Yohanna 11

[Lajaara xibaare]

Ke ɲa yugo yogo ya yi, a tewoyinten ga ɲi, a toxon ya ni Lajaara. A do i gidanyaxaru, kun ga ni Maarata do Maariya i taaxunten ga ɲi yi. 2 Maariyantoxo ke ya n demu ten daarini Isa Alimasiiwu taanun ŋa na i suusa ti i yinten ŋa. A gidanyugo Lajaara ya n tewoyi. 3 Waaxi yaxaru ku filli da faaren xayi Isa yi nan ti : « Kamane, an xanan tewoyinten ya ni de. » 4 Isa ga da a mugu, a ti : « Ke watte feti kalle yi, Alla tiigeyen ya ni. A wa ɲaana da yinmarawutte yi. »

5 Ku be ga ni Maarata do i waaxi yaxare kafiini Lajaara yi, Isa wa i mulla siri. 6 A da a mugu ti Lajaara ma saha, xa ken do i fi su, a da bito filli ɲa i batten ŋa, a ma daga. 7 Ken falle, a ti xaranlenmon da : « O n daga maran ŋa. » 8 I ti a da : « Xaranmoxo, a ma hari dalla, noqu be seron ga ɲi a mulla na an gididunwara, anken ya n tini o n daga non ŋa xadi ? » 9 Isa ti i da : « Leerinu tanmi do fillo ya feti kiyen ŋa ba ? Sere be gaa kiiranterene, ken nta finbini, baawo a yaaxen wa duna xurayen ŋa. 10 Xa sere be gaa wurunterene, ken ya n finbini, baawo xurayen nta a kaman ŋa. »

11 A ga da ke ko, a saage tini : « O xana Lajaara xenqe, n wa telle a wundu. » 12 Xaranlenmon ti : « Kamanyugo, a ga xenqe, ken ni sahan ya yi. » 13 Jaxa Isa ken da Lajaara kallen ya ko i da kundu, xa xaranlenmon kun da a faamu laadan xenqo ya yi. 14 Ken falle ya ni, a da a xullen ko i da nan ti : « Lajaara kara ya. 15 N ma daga non ŋa, xa in sewo axa danŋa, baawo fo wa kafiini axa danqanaaxun ŋa. Xa saasa, o n daga katta a yi. » 16 Tooma, i gaa a xilli « Fununlenme », a ti xaranlenmon kuttun da : « O n daga, o do o xaranmoxo na kara doome. »

[Isa do Maarata sefanlenmaaxu]

17 Isa ga kiɲe, a da a mugu nan ti i da Lajaara firindi bito naxati saasa. 18 Beyitaani do naxan nta dangini kilonu sikki yi. 19 Ken ya ni Yehuuda maran seri gabe ga ri duwa Maarata do Maariya da i gidanyugon faatiyen ŋa. 20 Maarata ga da a mugu ti Isa tinko deben ŋa, a gemu a yi. Maariya ken toxo taaxunu kan ŋa. 21 Maarata ti Isa da : « Kamanyugo, an gan n ɲi yere, n waaxin ma ɲi kalla. 22 Xa hari saasa in wa a tu nan ti an ga na Alla ɲaaga fo wo fo yi, a wa ken ɲaana. » 23 Isa ti a da : « An waaxin wa wundini. » 24 Maarata ti : « Yabo, n wa a tu nan ti a wa wundini kiiten kootan ŋa mene. » 25 Isa ti : « Nke ya ni wundiyen do bireyen ŋa. Sere su ga da i danqanaaxun ro in kanma, a wa bireene hari a kara falle. 26 Sere xa su gaa bireene, an ga saxu in ŋa, an nta kalla abada. An saxunten wa ken ŋa ba ? » 27 Maarata ti : « Yabo, kamanyugo, n saxunten wa a yi nan ti an ya ni ke yi, Allanlenme ke be ga n xawa riini duna yi. »

[Isa do Maariya sefanlenmaaxu]

28 Ke konŋen falle, Maarata daga i waaxi yaxaren xiri do a nan senbe nan ti a da : « Xaranmoxo wa yere, a wa an tirindini. » 29 Maariya ga da ken mugu, a dire gilli nan wuru katta Isa yi. 30 Ken da a ɲi, a ma ro deben ŋa harisa, Maarata ga daga a gemundi noqu ke be, a finna non ya yi. 31 Maariya do sero beenu gaa konpen noxon ŋa, i gaa a butten xotondini, i yaaxen wa a yi a dire gilli nan bogu. I sukke do a yi, i maxa, a telle wu xabura ke ya yi.

