Yohanna 7

[Isa Alimasiiwu waaxinun saxiironbalaaxu]

Ken dangi falle, Isa Alimasiiwu da maran su wura. A ma ɲi a mulla nan daga maran ŋa fina, baawo Yehuudiyanun xirisun ɲi a muurunu na a kari. 2 Ken da a ɲi Yehuudiyanun tinko. 3 Isa waaxinun ti a da : « An nan xawa telle Yehuuda maran xa yi ya, an gaa ku gollu be dabarini, an xaranlenmo na i wari. 4 An gaa a mulla seron na an tu, an ma xawa toqo muqen ŋa. An gaa ku fiinu be dabarini, duruxoto an na an du koyi duna su ya yi. » 5 Na a ɲi xa, waaxinu ku yinmenu ma saxu a yi ya. 6 Isa da i jaabi nan ti : « Waxatin ma ri inke da fina. Xa, waxatin su wa genme axakun ŋa. 7 Dunadunko ra nta axakun xonno moxo su yi. Xa i na inke xonno ya baawo in na i ɲangolli burun ya seeda. 8 Axakun nan daga salle ke yi ; nke nta telle ke salle yi, baawo in waxatin ma kiɲe. » 9 A da ke ko i da. A toxo Galiile yi.

[Isa dagaye Fateyilagaren sallen ŋa]

10 Isa waaxinun daga falle sallen ŋa, a xa daga, a ma bange de, a muxuntandaga ya. 11 Yehuudiyanun xirisun xa wa a muurunu salle ke noxon ŋa, i gaa tini : « A na minna ? » 12 Jama ke noxon ŋa, sefe misen gabo a fin kanma, yogonu ti : « Yugo ke siren xa ya ni de », i yogonu xa na ti : « Tonŋu fe, a na seron ya sankundi. » 13 Xa Yehuudiyanun xirisun xaaxantaaxun saabu da, sere su ra nta sefene ti i sagon ŋa a fin kanma.

14 Isa gaa dagana xaranŋundindi Allanbatikaxooren ŋa, ken da a ɲi sallen koyen kiɲe taxanden ŋa. 15 A xaranŋundindi moxon ga da Yehuudiyanun kaawafi, i ti : « Ke katu ku sefo tuunu kan moxo, a xa ma xara ? » 16 Isa ti i da : « N gaa fo wo fo xaranŋundini, a ma giri inke yi. Ke be ga da in xayi, n da a su kita ken ya yi. 17 Sere be gaa a mulla na Alla liŋun ya dabari, a wa a tuunu selli ke xaranŋunde ga giri Alla ya yi ma a ga giri in yinme ya yi. 18 Sere be gaa sefene ti i yinme sefon ŋa, ken na daroyen ya muurunu i yinme da. Xa ke be gaa daroyen muurunu i xayindaanan ya da, ken ya ni tonŋunten ŋa, gaare su nta ken fiinun ŋa. 19 Annabi Muusa ya ma kini axa yi ba, ma kan moxo ? Ayiwa axa du baananbe su nta a ɲaamarindun batta. Manne ni axa gaa in muurunu kallen ŋa ? » 20 Jaman ti : « Jinnan ya na an ŋa, ko na a mulla na an kari ? » 21 A da i jaabi nan ti : « N da kaawafi baane ya dabari, axa su faayi ga lasame. 22 Axa terinke de ! Muusa Sariyan ti axa ren yugun nan sunne, laada be ma hari jope ti Muusa yinme yi, gelli o kisimanu ya ni. Xa Muusa Sariyan saabu da, hari ŋa, axa wa sunandindini. 23 Ayiwa, selli sunnanden gaa ɲaana Tuumayinkootan ŋa kuudo na Muusa Sariyan ya batu, manne ni axa gaa buttu inke wure ti baawo in da sere muuman sahandi Tuumayinkootan ŋa ? 24 Xa fate kiitini ti axa yaaxen gaa ke be yi, xa kiiti ti teleŋontaaxun ya yi. »

[Isa Alimasiiwunnaaxun tirinde]

25 Yerusalaamunko yogonu ti : « I nta ke yugo ya muurunu na a kari gani ? 26 Axa yaaxen nta a yi sefene jaman ŋa, sere su ma fo ko a da ! Xoyi fankamanun yinme da a tu tonŋu nan ti ke ya ni ke yi ba ? 27 Xa Kisindaanan ken ga na bange, sere su nta a saarenoqun tuunu, o wa ke yugo ken xa saarenoqun tu. » 28 Isa gaa xaranŋundindini Allanbatikaxooren ŋa, a xiribe nan ti : « Tonŋun-tonŋu, axa wa in tu ba ? Axa wa in saarenoqun tu ba ? N ma ri ti in yinme yi. Ke be ga da in xayi, ken ken ni tonŋunten ya yi. Axakun nta a tu, 29 xa inke wa a tu baawo in giri a ya yi. A ya n da in xayi. »

