[Yaxarin sangaanan xibaare]
2 Suxuba fana,
Isa saage katta Allanbatikaxooren ŋa.
Jaman su da me ɲi a kaaron ŋa,
a taaxu na xaranŋundinden jopa.
3 A wa ken ŋa tan,
ma Sariyanxaranmoxonun do Farisigankon riyinton faayi,
yaxare yogo wa i maxa,
i ga da a raga jeeniyen ŋa.
I do a da jaman booxo nan ri a sigindi Isa jon ŋa.
4 I ti Isa da :
« Xaranmoxo !
Ke yaxare faayi ga jeeni ya.
O da a raga na a toxo golle ke kanma ya yi xa mene.
5 Ayiwa,
Muusa Sariyan ken ti ku yaxaru do i meenu,
o na i gididunwara ya.*
An xa na ke kiitini kan moxo ? »
6 I ga da a tirindi ke yi,
i ɲi a mulla na a kita feteqe ya yi,
kuudo i na jalagindira kita a yi.
Xa Isa da i yinmen jimindi nan xenu safandini ti i doronmen ŋa ɲiiɲen ŋa.
7 I ga toxo do a tirinden ŋa,
Isa giri sigi,
a ti i da :
« Anhan !
Junuubu ga nta axa du baananbe be yi,
ken fina na i gullan sedi a yi. »
8 Ken falle,
a saage jinmi xadi nan sukke do i safanden ŋa ɲiiɲen ŋa.
9 I ga da ke sefe mugu,
i baanan-baanan daga.
Xirisun fina ya n da dagayen jopa,
ma i gaa Isa do yaxaren baane toqo,
ken siginten wa non ŋa.
10 Isa giri sigi kuŋa,
a ti yaxare ke da :
« N ma !
I daga minna xa yi ?
Sere xa ga ma an yangamaxanxata ? »
11 Yaxaren ti a da :
« Kamanyugo,
sere su !
» Isa ti kuŋa :
« Ayiwa,
nke xa nta a dabarini.
Daga,
xa maxa junuubungolle ɲa keeta de. »}¤
[Duna nooro]
12 Isa sefe jaman da xadi nan ti :
« Nke ya ni duna nooron ŋa.
Sere be ga na sukke do in ŋa,
ken kaman nta bitadunterene.
A kaman wa ŋalinooron kitta. »
13 A ga da ke ko,
Farisigankon ti a da :
« An yinme ya n seedene du da,
an seedaaxun ma wase. »
14 Isa ti i da :
« Hari in yinme ya n ga ni in yinme seedan ŋa,
n seedaaxun wa wasene,
baawo in ga giri noqu be,
n wa non tu,
n gaa saagene katta noqu be,
n wa non xa tu.
Axakun xa nta in girinoqun tu,
n gaa saagene katta noqu be,
axa nta non xa tu.
15 Seron gaa kiitini moxo be,
axakun kiitini kundun ya yi.
Nke ken xa nta sere kiitini.
16 Nke ga na kiiti su,
n kiitini ti tonŋun ya yi,
baawo in baane nta kiitini,
Baaba ke be ga da in xayi,
n do ken su ya n kiitini.
17 A safanten wa axa sariya ke noxon ŋa nan ti sero filli seedaaxun daganten ya ni.*
18 Ayiwa,
nke yinme ya ni in yinme seedan ŋa,
Baaba ke be ga da in xayi,
ken xa wa seedene in da. »
19 I ti a da :
« An ken faabe na minna yi de ?
» Isa ti i da :
« Axa nta inke tu,
axa nta in faaba xa tu.
Axa gan ɲi in tu ya,
axa ɲi in faaba xa tuunu. »
20 Isa da ku sefo ko na a toxo Allanbatikaxooren ya yi,
ken bire a wa sadaxarofon kaaran ŋa.
Sere su ma a raga,
baawo a kootan ma kiɲe.
