Yohanna 10

[Nagaana siren masayila]

Isa Alimasiiwu ti : « Tonŋun-tonŋu, n na a ko axa da, sere wo sere ga ma ro ti jaxangallen raqen ya yi, an ga ro ti boten ya yi, fayaana do xennaana ya ni an ŋa. 2 Ke be gaa roono ti jaxangallen raqen ŋa, ken ya ni jaxon nagaanan ŋa. 3 Gallaqitangandaanan na gallen wuɲi a kaane. Jaxon xa wa a sefexannen tu. Nagaanan na baane su xiri ti i toxon ŋa na i bagandi. 4 A ga na jaxon su bagandi bire be, a na ware i kaane, i na sukke do a batten ŋa, baawo i wa a xannen tu. 5 Jaxo nta sukkene do sere mukke yi abada, i du wurunu nan laato bakka a yi ya, baawo i nta a xannen tu. »

6 Isa ga da ke masayila ko i da, i ma a faamu, baawo i nta a tu a ga ɲi do fo be yi. 7 Ken saabu da, Isa saage a yi. A ti : « Tonŋun-tonŋu, n na a ko axa da : Nke ya ni fonlaqen ŋa, jaxangallen raqen ni inke ya yi. 8 Ke be su ga ri in kaane, ken su ni fayaana do xennaana ya yi. Xa jaxon ma i terinka. 9 Nke ya ni fonlaqen ŋa, sere wo sere ga ro ti in ŋa, an wa kisiini. An na daga, an na ri, an na birefo kita. 10 Fayaanan ken xa riini fayi baane ya, nan karindi, nan bonondindi. Nke ken xa ri ya kuudo seron nan bire, bireyi liŋe. 11 Nke ya ni nagaana sire. Nagaana siren ya na i yonkin kinni i jaxon da. 12 Ke be ga feti nagaana, jaxa gumen xa fe, i gaa a tugana ya, fonyaaten ga na ri, a na i yinme ya muurunu na jaxon wara. Fonyaaten na ri fo raga bakka i ya na kuttun sanqi. 13 Ke kaman gollini ti i tugaaden baane ya yi, a hanmi nta jaxon ŋa. 14-15 Nke ya ni nagaana siren ŋa. Baaba wa in tu, n xa wa Baaba tu. Ken moxo baane ya ni, n wa in jaxon tu, n jaxon xa wa in tu. N wa in yonkin kinni in jaxon da. 16 Jaxo tananu wa in da, i ga nta ke galle noxon ŋa. Waajibin ya ni, n na kun xa riiti, i wa in xannen terinkana, ken ŋa i na ɲa guma baane, nagaana baane. 17 Baaba wa in xanna, baawo in wa in yonki kuyini kuudo nan yille a wuttu. 18 Ganta sere su ra nta in yonkin ragana. N yinme ya na a kuyini. Seyen wa in da, n yinme na in yonkin raga, seyen wa in da na a kuyi. N da ke ɲaamariye ya kita in faaba yi. »

19 Ku sefo saabu da, Yehuudiyanun taxandi xadi. 20 Gabe ti : « Jinnan ya na a yi, a tuurinten ya ni. Axa na a terinkana manne yi ? » 21 Yogonu xa ti : « Jinnagume nta sefene kundu, do xadi kan jinna n katta finkinte yaaxon wuɲini ? »

[Yogonu balle Isa yi]

22 Ayiwa, Allanbatikaxooren Kurunbaaxunden Salle be gaa ɲaana yi siine su mullen bire, a kiɲe. 23 Isa wa yiilene Allanbatikaxooren ŋa, Sulemaanu perinŋen wure. 24 Yehuudiyanun da me kafu a kaaran ŋa nan ti a da : « An finna manne dukku, selli ke ya ga ni an ŋa, a xullen ko o danŋa ke. » 25 Isa ti : « N da ken ko axa danŋa wo, xa axa ma saxu a yi ya. Xa axa yaaxen ken wa a yi in gaa ku gollu be dabarini ti in Faaba toxon ŋa de, ayiwa kun ya n seedene inke da. 26 Xa ken do i fi su, axakun nta toŋondini, baawo in jaxo feti axa yi. 27 Ku be ga na in jaxon ŋa, kun wa in xannen terinkana, n wa i tu, i xa wa in batta. 28 Nke ya na bireyi duumanten kinni i ya. Baanen nta bonno abada, sere xa ra nta i bakka in kitten ŋa. 29 N faaba ke be ga da i kini in ŋa, a ya n xoora fon su yi. Sere xa ra nta i bakka in faaba kitten ŋa. 30 Nke do in faaba su ni fo baane ke ya yi mene. »

31 I da gullon wutu xadi ti i wa a karini. 32 Isa ti i da kuŋa : « N da golli siri gabe dabari axa yaaxon ŋa ti in faaba ɲaamariyen ŋa de, axa na in karini ti kan golle yi kuŋa ? » 33 Yehuudiyanun ti : « O nta an karini ti an gollun siru ku yi de, xa an diganburundi ya. Fo feti an ŋa ma sere, an wa du sigindini allansigan ŋa. » 34 Isa ti i da : « A safanten nta axakun yinmenu noxon ŋa ya ba nan ti :

“ Nke, Alla, n ti : allanun kun ya ni axa yi mene ” ?

35 « O wa a tu nan ti Safandi Sennun ga da fo be ko, sere su ra nta fo bakka ken ŋa, Alla xa sefen ga ɲi taŋene ku beenu yi, a ti ya “ allanun ” kun ya ni axa yi mene. 36 Axa katta tini in da diganbure ko kan moxo n ga ti ya na in ŋa, bire be Alla yinme ya ga da in sugandi na in xayi duna yi ? 37 A ga na a ɲi in ga nta in faaba gollun dabarini, xa maxa saxu in ŋa. 38 Xa in ga na ɲi in ga a ya gollun dabarini, hari axa ga ma toŋondi ti inke yi, axa na toŋondi ti gollu ku kun ŋa, kuudo axa na katu a tuunu na a faamu nan ti in faaba wa in ŋa, n xa wa in faaba yi. » 39 A ga da ku sefo ko, Yehuudiyanun xirisun ɲi a mulla na a raga xadi, xa a duguta i ya.

40 Ken falle, Isa daga ken kaara baane yi, annabi Yahaya ga ɲi seron wanqini noqu ke be yinme. A da wuce ɲa non ŋa. 41 Seri gabe daga a sagata non ŋa nan ti : « Yahaya ma taagumanse su dabari kaawafi ga ni, xa a ga da fo wo fo ko ke yugo yi, tonŋun ya ni. » 42 Ken noqu, seri gabe da i danqanaaxun ro a kanma.