Yohanna 9

[Finkinten sahande]

Isa Alimasiiwu dagante, a da yugo yogo wari, gelli a nan saare, a finkinten ya ni. 2 Isa xaranlenmon ti a da kuŋa : « Xaranmoxo, manne ni ke yugo finkinten ga saare ? A yinme junuubunun ya saabu da ni, ma a saaraanon ya junuubunun saabu da ni ? » 3 Isa ti i da : « A yinme junuubunu fe, a saaraanon xa junuubunu fe. Ke dabari ya kuudo Alla gollun ya na tuyi ti a yi. 4 Na kiyen xurayen toxo du yi, ke be ga da in xayi, ma o na a gollun dabari ya. Wuron riini ro ya, sere su ra ntaxa golle dabarini. 5 Na a toxo in gaa duna noxon ŋa, n ya ni duna nooron ŋa. »

6 Ku sefo konŋen falle, a da i raxanjin sedi ɲiiɲen ŋa na a do dooren kafu me yi na a betexe finkinten yaaxon ŋa. 7 Ken falle, a ti a da : « Daga wanqi Siloomu gunban ŋa. » (« Siloomu » wure ya ni « Ke be ga xayi. ») Finkinte ke daga wanqi, a yaaxon wuɲi, a daga. 8 A taaxanlenmon do sero beenu ga demu a walla salumene, i ti : « Keti ke yugo ya ma ɲi taaxunu a gaa salumene gani ? » 9 Yogonu ti : « A ya ni ke ! » Xa sere tananu ti : « A ken feti ke yi, a do a nan baana ya. » Xa a yinme ti : « Nke yinme ya ni ke. » 10 I toxo a tirindini kuŋa : « An yaaxon wuɲi kan moxo ken ŋa de ? » 11 A da i jaabi nan ti : « Yugo ke be toxon ga ni Isa, ken ya n da botoxan suusa in yaaxon ŋa nan ti in da : “ Daga wanqi Siloomu gunban ŋa. ” N daga, n ga wanqi tan, n da fo wari. » 12 I da a tirindi ti : « A na minna ? » Yugo ke ti : « N nta a tu. »

[Isa kaawafin tirinde]

13 Yugo ke be finkinten ga ɲi, i do a daga katta ŋa. 14 Jaxa Isa da botoxan dabari na yugo ke yaaxon wuɲi ya yi. 15 Farisiganko ku xa da yugo ke tirindi a ga da fo wari moxo be yi. A ti i da : « A da botoxan ya suusa in yaaxon ŋa, n ga wanqi, n da fo wari. » 16 A ga da ke ko, Farisiganko yogonu ti : « Ke yugo feti Alla sere yi, baawo a ma Tuumayinkootan sariyan daro. » Ken do i fi su, yogonu ti : « Junuubuɲaŋaana katta ku kaawafin danbu dabarini kan moxo ? » Jaman taxandi kuŋa.

17 I saage yugo ke tirindini nan ti xadi : « A ga da anken be yaaxon wuɲi, an da manne faamu a xibaaren ŋa ? » Yugon ti : « Ke ! ya ni. » 18 Xa Yehuudiyanun xirisun bara saqa yugon finkintaaxun do a yaaxon wuɲiyen ŋa, i lagari faaren xayini a saaraanon ya yi nan ti i nan ri. 19 Yugo ke saaraanon ga ri, i ti i da : « Ke yugo ni axa ya renme yi ba ? Tonŋun-tonŋu, a finkinten ya n saare ? A da fo wari kan moxo xa yi saasa ? » 20 I ti : « Ke ni oku yinme ya renme yi, a finkinten xa ya n saare mene. 21 Xa, a ga da fo wari moxo be yi saasa, o nta ken tu. Sere xa be ga da a yaaxon wuɲi, o nta ken xa tu. Xa da a tirindi, a yinme ni yugu xooren ya yi, a ra wa axa jaabini. » 22 Saaraanon wa kanna Yehuudiyanun xirisun ŋa, ken ya saabu da i ga sefe kundu, baawo sere su ga saxu Isa yi, nan ti ke ya ni, i kande na ken xata bakka allanxarankan ŋa. 23 Ken ya n sigi finkinte ke saaraanon ga ti : « Lemine fe, xa da a yinme tirindi. »

24 Finkun ga ɲi ke be yi, Farisigankon da a xiri ta fillandin ŋa nan ti : « Kanu Alla yi, an na tonŋun ko. O su wa a tu nan ti ke yugo ni junuubunten ya yi. » 25 Yugon ti : « Selli junuubunte ga ni ma junuubunte ga fe, nke nta ken tu. N gaa ke be tu, n finkinten ya n ɲi, xa saasa, n yaaxon wuɲi. » 26 I saage a tirindini xadi nan ti : « A da manne ken baane dabari de ? A da an yaaxon wuɲi kan moxo ? » 27 Yugon ti : « Nke ken da a ko mene, axa ma saxu in ŋa, manne ni axa gaa tini in nan toxo saagene a yi ? Ma axa na a mulla nan ɲa a xaranlenmo ya yi ? » 28 A ga da ke ko, i xenu a kayinden ŋa nan ti xadi : « Anken du ya ni a xaranlenman ŋa, oku ni annabi Muusa ya xaranlenmo yi. 29 O wa a tu nan ti Alla da Muusa ken daalanlenmaaxu, ke ken xa, o nta hari a girinoqu tu. » 30 Yugon ti : « Ke yugo ya n da inke yaaxon wuɲi, axakun ti axa nta ken giri noqu tu, ke ni kaawafi ya yi koyi ! 31 O wa a tu nan ti Alla nta junuubuɲaŋaana jaabini. Xa sere be gaa kanna Alla yi, a gaa a sagon dabarini, a na ken kaman ya jaabini. 32 Gelli duna nan sigi, o ma demu a mukku sere do finku ga saare, sere ga da a yaaxon wuɲi. 33 Ke yugo ga n maxa feti Alla sere yi, a ra ma ɲi fo wo fo dabarini. » 34 I da du toxo nan ti : « An moxo ? Anken be ga ni junuubu duuro yi gelli an nan saare, anken ya na oku xaranŋundini ! » I da a xata bakka.

[Sondon finkinto]

35 Isa ga da a mugu nan ti i da yugon xata bakka, a daga katta a yi nan ti a da : « An saxunten wa ŋa ba ? » 36 A ti a da : « Kamanyugo, ko ni ken ŋa, n nan saxu a yi ? » 37 Isa ti a da : « An yaaxen gaa ke be yi, a yinme ya faayi sefene an da kundu. » 38 Yugon ti : « Kamanyugo, n toŋondi. » A sujudi a da. 39 Isa ti kuŋa : « N ri yinmen ni ke duna yi kuudo kiiten ya nan ɲaŋi. Finkinton yaaxon nan wuɲi, yaaxanton nan finki. » 40 Farisiganko yogo ɲi non ŋa, i ga da a mugu ku sefo koono, i ti : « O xa finkinton ya ni ba ? » 41 Isa ti i da : « Axa finkinto ga n ɲi, axa ma ɲi ɲaana junuubunto, xa saasa axa wa du walla yaaxanto, axa toqo junuubunto ya yi. »