[Isa digaamuye i dagayen fin kanma]
21 Isa ti i da xadi :
« Nke wa telle,
axa wa riini in muuru,
xa axa kalla axa junuubuntaaxun noxon ŋa ya.
Axa ra nta telle in gaa dagana noqu be yi. »
22 Yehuudiyanun ti me da :
« Eh,
ma a na du ya karini ?
A ga ti :
“ Axa ra nta telle in gaa dagana noqu be yi.
” »
23 Isa ti i da :
« Axakun ni ɲiiɲagankon ya yi ;
nke xa ni kanmuganken ya yi.
Ke dunarenmun ya ni axa yi ;
nke ken xa feti ke dunadunke yi.
24 Ken ya n sigi in ga ti axa kalla axa junuubuntaaxun noxon ya yi.
Ayiwa,
axa ga ma toŋondi nan ti N NI IN GA NI KE BE ya,
axa kalla axa junuubuntaaxun noxon ŋa ya. »
25 I ti :
« Ko ni an ŋa ?
» Isa ti i da :
« N da ken ko axa da gelli joŋaaru.
26 Fo gabe ya na in maxa axa xibaaren ŋa,
n gaa a koono axa da na axa kiiti.
Xa,
n gaa fo wo fo koono duna da,
ke be ga da in xayi,
n da a su mugu a ya yi.
Aken xa ni tonŋunten ya yi. »
27 I ma a faamu nan ti a na do Baaba Alla ya yi.
28 Isa ti i da kuŋa :
« Axa ga na Seren Renmen wutu kanmun ŋa koota be ya ni,
axa gaa a tuunu nan ti N NI IN GA NI KE BE ya yi.
Axa wa a tuunu nan ti in nta fo wo fo dabarini ti in yinme yi,
xa Baaba ga da in xaranŋundi ke be yi,
n na ken ya koono axa da.
29 Ke be ga da in xayi,
a wa do in batte,
a ma in sedi,
baawo fi be ga n liŋa a da,
n na ken ya dabarini bire su. »
30 A gaa ku sefo konŋen ŋa,
seri gabe saxu a yi.
[Hooron do komon]
31 Yehuudiyanu be ga saxu Isa yi,
a ti i da :
« Axa ga na toxo in ku sefo kanma,
axa wa ɲaana in xaranlenmo yi haxiixa.
32 Ken ŋa,
axa wa tonŋun tuunu,
tonŋun na axa hooraaxu. »
33 I ti a da :
« Oku ni annabi Ibirahiima bonsonŋun ya yi,
o ma ɲa sere kome yi abada.
An katta tini tonŋun na o hooraaxu kan moxo ? »
34 Isa ti :
« Tonŋun-tonŋu,
n na a ko axa da,
sere wo sere gaa junuubu ɲaŋiini ya,
an na komaaxun ya yi junuubun maxa.
35 Komen feti abadankaadunke,
kan renmen ken xa ni abadankaadunken ya yi.
36 Renmen ya ga na axa hooraaxu,
axa wa hooraaxunu lewu !
37 N wa a tu nan ti Ibirahiima bonsonŋun ya ni axa yi,
xa axa wa a mulla na in kari,
baawo axa bara in digaamun ŋa.
38 Nke ga da ke be wari in faaba noqu,
n sefene ti ken ya yi.
Axa xa ga da ke be mugu axa faaba yi,
axa na ken ya ɲaana. »
39 I xa ti :
« Oku faaba ni Ibirahiima ya yi.
» Isa saage tini i da :
« Ibirahiima renmun ya gan n ɲi axa yi,
axa ɲi gollini xoyi a moxon ya yi.
40 Xa saasa,
axakun wa a mulla na in kari.
Na a ɲi xa,
Alla ga da tonŋu be xaranŋundi in ŋa,
n da ken ya ko axa da.
Ibirahiima ken ma ɲi gollini kundu yi abada.
