Luka 1

Luka Linjiili

[Isa bangeyen do a leminaaxu]

(1.1-2.52)

[Luka kitaaben safemaana]

N xana liŋe Tuufulo, fi xooro rakutunto beenu ga ɲaŋi o maxa yere, seri gabe da a faayi nan safandi i kanma, 2 xoyi seron ga da i laxami o da moxo ke be yi. Kun sero beenu ga da i laxami, fiinu ku ɲaŋi i ya taanun kanma gelli i joŋaarun ŋa. I yille ɲaana Alla digaamen gangundaanon xa yi. 3 Ken ya ni, n xa da fiinu ku lewusin muuru moxosiri gelli i joŋaarun ŋa. N da a wari ti in nan xawa safandini katta an ŋa i kanma xo i ga ri moxo be, 4 kuudo an ga da fiinu beenu xara, an na katu saqa i sahaabantaaxun ŋa.

[Annabi Yahaya bangeyen xibaare]

5 Tunka Xoore ga ɲi toorini yi waxati be, yogo ɲi no, a toxon ga ni Jakkariyaawu, a gaa Haabiya sadaxakiɲandi sapan ŋa. A xojidunken toxon ya ni Helisabeeti, a bakka fonlaqen ya yi. 6 Jakkariyaawu do Helisabeeti su ni Alla seri teleŋonto ya yi, i wa Kamane Alla ɲaamarindun do a sariyanun batta xoyi a ga n xawa moxo be. 7 Xa, i ma renme kita baawo Helisabeeti ɲa boroken ya yi ; i sero filli su xa xaso.

8-10  laadan ya ni na sokkun wutu kuudo na sere sugandi, sere ke be gaa futaaden tiidindini noxon ŋa. I da Jakkariyaawu ya sugandi kuŋa, a na ken golle dabari, baawo yontan ɲi a sapan ya yi.

Ayiwa koota yi, na Jakkariyaawu toxo sadaxakiɲanden gollun ŋa, futaadindiwaxatin ŋa, allanbattaanon jaman wa allanbatini sellan ŋa. 11 Tunka Duumanten maliika yogo xosi du koyi Jakkariyaawu yi. Maliika ke wa sikki ti sadaxanfutaadinbeelon tayen ŋa. 12 Jakkariyaawu ga da maliika ke wari, a buttun kuti, kannen da a raga. 13 Xa maliika ke ti a da : « Maxa kanu Jakkariyaawu, baawo an ga da fo be muuru Alla maxa, a da an jaabi : an xojidunke Helisabeeti wa ren yugo saarana an da, an na a toxora Yahaya. 14 Ken wa ɲaana an da sewoye do ɲaxaliyi xoore yi, a bangeyen wa ɲaana seri gabe xa da ɲaxaliye yi. 15 A wa ɲaana Tunka Duumanten seri xoore yi. A nta reesendolo minni, a nta fo wo fo su xa minni fo be gaa a bakka i haqilen ŋa. A wa senben kitta ti Alla ŋa gelli a gaa saaxen furaasen ŋa. 16 A wa ren gabe sondomun yillandini katta i Alla yi. 17 A ya n riini Tunka Duumanten kaane ti annabi senben me yi ; na baasi bogu saaraanon do i renmun naxa, na i sondomun ɲa baane yi, sero beenu ga nta Alla killen kanma, na i sondomun yilla, na i ɲa xoyi seri teleŋonton sondomun moxo, kuudo na jama moxon gemundi, jama be gaa riini sigi Kamanen da. »

18 Jakkariyaawu da maliikan tirindi nan ti : « Manne na inke saxundini ken ŋa ? Baawo in xaso, n xojidunken xa wuyin laato. » 19 Maliika ke ti a da : « Nke ya ni Jibiriiru yi, n ya siginten na Alla faarun xannemaxa. A ya n da in xayi katta an ŋa, n nan sefe an da, na ke kiɲandi an ŋa. 20 Ayiwa, an ma saxu in digaamun ŋa, ken saabu da an wa muumini, an neenen wa ragene ma koota be xibaare ke ga n ɲaŋi. A xa ɲaana i koota rakutunte ke yi ya xa mene. »

21 Ken bire, allanbattaanon jaman wa Jakkariyaawu dukku sellan ŋa. A ga dalla noqu sennen noxon ŋa, a ga ma bogu, jama ke lasame. 22 Xa a ga bogu sellan ŋa bire be, a ma katu sefene. Jama ke da a faamu kuŋa ti Alla da fo yogo koyi a yi noqu sennen noxon ŋa. Jakkariyaawu konto sefene, a na i moxo koono ti taagumansun ya yi. 23 A yontan ga tinme Allanbatikaxooren gollun ŋa, a saage katta i kan ŋa.