32 Maariya ga kiɲe Isa noqu, a ga da a wari, a da du sedi a taanun ŋa nan ti : « Kamanyugo, an gan n ɲi yere, n waaxin ma ɲi kalla. » 33 A do sero ku be gaa doome, Isa ga da i wari wuunu, ken da a butten bonondi na a sunondi moxoburu. 34 A ti i da : « Axa da a firindi minna yi ? » I ti a da : « Kamanyugo, li, an wa a walla. » 35 Isa wu. 36 I ti : « Axa da a wari, a ga ɲi a mulla moxo be yi. » 37 I yogonu ti : « A da finkinton yaaxon wuɲi, xoyi a ra ma ɲi Lajaara kisini kallen ŋa ? »

[Lajaara wundiye]

38 Isa ga kiɲe Lajaara xaburan ŋa, a yille sunoono sunoyi xote. Xabura ke ni gidinkape yogo ya yi, a texenten ga ni ti gidinlafa xoore yogo yi. 39 Isa ti : « Xa da ke gidinlafa bogu a raqen ŋa. » Kallaana ke gidanyaxare, ken ga ni Maarata yi, a ti : « Kamanyugo, a n xawa a ga timi keeta de, a bita naxatan ya faayi ke. » 40 Isa ti a da : « N ma a ko an da nan ti an ga na toŋondi, an wa Alla tunkaaxun walla ba ? » 41 I da gidinlafa ke bogu xaburan raqen ŋa. Isa ga tiirinbe na kanmun faayi a ti : « N faaba, an da in duwaawun jaabi, n wa an tiigana ti ken ŋa. 42 N saxunten wa a yi nan ti an wa in terinkana waxatin su yi, xa in gaa sefene kundu, ken ni ya ku be gaa do in kaaro ku yi na saxu a yi nan ti an ya n da in xayi. » 43 Ken falle, a xiribe nan ti : « Lajaara ! Bogu riini ! » 44 Ma furen bogunten faayi ke xaburan ŋa. A kittun do a taanun fananton gaa ti yirankiren ŋa, yiraamen wa a yeeson ŋa. Ku be gaa non ŋa, Isa ti i da : « Xa da ku bogu a yi, axa na a wara a n daga ! »

[Janbayen yetuye ti Isa yi]

(Mace 26.1-5 ; Maarika 14.1-2 ; Luka 22.1-2)

45 Sero ku be ga ri do Maariya yi, i ga da Isa golli ɲaŋunten wari, i fo gabe toŋondi. 46 Xa yogonu kun daga katta ŋa, Isa ga da ke be dabari na a ko i da. 47  do Farisigankon ga da ken mugu, i da kafu me yi nan ti : « Ke yugo na a kanma na kaawafin gaben ya dabari, o n xawa manne ɲaana saasa ? 48 O ga na toxo a walla kundu su, jaman su wa lagarini saqa a yi de ! Ken xa ga na ɲa su, Roomunko wa riini o Allanbatikaxoore ke guruja, na o xabiila ke xa sanqi. » 49 Yugo wa jama ke yi, a toxon ga ni , ken siine a ya ni sadaxakiɲandaananyinmanken ŋa, a da sefen wutu nan ti i da : « Axa nta fo mukku de ! 50 Axa ma a tu nan ti sere baane nan kara o jamaanen da, ken ya n fasu o xabiilan su ga bono ? » 51 Na a ɲi xa de, ke ma giri aken yinme yi. Ganta, a ya ni sadaxakiɲandaananyinmanken ŋa a siine. Ken ya n sigi Alla ga da ku sefo ro a raqen ŋa, baawo Alla yinme ya n da a rakutu Isa nan kara i xabiila kisiyen saabu da, 52 a xabiilan xa baane fe de, a do allanlenmu be sanqinton gaa do duna yi, i na kafi me yi nan ɲa xabiila baane yi. 53 Gelli ken koota ya ni Yehuudiyanun xirisun ga kande Isa karinden ŋa. 54 Ken saabu da, Isa ntaxa du koyini Yehuudiyanun ŋa. A giri non ŋa nan daga gunjuran ŋa jamaanen fonkaaradundebe yogo yi, a toxon ga ni Hefarayimu. A do i xaranlenmon da wuce ɲa doome yi non ŋa.

55  biren ga tinko, seri gabe giri fonkaaradundebun ŋa nan daga Yerusalaamu, kuudo saado sallen gaa kiɲene, i na katu laadan senoyen dabarini. 56 I ga da me ɲi Allanbatikaxooren ŋa, i toxo Isa muurunu i gaa me tirindini nan ti : « Xoyi a wa riini salle ke yi ba ? » 57 Ken da a ɲi Sadaxakiɲandaananyinmankon do Farisigankon da a ko jaman da nan ti sere be ga Isa noqu tu, a na a ko i na a raga.