41 Axa faaba ga ni ke be yi,
axa gollini xoyi ken yinme ya moxon ŋa.
» I ti :
« Eh,
oku kun xa feti janganlenmu yi de !
O su ni faaba baane ke ya yi,
Alla ! »
42 Isa ti i da :
« Axa faaba gan n ɲi Alla ya yi,
axa ɲi in xanna ya,
baawo in na yere a ya da.
N ri axa noxo ke yi a ya da.
N ma ri ti in yinme yi,
a ya n da in xayi.
43 Manne saabu da in gaa fo be koono,
axa ra ga nta a faamunu ?
Baawo axa bara in digaamun terinkana.
44 Axa faaba ni Ibiliisa ya yi,
axa na a ya liŋun dabarini.
Gelli joŋaaru,
serikallaanan ya ni,
a ra nta sikki tonŋun kaaran ŋa,
baawo tonŋun nta a golle su yi.
A ga sefe tan,
a na gaaren ya koono,
baawo a sefene ti i yinme ya yi,
na a sababun ɲa,
aken yinme ya ga ni gaaranten ŋa,
gaaren faaba ya ni.
45 Xa inke na tonŋun ya koono,
ken ya saabu da axa ga nta saqa in ŋa.
46 Ko na axa yi,
a kanman ra gaa junuubu baane sigindini inke yi ?
N gaa tonŋun ya koono,
manne ni axa ga nta saqa in ŋa ?
47 Sere su ga ni Alla ya sere yi,
a na Alla digaamun ya terinkana.
Axa ga nta in terinkana,
Alla sero ya feti axa yi. »
[Isa do Ibirahiima]
48 Yehuudiyanun ti :
« Tonŋun ya n nta o maxa gani,
o ga ti Somooronken ya ni an ŋa,
jinnan xa wa an ŋa. »
49 Isa ti i da :
« Jinna nta inke yi de !
N na in faaba ya daroono,
xa axakun wa in roxono.
50 Nke nta daroye muurunu in yinme da,
muurundaana wa a yi in danŋa,
ken ya n kiitini.
51 Tonŋun-tonŋu,
n na a ko axa da,
sere wo sere ga na in digaamun tanga,
ken kaman nta kalla abada. »
52 A ga da ku ko,
Yehuudiyanun xirisun ti a da :
« Saasa ke,
o saxu a yi nan ti jinnan wa an ŋa.
Ibirahiima kara,
annabinyinmun xa kara,
anken ri an ti :
“ Sere wo sere ga na saxu in xaranŋundinden ŋa,
ken kaman nta kalla abada. ”
53 Ken kuŋa,
anken ya n dara o faaba Ibirahiima yi ba,
ma annabinyinmu ku be ga kara,
an ya n dara kun ŋa ?
An na du maxa ko ken ŋa de ? »
54 Isa ti i da :
« N yinme ya gan n da darontaaxun kini du yi,
xiima nta ken ŋa.
N faaba ya n da darontaaxun kini in ŋa,
axa ga ti ke be ni axa Alla yi.
55 Axa nta Alla tu,
ken ya ni,
xa inke wa a tu.
N ga na ti in nta a tu,
n ɲaana gaarante xo axa moxon ya yi.
Xa in wa a tu,
n wa a sefon batta.
56 Axa faaba ga ni Ibirahiima ke be yi,
a sewo nan ɲaxali,
a da a sinma i wa in kiye ke walla ya,
a da a wari xa,
a ɲaxali. »
57 I ti a da :
« An ti manne ?
An ma hari tankarage siine baga,
an da Ibirahiima wari ? »
58 Isa ti i da :
« Tonŋun-tonŋu,
n na a ko axa da,
saado Ibirahiima gaa bangene,
N NI IN GA NI KE BE ya. »
59 A ga da ku sefo ko,
i xenu gullon sagaranden ŋa.
Xa Isa sanku jaman noxon ŋa nan bogu Allanbatikaxooren ŋa.