24 Fi falle, a xojidunke Helisabeeti da warijaxen kita. A da xasu karagi ɲa, a ma bogu seranyaaxo yi. A ti i noxoodu : 25 « Tunka Duumanten da ke ya ɲa in da ! A da i falle faayi in ŋa keeta. Fo be ga ni yaagun ŋa seron maxa, a da a wutu bakka in kanma. »

[Jibiriiru riye katta Mariyaamu yi]

26 Helisabeeti noxon gaa xasu tunmi yi, Alla da maliika Jibiriiru xayi dagana , ken ga ni maran debe yogo yi, 27 katta xuso yogo yi, a toxon ga ni Mariyaamu. Xuso ke tanman raganten ni yugo yogo da, ken toxon ga ni Yuusufu, a gaa bakka tunka Daawuda fonlaqen ŋa.

28 Jibiriiru daga Mariyaamu sagata, a ti a da : « Xeeri xenu an ŋa ! Tunka Duumanten da i neeman ɲa an da ! Tunka Duumanten da an koroosi. » 29 Ku digaamu da Mariyaamu lasama ; a da du tirindi kuuɲinde ke maanan ŋa. 30 Jibiriiru ti a da kuŋa : « Maxa kanu Mariyaamu, baawo Alla neemandi an maxa. 31 A faayi ke ! An wa warijaxen kitana na ren yugo teeri, an na a toxora Isa. 32 A toxon wa wurugini, a na xiri Alla wuruginten renme. Tunka Duumante Alla wa a ɲaana tunkanyugo yi xoyi a kisima Daawuda ga ɲaŋi tunkanyugo yi moxo be. 33 A wa toorini Yaaxuba bonsonŋun kanma ma abada, a tunkaaxun nta ɲameene xa mene. » 34 Mariyaamu ti Jibiriiru da : « Nke me xuso, ken katta ɲaana kan moxo ? » 35 Jibiriiru ti a da : « Fanka Sennen wa yanqana an kanma, Alla wuruginten senbe wa an xupu xo sirawu. Ken ya saabu da ni, an gaa riini renme ke be teeri, a gaa xiriini Ren senne do Allanlenme. 36 An ma a wari, hari an maaren yaxare Helisabeeti yinme do i xasoye su, seron gaa tini a ra nta saareene, warijaxen wa a yi saasa xasu tunmi. 37 Ken ya ni, fo ma Alla kaaɲa. » 38 Mariyaamu ti a da kuŋa : « Ayiwa, nke ni Tunka Duumanten tunbaaren ya yi. An ga da a ko moxo be, yelli a gan na sabatindi in da ken moxo yi. » Jibiriiru giri Mariyaamu yi.

[Mariyaamu dagaye Helisabeeti banŋe]

39 Wucinne falle, Mariyaamu da a soobe dagana maran debe yogo yi, a gaa gidinjamaanen ŋa. 40 A ga joofe non ŋa, a ro Jakkariyaawu kan ŋa na Helisabeeti kuuɲi. 41 Helisabeeti ga da Mariyaamu kuuɲindixannen mugu, ken batte su, a renmen yillankupe a furaasen ŋa. Alla Fanka Sennen yanqa Helisabeeti kanma. 42 A ferenpenti nan ti : « Alla da xeerin ɲa an da diinanta yaxarun su yi. Renme ke be gaa an faten ŋa, a da xeerin ɲa a xa da. 43 N Kamanyugon ma nan ri in wari ! Nke xa da ken darontaaxun kita kan moxo yi ? 44 Baawo, an da a wari de, dinma be in ga da an kuuɲindixannen mugu, n renmen ɲaxali ma a gaa yillankupene in noxon ŋa. 45 Wulluliŋontaaxun wa an da, anken be ga saxu Tunka Duumanten xibaari koninten ɲanŋen ŋa an da. »

46 Ken bire, Mariyaamu ti kuŋa :

« N wa Tunka Duumanten tiigana i darontaaxun ŋa ti in yonkin su yi,

47 N sondomen xa wa ɲaxalini ti in Kisindaana Alla yi,

48 baawo a da inke me tunbaari maxayanqante faayi sere yi. Ken saabu da, waxati su yi keeta seron wa tini inke da : Alla ga da yaxare ke be wulluliŋontaaxu.

