[Isa Alimasiiwu teeriye]
2
Ayiwa waxati ri,
Roomu tunkanyugu xoore Kesaari Agusuto ga da ɲaamariyen kini ti i ɲiiɲen seren su toxon nan safe.
2 Ke ni a ta fanan ya yi,
ken toxosafaye gaa ɲaana ;
a ɲaŋi bire be Kirinuusu gaa maranyinmankaaxun ŋa Siiri jamaanen ŋa ya.
3 Ken ya ni,
sere su gaa telle i toxon safa i faabandeben ŋa.
4 Yuusufu xa giri Nasaara ken ya yi,
ken ga ni Galiile maran debe yogo yi,
nan daga Yehuuda maran debe yogo yi,
a toxon ga ni Beeti-leheemi,
tunka Daawuda ga saare debe be yi ;
baawo aken yinme ni Daawuda bonsonŋen ya yi.
5 A do i yaxarinxuso Mariyaamu daga i toxonun safa non ŋa.
Ken bire,
Mariyaamu warijaxanten ya ni.
6 Ayiwa na i toxo Beeti-leheemi yi,
Mariyaamu saare kootan ga ri,
7 a jiidi ti i sooma yugon ŋa.
A da yiraamen fana a yi,
na a saxundi naaburun yigefuuren noxon ŋa,
baawo ikun ma toŋora kita mukkunkonpen ŋa.
8 Ken mara yi,
nagaanaano yogo do i tanmison wa wuyini gunnen ɲa.
9 Tunka Duumanten maliika yogo da du koyi nagaanaano ku yi.
Tunka Duumanten nooron ŋaali i kanma.
Ken da i kanundi buru.
10 Xa maliika ke ti i da :
« Xa maxa kanu,
baawo in ri Xibaari Liŋe ya kiɲandi axa yi,
a gaa seren su sewondini :
11 Kisindaana saare axa da wuro ke yinme Daawuda deben ŋa,
a ya ni Kamanyugon ŋa,
Alimasiiwu,
[a wure ga ni:
“ Alla da a ya sugandi na a ɲa Kisindaanan ŋa ”].
12 Axa gaa a tuunu ti taagumanse be yi,
a faayi ke :
axa wa lendunbe yogo ɲiini yiraamen noxon ŋa,
a gaa saqa naaburun yigefuuren noxon ŋa. »
13 Maliikan jama yogo xosi giri kanxotten ŋa nan ri kafi maliika ke yi,
i gaa Alla tiigana nan ti :
14 « Wurugintaaxun wa Alla da kanmun di ;
Xeerin wa seron xa da ɲiiɲen kanma,
Alla ga da sero beenu xanu ! »
15 Bire be maliikanun ga giri nagaanaanon ŋa nan saage katta kanxotten ŋa,
nagaanaano ku ti me da :
« Ken kuŋa,
o n daga ma Beeti-leheemi,
Tunka Duumanten ga da ke be tuyindi o yi,
o na a wari. »
16 I da a soobe telle nan mundundi,
i ri Mariyaamu do Yuusufu do leminandunben ŋa,
a gaa saqa naaburun yigefuuren noxon ŋa.
17 I ga da a wari,
maliikan ga da fo be ko i da lemine ke fin kanma,
i da ken laxami.
18 Sere wo sere ga da nagaanaano ku sefen mugu,
a ɲa i maxa kawande yi.
19 Mariyaamu ken xooni da ke su mara i haqilen ŋa,
a gaa sinmene i kanma.
20 Ken falle nagaanaano ku yille do i taabattun ŋa,
i gaa Alla tiigana,
na a kuufa,
na a sababu i ga da fo be mugu,
a do i ga da fo be wari,
baawo maliikan ga da a ko i da moxo be,
fin su ɲaŋi ken moxo ya yi.
21 Koyen ga tinme,
i da a sunnandi* na a toxora Isa,
maliikan ga da toxo be ko saaxen da gelli a ga ma a warijaxen kita.
22 Mariyaamu do Yuusufu daga Yerusalaamu,
annabi Muusa Sariyan ga da fo be ramuuru yaxare saare falle senoyen kanma,
i daga ken dabari non ŋa.*
I do Isa xa daga doome na a kini Kamanen ŋa,
23 baawo a safanten wa Tawureeta yi ti :
« Ren yugo wo ren yugo,
sooman ya ga ni,
a nan kini Tunka Duumanten ŋa. »*
24 Tunka Duumanten ga da sadaxa be ramuuru :
booru filli,
yugo do yaxare,
ma makkaboorinlenmu filli,
i da ken bagandi.
25 Ayiwa yugo yogo ɲi Yerusalaamu,
a toxon ga ni Simoona.
A teleŋonten ɲi,
a wa kanna Alla yi ;
a ɲi taaxunu na Banisirayilaganko kisindaanan ya dugu,
Alla Fanka Sennen xa ɲi do a batten ŋa.
