Mace 26

[Isa koyi lagare : a rageye, a kiitiyen do a gengende do sallibinsollen ŋa]

(26.1-27.66)

[Janbayen yetuye ti Isa Alimasiiwu yi]

(Maarika 14.1-2 ; Luka 22.1-2 ; Yohanna 11.45-53)

Isa Alimasiiwu ga duguta sefen su yi bire be, a ti i xaranlenmon da : 2 « Xa da a tu nan ti toxo bito filli ya yi de. Ayiwa, nke be ga ni ŋa, n wa roono kittu yi, i gaa in ŋa. »

3 Ken bire, do xirisu, i meɲi i yinmanken kan ŋa, ke be toxon ga ni . 4 I gemu xanne yi nan ti i na Isa gotontanlaga i na a faatindi. 5 Xa, i ti i nan maxa a ɲa sallen ŋa, a gaa ɲaana sababu yi jaman gaa murutini.

[Isa timiliŋidaariye]

(Maarika 14.3-9 ; Yohanna 12.1-8)

6 Ken bire, Isa wa Simoona kan ŋa, ken ga ni fatanwattiburugume yogo yi, a gaa deben ŋa. 7 Yaxare yogo xa tinko a yi, woridon faranpare wa a maxa, misikinji jonko xote wa a noxon ŋa. Isa gaa yigene, yaxare ke da misikinji ke joxi a dellen ŋa. 8 Xaranlenmon ga da ken wari, a ma liŋo i da, i ti : « Ke misikinji bononden da manne siro an ŋa ? 9 Hari an gan da a gaaga jonko xoore yi na a kini misikiinun ŋa, ken nta fasu ba ? » 10 Isa ga da ken mugu, a ti faaru ku da : « Yaxaren da i golli siren ɲa in da, axa baqa a yi manne ? 11 Axa gaa misikiinu ku be koono, axa do kun na me maxa ya kootan su ; axa do inke xa nta toqo doome. 12 A ga da ke misikinji timi liŋe joxi in ŋa, a da in waxari katta in firindikootan ya yi. 13 Tonŋu, n na a ko axa da : ke ga na laxami duna noqu su, ma yaxare ke xa ke golle ga laxami non ŋa, seron gaa sinmene do a yi. »

[Yehuuda janbaye]

(Maarika 14.10-11 ; Luka 22.3-6)

14 Ken falle, faaru ku tanmi do fillon du baananbe be toxon ga ni Hisikarooti, a kiɲe sadaxakiɲandaananyinmankon ŋa 15 nan ti i da : « Axa na manne kini in ŋa, n ga na Isa ro axa kitten ŋa ? » I da tanjikke godo xulle kini a yi. 16 Gelli ke, aken do feeramuuriyen ya na me yi, i ra gaa Isa janbantanloono kittu yi moxo be.

[Pesaxansallinɲaaxamen dabariye]

(Maarika 14.12-21 ; Luka 22.7-14, 21-23 ; Yohanna 13.21-30)

17  koota fana, faarun tinko Isa yi na a tirindi ti : « An na a mulla o nan daga Pesaxansallinɲaaxamen soro an da minna ? » 18 A ti : « Xa daga kaanun ŋa, ke sere fulaane banŋe, nan ti a da : “ Xaranmoxo ti i waxatin kiɲe, ken kuŋa, i do i faarun wa riini Pesaxanɲaaxamen yiga an kan ŋa. ” » 19 Isa ga da a ko faaru ku da moxo be, i da a ɲa ken moxo ya yi. I daga Pesaxansallen moxon gemundi.

[Janbayen siginde Yehuuda yi]

20 Wuron ga ro, Isa do i faarun tanmi do fillon taaxu yigeyen ŋa. 21 I gaa yigeyokken kanma, a ti : « Tonŋu, n na a ko axa da, axa du baananbe wa in janbana. » 22 Ken digi faaru ku yi siri, i xosi toxo a baanan-baanan tirindini, fo wo fo gaa tini : « Xaranmoxo, xori inke fe ? » 23 Isa jaabi nan ti : « Sere be gaa in janbana, n do a kaman su kitten faayi yigandinyokken ŋa. 24 Tonŋu, Seren Renmen ken ken wa kalla xoyi a gaa Safandi Sennun ŋa moxo be. Xa bonen wa seren da, ke be ga ɲa sababu yi na Seren Renmen janba. Hari ken kaman gan n maxa bange ya n ɲi ga n fasu a da ! » 25 Aken Yehuuda be gaa riini a janba, a xa da a tirindi ti : « Xaranmoxo, xori inke fe ? » Isa jaabi nan ti a da : « An yinme ya n da a ko de ! »

[Yigeta lagare]

(Maarika 14.22-26 ; Luka 22.14-20 ; 1 Korintinko 11.23-25)

26 I gaa yigene, Isa da buurun wutu, na Alla tiiga ; a da a kutu-kutu faarun naxa nan ti : « Ke ni in fatantiyen ya yi. Xa da a raga, xa na a yiga. » 27 A saage jiranxollen wuttu na Alla tiiga xadi, na a kini i ya nan ti : « Axa su na fo mini, 28 baawo ke ni in foren ya yi, laayidun ga tafi ti fore ke be yi, a gaa joqo seren su junuubuxafariyen da. 29 N na a ko axa da ti : nke ntaxa ke reesenji minni keeta ma koota be in do axa ga na ro in Faaba tunkaaxun ŋa, o na yille a minni doome. » 30 Isa do i faarun ga duguta xasiidan ŋa, i giri nan daga .