49 Baawo Alla Raniyaanan da fi xooron ɲa in da. A toxon sennen ya ni.

50 Sero beenu gaa kanna a yi nan saxamo a yi, abada a na fonnansiraaxun ɲaana kun ya da, nan siro i da.

51 A da kaawafiinun dabari ti i senben ŋa. Dunderaaxun gaa sero beenu maxa, a da i sanqi.

52 A da tunkanyugun xata bakka i tunkantaaxaadun ŋa, na seri maxayanqanton segendi.

53 A da fo siren gaben kini dullunton ya yi, na bannanun xata telle, i kittiduuru.

54-55 Alla ga da laayidu be wutu o xooxonu da, laayidu ke nan xoto a maxa. A ma mungu i siroyen ɲanŋen ŋa Ibirahiima do i bonsonŋun da ma abada. Ken ya ni, a da i seron deema, oku Banisirayilaganko, o ya ga ni sikkaanon ŋa a da. »

56 Mariyaamu do Helisabeeti da xasu sikki me ɲa me kanma, ken falle, Mariyaamu saage katta i banŋen ŋa.

[Annabi Yahaya teeriye]

57 Helisabeeti nuxuntaaxun ga tinme, a jiidi ti ren yugo yi. 58 A maarenmun do a taaxanlenmon ga da a mugu ti Tunka Duumanten hinne a yi na ken siroyi xoore ɲa a da, i ɲaxali do a batten ŋa. 59 Leminen saareyen bita segundin ga tinme, i ri ti i wa a sunnandini. I ɲi a mulla na a xiri faaben toxon ya yi, Jakkariyaawu. 60 Xa Helisabeeti ti : « Aayi, a toxoreene Yahaya ya yi. » 61 I ti a da : « Ke toxo nta an maarenme su yi de. » 62 I da Jakkariyaawu yinme muumuntan tirindi ma i wa a tuunu a gaa a mulla na toxo be ro i renmen ŋa. 63 Jakkariyaawu ti i na wallaha kini i ya, a xosi a safa a kanma ti : « A toxon ni Yahaya. » Seron su kaawa ken ŋa. 64 Ken sigira yi, Jakkariyaawu neenen wase, a sefe, na Alla tiiga. 65 Sere wo sere ga ɲi ken kaara yi, kannen da a su raga. Xibaaru ku sanqi do debe su gaa giden kanma yi. 66 Sero beenu ga da xibaaru ku mugu, i da i raga i sondomun ŋa, i gaa du tirindini ti : « Yaala ke lemine ɲaana manne seran xabiila yi ? » Baawo Tunka Duumanten senben wa do a batten ŋa.

67 Alla Fanka Sennen yanqa leminen faaba Jakkariyaawu kanma, a annabinyinsefe, nan ti :

68 « Tiigeyen wa Tunka Duumanten da, Banisirayilaganko Alla, a ga faayindi katta i seron ŋa, na o hooraaxun saaga o yi,

69 a ga da Kisindaana senbenten bangandi o da bakka i komo yugo tunka Daawuda fonlaqen ŋa.

70 A da ken ɲa na i laayidun ya tinmandi, laayidu ke be a ga da a ro i fanon raqun ŋa nan ti :

71 “ Kisindaana senbenten wa o bakka o xonnon kittun ŋa, na o tanga sero yi, o fin ga nta liŋi sero ku beenu da

72 nan hinne o xooxonu yi, nan siro i da. Ti i nta mungunu do i laayidu sennen ŋa. ”

73 Laayidu ke be, i ga da a wutu o xooxo Ibirahiima da o fin kanma

74 ti : “ I wa o bakka o xonnon kittun ŋa, ken ŋa, o na katu i batta kiilu taaxe noxon ŋa

75 kuudo o na seno, nan ɲa teleŋonto yi i yaaxon ŋa koota su, o bireyen noxon ŋa. ”

76 N renme, an xa wa riini xiri Alla wuruginten annabinyinme ; baawo an wa riini Tunka Duumanten killen sirondi a kaane,

77 na a tuyindi a seron xa yi ti Alla wa yanpana i maxa i junuubunun ŋa na i kisi.

78 Baawo Alla hinneyen nta ɲameene, xenpa nta a siroyen xa yi, ken ya saabu da ni, a ga da xuraye yogo wara katta o yi gilli kanmun ŋa, a gaa xo kiyen nooron moxo.

79 Kuudo a na xurayen kini o yi, oku beenu gaa sondonfinkintaaxun biten noxon do kallen jooten biten ŋa, a na o kanda katta kisiyen killen xa yi. »

80 Ayiwa Yahaya wa xoorono, a liimaanankaaxun xa wa tallan xotoono. Fi falle, a daga daaxe gunjura yogo yi, sere ga nta taaxunu noqu be, ma koota be a ga da du bagandi xurayen ŋa Banisirayilaganko da.