26 A da a tu ti Alla Fanka Sennen senben ŋa ti i nta kalla na a ɲi i ma Alimasiiwu wari ti i yaaxen ŋa,
Tunka Duumanten Kisindaana sugandinte.
27 Bire be Yuusufu do Mariyaamu ga da i lendunbe Isa deni Allanbatikaxooren ŋa na sariyan ramuuruyen maxafaga a kanma,
Alla Fanka Sennen da Simoona kanda katta non ŋa.
28 Simoona da leminandunbe ke wutu i bunbun ŋa,
na Alla tiiga nan ti :
29 « N Kama,
an da an laayidun tinmandi.
Saasa,
an komo yugon wara a nan kiɲe i neeman ŋa.
30 Baawo in da an Kisindaana xayinten wari ti in yaaxen ŋa,
31 An ga da Kisindaana be moxon gemundi,
seron su yaaxen gaa a yi.
32 A wa ɲaana nooro yi,
duna su gaa an tuunu ti a yi,
a wa an seron xa wurugini,
kun ga ni Banisirayilaganko yi. »*
33 Yuusufu do Mariyaamu kaawa Simoona gaa digaamu beenu koono i renmen fin kanma.
34 Simoona duwa i da,
ken falle a ti Mariyaamu xa da :
« An ma a wari de,
ke lemine wa ɲaana sababu yi na seri gabe sankundi ;
a wa ɲaana sababu yi seri gabe xa gaa kandeene Banisirayila.
A wa ɲaana Alla taagumanse yi seron gaa balla a yi :
35 ken ŋa,
a wa seri gabe sinmayi muxunton bagandini na i wara xurayen ŋa.
Anken xooni,
Mariyaamu,
an butten wa fakka tooxen ŋa ma a ga ɲa xoyi labon ya ga da a sufa. »
36 Ken da yaxare yogo ɲi non ŋa,
annabinyinmen ya ni,
a toxon ga ni Haana.
Haana ni Penuweeli ren yaxaren ya yi,
a gaa bakka Haseeri¤ fonlaqen ŋa.
A xaso siri.
A leminaaxun ŋa,
a yaxi na siino ɲeri ɲa yaxun ŋa.
37 Ken falle kiinen bono,
a maxa yaxi xadi.
A toxo kundun ŋa ma a wuyin gaa kiɲeene tansege do siino naxati yi.
A wa Allanbatikaxooren noxon ŋa waxati su yi,
a gaa Alla batta wuron do kiye,
na a ɲaaga,
nan suumi.¤
38 A xa da a ɲa Alla kuufayen ŋa nan sefe lemine ke fin kanma sero da,
ku beenu gaa Alla dukku a na Yerusalaamunkon bogu tooran noxon ŋa.
39 I ga duguta Tunka Duumanten Sariyan ramuuruyen gollun ŋa,
i do Isa saage katta i deben ŋa Nasaara,
Galiile maran ŋa.*
40 Lemine ke wa xoorono na senben kita,
fontuwaaxu xooren wa a maxa.
Alla da a neema xa.
[Isa ga siinon tanmi do fillo yi Allanbatikaxooren ŋa]
41 Siine su Yuusufu do Mariyaamu wa telle Pesaxansallen ŋa Yerusalaamu yi.
42 Isa wuyin ga da siino tanmi do fillo baga,
i do a daga doome sallen ŋa Yerusalaamu xo salle ke laadan ga da a koyi moxo be.
43 Sallen ga ɲame,
Yuusufu do Mariyaamu saage katta i kaara yi,
xa Isa ken toxo Yerusalaamu,
i ma a tu.
44 I sinmaye maxa a wa kafiini i teranlenmon ŋa,
i da kiye tera.
Ken falle ya ni,
i ga da a muuru i seron do i tuwanlenmon naxa,
45 xa i ma a wari.
Ken ya ni,
i yille katta Yerusalaamu nan daga a muuru non xa yi.
46 A bita sikkan ŋa,
i da a ɲi Allanbatikaxooren noxon ŋa,
a gaa taaxunu sariyanxaranmoxonun naxa,
a gaa i terinkana,
a gaa i tirindini.
47 Sere su ga ɲi a terinkana,
i ma xenpa kita a digaamun do a faamuyen ŋa.
48 Yuusufu do Mariyaamu ga da Isa wari,
i kaawa ken ŋa.
Saaxen ti a da :
« N renme,
manne saabu da an ga da ke moxo ɲa o yi ?
An ma a tu ti inke do an faaba su kunpa,
o gaa an muurunu. »
49 Isa ti i da :
« Axa da in muuru manne yi ?
Axa nta a tu ti in nan xawa ɲaana in Faaba kan noxon ŋa ya ba ? »
50 Xa i ma a sefen wure faamu.
51 Isa do i saage doome yi kuŋa nan daga Nasaara.
A wa Yuusufu do Mariyaamu liŋun batta.
Saaxen ken wa i kiilen toqo do ku fiinu yi tan.
52 Isa wa xoorono,
a fontuwaaxun wa tallan gaboono,
a fiinun wa tallan liŋoono Alla do seron da.*