[Isa xibaarindinde ti Piyeeri nakkariyen ŋa]

(Maarika 14.27-31 ; Luka 22.31-34 ; Yohanna 13.36-38)

31 I ga kiɲe non ŋa, Isa ti i da : « Lenki wuro, axa su wa jikkirankutiini ti in xibaaren ŋa nan wuru in ŋa, xoyi a safanten gaa nan ti :

“ N wa nagaanan sanpana, jaxon na sanqi. ”

32 « Xa, n ga na wundi bakka kallen ŋa, n wa telle axa kaane . » 33 Piyeeri ti a da : « Hari a su ga na jikkirankuti ti an xibaaren ŋa, nke ken nta wurunu an ŋa abada ! » 34 Isa jaabi nan ti a da : « Tonŋu, n na a ko an da, lenki wuro ke, katta selinganman gaa sefene, an wa in nakkarini, ta sikko xa ya ni mene ! » 35 Piyeeri ti a da : « Hari in gan kalla do an ŋa ya, n nta an nakkarini ! » Xaranlenmon su xa da ken ya ko.

[Isa do i xaranlenmon kiɲeye Getisemaani yi]

(Maarika 14.32-42 ; Luka 22.39-46)

36 Ken falle, Isa do i faarun kiɲe naaxo yogo yi, i gaa non xilli : « Getisemaani », a ti i da : « Axa toxo yere, n wa dagana Alla batu dooke. » 37 A dagante, a do Piyeeri do Sebede ren yugun filli daga. Sunon do jooten da a raga. 38 Ken noqu, a ti i da : « Tooxen faayi in karini. Axa toxo do in ŋa yere, axa n wuyi axa yaaxon ŋa. »

39 A ga daga kaane fonne, a bifi na i taŋen ro ɲiiɲen ŋa, a gaa Alla ɲaagana nan ti : « N Faaba, ke xaraxan xaraxace laatondi in ŋa selli a ra gaa ɲaana ! N ma ti inke liŋun de, xa fi be ga n liŋi an da ! »

40 A gaa riini, a da a ɲi faaru ku sikki xenqe. A ti Piyeeri da : « Axa ma katu hari wucu lamaane ɲaana axa yaaxon ŋa do in batte ! 41 Xa toxo axa yaaxon ŋa, axa na Alla ɲaaga, kuudo Ibiliisa na waase axa jaarabini. Fo siri ɲanŋen nan liŋi yonkin da, xa faten nan lanpunta. »

42 Ken falle, Isa yille laatono ta fillandin ŋa nan daga Alla ɲaaga nan ti : « N Faaba, selli a ga na ɲi, n ra ga nta kisiini ke xaraxan xaraxace yi ya moxo su yi, an sagon nan ɲaŋi. » 43 Isa ga ri i ta fillandin ŋa, a da i ɲi xenqene xadi baawo xenqon diginten ɲi i ya.

44 A da i wara nan laato bakka i ya nan daga Alla batu ta sikkandin ŋa ti ku diganbaanu yi. 45 Ken bire, a ri katta i ya nan ti i da : « He, axa finna xenqene ya ? Axa finna tuumana ya ? Waxatin faayi ga kiɲe, Seren Renmen gaa roono junuubuɲaŋaanon kittun ŋa. 46 Xa giri, o n daga ! Ke be ga da in janba, a riyinten faayi. »

[Isa rageye]

(Maarika 14.43-50 ; Luka 22.47-53 ; Yohanna 18.3-12)

47 Na Isa toxo sefen ŋa, Yehuuda, ken ga ni faaru ku tanmi do fillon du baananbe yi, ma a do jaman xoore riyinten faayi, jaraxonun do gumon gaa i maxa. Sadaxakiɲandaananyinmankon do jaman xirisun ya n da i wara riini. 48 Ken da a ɲi, janbante ke da taagumanse yogo ko sero ku da nan ti : « N ga na sere be xandunsunbu, axa na a raga, a ya ni ! » 49 Ayiwa i ga kiɲe sigira be yi tan, Yehuuda tinko Isa yi nan ti a da : « Xaranmoxo, sunka ! » Ken falle, a da a xandunsunbu. 50 Isa jaabi nan ti a da : « N menjanŋe, ke be ga da an riiti, a dabari ke. » Ken sigira su, jaman dire Isa kanma na a raga. 51 Faaru ku be ga ɲi do Isa yi, baane xosi i jaraxon bagandi, na sadaxakiɲandaananyinmanken komen sanpa, na a taron kutu. 52 Ken sigira, Isa jaabi nan ti a da : « An jaraxon saaga i ŋanan ŋa, baawo sere wo sere ga gaja ti jaraxon ya yi, a kaman toqo jaraxon ya yi. 53 Anken ma a tu nan ti in ra wa in Faaba xilli ti a na in deema gani ? Ken sigira su yi, a na wujunun wujunun maliikanun wara katta in ŋa. 54 Xa, ken ga na ɲaŋi, Safandi Sennun ga da ke be ko, ken wa tinme kan moxo ? »

