[Isa do i xaranlenmon duransefanlenmaaxu lagare]
(13.1-17.26)
[Isa Alimasiiwu xaranlenmon taanun wanqinde]
13
Pesaxansallen wa xo xunbane,
Isa Alimasiiwu wa a tu nan ti kootan kiɲe i ga n xawa gilli duna yi nan daga katta i faaba yi.
Ku be gaa a maxa duna yi,
a da i xanu gelli joŋaarun ŋa ma fin lagaru.
2 Pesaxansallen yige biren ŋa,
ken da a ɲi Ibiliisa da Isa janbanden ro Simoona renme Yehuuda Hisikarooti sondomen ŋa,
a na Isa ro kittu yi.
3 Isa wa a tu nan ti i Faaba da fon su ya kini i ya,
a wa a tu xa nan ti i giri Alla ya yi,
i saagene katta a ya yi.
4 A giri bakka ɲaaxamanyokken ŋa kuŋa,
na i yiraamun saxundi,
na yiraame yogo wutu na ken fana do du yi.
5 Ken falle,
a da jin ro xolle yogo noxon ŋa na i xaranlenmon taanun wanqinden jopa,
na i suusa ti yiraame ke be a ga da a fana du yi.
6 Yontan ga kiɲe Simoona Piyeeri yi,
aken ma duŋe,
a ti :
« Kamanyugo,
anken na inke taanun wanqi ? »
7 Isa ti a da :
« N gaa a kanma na ke be dabari,
an nta a tu fina,
xa ken falle,
an wa riini a faamu. »
8 Xa Piyeeri xoto,
a ti :
« Aayi !
An nta in taanun wanqini !
Ken nta ɲaana !
» Isa ti a da :
« N ga ma an taanun wanqi su,
fo ntaxa in do an naxa. »
9 Piyeeri ti :
« Kamanyugo,
ken ya ga ni,
maxa in taanun baane wanqi ;
n kittun do in yinmen xa wanqi. »
10 Isa ti a da kuŋa :
« Sere be ga da i faten su wanqi,
a kaman seno,
a toxo a na i taanun ya wanqi.
Axakun sennun ya ni,
xa axa su fe de. »
11 Sere ke be gaa riini Isa janba,
a wa a tu.
Ken ya ni,
a ga ti i su sennu fe.
12 A ga duguta i taanun wanqinden ŋa,
a da i yiraamun rondi nan taaxu yigeyokken ŋa.
Ken falle,
a ti :
« N ga giri ke be dabari,
axa da a faamu ba ?
13 Tonŋun wa axa maxa,
axa gaa in xilli “ Xaranmoxo,
Kamanyugo ”,
ken yinme ya ni in ŋa.
14 Nke yinme be ga ni xaranmoxon do kamanyugon ŋa,
n da axa taanun wanqi,
axa xa na me taanun wanqi de.
15 N faayi ga da misaalen ya kini axa yi kuudo axa na yaaxe do a yi.
16 Tonŋun-tonŋu,
n na a ko axa da,
kome nta fasu i kaman ŋa abada.
Faare xa su nta fasu ke be ga da a xayi.
17 Axa ga na ku fiinu tu,
wulluliŋontaaxunun wa axa da, selli axa ga na i dabari.
18 N nta do axa su yi,
n ga da ku be sugandi,
n wa i tu.
Xa waajibin ya ni,
Safandi Sennun ga da ke be ko,
ken nan tinme :
“ N do ke be ga da buurun kutu me yi,
a ɲaŋi in da xonne yi. ”*
19 « Gelli waca,
n da a ko axa da,
saado ku fiinu gaa ɲaana,
kuudo i ga na ɲaŋi bire be,
axa na danqanaaxu nan ti N NI IN GA NI KE BE ya yi.
20 Tonŋun-tonŋu,
n na a ko axa da,
sere be ga na in faare bisimilla,
an da inke yinme ya bisimilla.
Sere be ga da inke bisimilla,
an da ke be ga da in xayi ya bisimilla. »
[Janbante]
21 A ga da ke ko nan duguta,
a butten bono.
A da a ko na a xurandi nan ti :
« Tonŋun-tonŋu,
n na a ko axa da,
axa du baananbe wa in janbana. »
22 Xaranlenmon lasame lewu,
i toxo me baanan baanan faayini.
I nta a tu a gaa do sere be yi.
23 Isa xaranlenmo ku du baananbe ni a xaranlenxanan ya yi,
a do a wa kariini me yi yigeyokke ke yi.
24 Simoona Piyeeri koore a da nan ti a na Isa tirindi a gaa do sere be yi.
25 Xaranlenma ke saxunanlexinten ti Isa da :
« Kamanyugo,
ko baane ni ken ŋa ? »
26 Isa ti a da :
« N faayi ke buuru dunŋe deebini maxafon ŋa,
n ga na a kini sere be yi,
ken kaman ya ni.
» Ken batte su yi,
Isa da buuru dunŋen deebi maxafon ŋa na a kini Simoona Hisikarooti renme Yehuuda yi.
27 Gelli Yehuuda ga da ken buuru dunŋe raga tan,
Ibiliisa ro a yi.
Isa ti a da kuŋa :
« An gaa ke be ɲaana,
a ɲa jawoye yi ke. »
28 Ku be ga ɲi yigeyokke ke kanma,
baane su ma a faamu ke be ga sigi a ga da ke ko.
29 Jamankafonxaalisi be taaxunten gaa Yehuuda maxa,
yogonu da a sinma Isa ti a na fo wutu ken ya yi a nan daga sallinyokku xobo i da,
walla a na fo kini misikiinun ŋa.
30 Gelli a ga da buuru ke wutu tan,
a bogu.
Ken bire,
wuron ro.
[Ɲaamariyi kurunba]
31 Yehuuda ga daga,
Isa ti :
« Saasa ke,
nke be ga ni Seren Renmen ŋa,
n nooron sanqi.
Alla xa wa noorono ti in ŋa.
32 {Baawo Alla nooron gaa wariini ti in ŋa,
}¤ Alla wa in nooron warindini ti du yi.
A nta dallana xa,
a wa in noorono.
33 N renmu,
n do axa wa fonne ɲaana doome,
xa axa wa riini in muuru.
Xa in ga da ke be ko Yehuudiyanun da*,
n faayi ken ya koono axa xa da saasa,
nan ti in gaa dagana noqu ke be,
axa ra nta telle non ŋa.
34 N faayi ɲaamarindi kurunba kini axa yi,
ken ga ni axa na me xanu.
Iyo,
n ga da axa xanu moxo ke be,
axa xa na me xanu kundun ŋa.
35 Axa ga na ken dabari su,
a su wa a tuunu nan ti in xaranlenmon ya ni axa yi.
Ken kitene axa gaa me xanna ya. »
[Piyeeri nakkariye]
36 Simoona Piyeeri ti a da :
« Kamanyugo,
an telle minna ?
» Isa ti a da :
« N gaa telle noqu ke be,
an ra nta telle do in ŋa non ŋa saasa,
xa koota wa riini an gaa telle do in ŋa. »
37 Xa Piyeeri ti a da :
« Kamanyugo,
manne ni in ra ga nta telle do an ŋa saasa ?
N moxo sironten ya ni nan kara do an batten ŋa ! »
38 Isa ti a da :
« An moxo sironten ya ni nan kara do in batten ŋa ?
Tonŋun-tonŋu,
n na a ko an da,
saado selinganman gaa sefene,
an wa in nakkarini,
ta sikko xa ya ni mene. »