta.
Axa gaa sefe ke ken xa be mukku in ŋa,
nke sefe fe.
N faaba ke be ga da in xayi,
a ya sefe ni.
25 N na ke su koono axa da in do axa gaa doome bire ke be yi ya.
26 Xa Deemandaana,
ken ga ni Fanka Senne be in faaba gaa a xayini ti in toxon ŋa,
a wa axa xaranŋundini fon su yi,
na axa haqilen yanqandi in yinme ga da fo wo fo ko axa da nan xaso.
27 « N wa dagana,
xa in wa jamun do xeerin toqo axa maxa,
n yinme jamun do in xeerin ya ni,
n gaa a kinni axa yi.
Ken do duna jamun do a xeerin nta baane.
Axa buttun nan maxa bono de !
Xa maxa jooti xa.
28 Axa da a mugu in ga ti :
“ N wa dagana,
xa in wa saagene riini katta axa yi.
” Axa gaa in mulla su,
axa n xawa sewono na a tu nan ti in dagana in faaba kaaran ya yi,
na a sababun ɲa a ga n xoora in ŋa.
29 N faayi ga da axa sobindi ya saado ku fiinu gaa riini,
kuudo i ga na ri bire be,
axa na saxu in ŋa.
30 N ntaxa fo gabe koono axa danŋa kundu,
na a sababun ɲa Ibiliisa,
ke be ga ni dunadunkamanen ŋa,
a ga ri.
Xa,
a ra nta in da.
31 Xa,
n faaba ga da ke be ko in da,
n na ken ya dabarini,
kuudo dunadunko na a tu ti in wa in faaba mulla.
Xa giri,
o n laato bakka yere. »