55 Isa jaabi nan ti jama ke da : « Axa do jaraxonun do gumon ya n riini katta in ŋa kundu xoyi killimaxasaqaanan ya ga ni in ŋa ! N xa taaxunten ɲi Allanbatikaxooren noxon ŋa koota su in gaa xaranŋundindini, axa ma in raga. 56 Xa, ke su ɲa ya, kuudo ga da ke be ko na tinme. » Ken sigira su yi, a faaru ku su sanqi bakka a yi nan wuru.

[Isa dagaye kiitikutiran ŋa]

(Maarika 14.53-65 ; Luka 22.54-55, 63-71 ; Yohanna 18.13-14, 19-24)

57 Ku beenu ga da Isa raga, i do a daga katta sadaxakiɲandaananyinmanken ŋa, ken ga ni Kaafa yi, do xirisun meɲi a kan ŋa. 58 Piyeeri da du toxo falle laatoyen ŋa, nan sukke do i ya ma sadaxakiɲandaananyinmanken kan ŋa. A ro nan daga taaxu kapa tangandaanon ŋa, a gaa terinkene fi ke gaa lagarini moxo be. 59 Ken da a ɲi sadaxakiɲandaananyinmankon do wa seedaburuseeda muurunu ti Isa yi kuudo kiiten na a kari. 60 I da gaara gabe ko, xa i ma jalagindira kita Isa yi. Ken falle sero filli yogo ti : 61 « Ke yugunne ya n ti ike ra wa ke karana na a taga bito sikki noxo. » 62 Sadaxakiɲandaananyinmanken giri sigi nan ti : « Ayiwa, ku gaa seedene ti an ŋa ti ke su yi, laqen nta anken ŋa ya ba ? » 63 Isa wa kuurunu de. Sadaxakiɲandaananyinmanken ti : « N wa an kunandini ti Alla ŋalinten ŋa, an na a ko o da selli ke ya ga ni an ŋa, selli ya ga ni an ŋa. » 64 Isa da a jaabi ti : « An yinme ya n da a ko de, xa in na baane ko axa da, nan ti lenki ga na dangi, axa wa riini Seren Renmen taaxunten wari Raniyaanan tayen ŋa, na a riyinten xa wari xaban noxon ŋa gilli kanmun ŋa. » 65 Isa ga da ke ko, sadaxakiɲandaananyinmanken maxa, a xenperandangi. A butu ma a gaa i nan ti : « O manne haaju na seeda yi keeta ? Axa yinmenu da a xajafinden mugu. 66 Axakun ti kan moxo ? » Jaman ti : « A n xawa kalla ya tan. » 67 Ken sigira su, i toxo raxanjin tufana Isa yeeson ŋa nan toxo a gonmorini, yogonu wa a fentana. 68 I wa tallan tini : « Kisindaana, ko baane n da an katu ? Selli annabinyinmen ya ga ni an ŋa, a kaman ko ke ! »

[Piyeeri nakkariye]

(Maarika 14.66-72 ; Luka 22.56-62 ; Yohanna 18.15-18, 25-27)

69 I gaa ke su yi, Piyeeri wa taaxunu kanberan ŋa. Tunbaare yogo xosi tinko a yi nan ti : « An do Isa ɲi doome yi ya mene, Galiilenka yugo ke ! » 70 Xa Piyeeri nakkari a su jon ŋa nan ti : « An ga do ke be, nke nta a tu de. » 71 A bogunte katta ganlaqen ŋa, tunbaare tana da a wari, ken xa ti seron da : « Ke yugo do Isa ɲi doome yi, ke. » 72 Piyeeri nakkari xadi nan kuna ti : « N nta ke yugo tu ! » 73 Wucinne, sero beenu ga ɲi no, i xa tinko a yi nan ti a da : « Tonŋun ya ni, an xa ɲi kapa sero ku yi ya mene ! A wa tuyini hari an sefexannen ŋa. » 74 Piyeeri xosi toxo kunana na du langa nan ti : « Nke nta ke yugo tu ! » I wa ken ŋa tan, selinganman xosi sefe. 75 Ken noqu, Piyeeri sinme do Isa ga da sefe be ko nan xaso, a ga ti : « Saado selinganman gaa sefene, an wa tini an nta in tu ta sikko. » A bogu nan wu ma a yaaxon gaa dunbunu.