30 Ken noqu, i da a xanu na a raga, xa sere su ma kati a yi, baawo a kootan ma kiɲe. 31 Jama ke noxon ŋa, seri gabe xa ya saxunten na a yi xa mene, i ti : « Xoyi Kisindaana ke ga na ri, a wa taagumanse dabarini, fo be ga n gaba ke yugo taagumansi dabarinton ŋa ba ? »

[Isa sareye]

32 Ke be gaa mullin koniini Isa xibaaren ŋa, a kiɲe ŋa. do Farisigankon da Allanbatikaxooren tangandaanon wara telle Isa raga kuŋa. 33 Isa ti i da : « N do axa wa finna fonne ɲaana doome. Ken falle, n na saage katta ke be ga da in xayi. 34 Axa na ri in muuru, axa nta in walla. N gaa telle noqu ke be yi, axa ra nta dagana non ŋa. »

35 Yehuudiyanun toxo me tirindini ken ŋa nan ti : « A telle minna o ra ga nta a kitta ? Ma a na a mulla nan daga kafi Yehuudiyanu be sanqinton gaa do xabiila kuttun ŋa ya ? A ra wa ɲaana a gaa a mulla nan daga i tuwaaxu ke xaranŋundi xabiila kuttun xa yi ya ? 36 A ga na ti : “ Axa na ri in muuru, axa nta in walla. N gaa telle noqu ke be yi, axa ra nta dagana non ŋa. ” Ken wure ni manne yi ? »

[Bireyen waranlaqe]

37 Sallen koota lagare, ken be ga n xoora kooton su yi, Isa sigi jaman kaane a xan xoore a ti : « Daqu gaa sere be yi, a kaman nan ri katta in ŋa nan mini. 38 Sere su ga saxu in ŋa, ŋalijin waranlaqen ya n funtini bakka a kaman sondomen ŋa xoyi Safandi Sennun ga da a ko moxo be. » 39 Isa ga da ke ko, a koore katta ya yi nan ti sero be ga saxu i ya i wa riini a kita. Fo be ga sigi ken waxati Fanka Sennen ga ma yanqa seron ŋa, ken ni ya Isa ga ma ro i nooron noxon fina.

[Jaman taxandiye]

40 Jaman ga da Isa ku sefo mugu, a fo gabe ti : « Sikka yinme nta a yi, ke yugo ni o gaa ke be dukku ya. » 41 Yogonu ti : « Kisindaana ke ya ni. » Xa yogonu kun ti : « Xoyi Kisindaana ke ra wa bakka Galiile yi ? 42 Safandi Sennun ma ti Kisindaana ke ɲaana Tunka Daawuda bonsonŋen ya yi ba, a saarene ya yi, Daawuda yinme debe ? » 43 Ke ya n da jaman taxandi do a xibaaren ŋa. 44 Yogonu ɲi a mulla na a raga, xa sere su ma katu kitten saqa a kanma.

45 Tangandaanon saage katta sadaxakiɲandaananyinmankon do Farisigankon ŋa. I da tangandaanon tirindi ti : « Manne saabu da axa do a ga ma ri ? » 46 Tangandaanon ti : « Sere su ma demu sefene xo ke yugo moxon ŋa abada. » 47 Farisigankon saage tini : « Manne, a da axa xa kita ya ba ? 48 Kan Farisiganke ma kan xirise saxunten ni ke yugo yi ? 49 Ke jama ken xa nta fo wo fo tu Muusa ŋa, seri langanton ya ni ! »

50 Yugo yogo ɲi kapa i ya, ken ga ni Nikodeemu yi, aken ya n demu telle Isa sagata, a ti sero ku da : 51 « O sariyan duŋe na sere kiiti na a ɲi o ma a terinka sefene, na a ɲi o nta a tu a ga da fo be ɲa ba ? » 52 Sero ku da a jaabi nan ti : « Galiilenken ya ni an ŋa ba ? Safandun jaga, an wa a faamunu nan ti annabinyinme su nta bakka Galiile yi. »

53 {Ken falle, sere su daga i kan ŋa. }