Yohanna 6

[Jaman yigandiye]

(Mace 14.13-21 ; Maarika 6.30-44 ; Luka 9.10-17)

Ken falle, Isa Alimasiiwu daga ti xaaren ken kaara baane yi. I na Galiile ken xaare ya xilli « Tibeeri xaare » xa yi. 2 Jama xoore wa do a batten ŋa, baawo i seede a kaawafintanjaarandun ŋa. 3 Isa do i xaranlenmon sege giden kanma nan taaxu. 4  tinko, ken ga ni Yehuudiyanun salli xooren ŋa. 5 Isa ga da i kaaron faayi, a yaaxen wa jama xoore yi riini. A ti Filipu da kuŋa : « O na buuru xobonte kitta minna na ke jama yigandi ? » 6 Isa da ke ko na Filipu ya xenpe. Ken ga fe, Isa yinme wa a tu i gaa riini ke dabari. 7 Filipu ti : « Hari sere su ga na xenpe buuru dunŋe ya yi, kamo filli godoxulle nta fo bakka. » 8 Xaranlenmo ku du baananbe tana, ken ga ni Simoona Piyeeri waaxi Handere yi, a xa ti : 9 « Yugunne yogo wa yere, buuruyinmu karagi do ɲexenlenmu filli gaa a maxa, xa ken katta manne sirono ke jama xoore yi ? » 10 Isa ti : « Xa da a ko jaman da ti a su nan taaxu. » Ken noqu sokkinxayen gaben ni moxosiri, jaman taaxu. A wa wujunu karagi yugo me bakka. 11 Isa da buurunu ku wutu na Alla tiiga, ken falle na a taxandi sokke ke kanma seren su naxan ŋa. A da ɲexenlenmu ku xa ɲa ken moxo baane ya yi na i taxandi jaman ŋa, be su gaa haqe be mulla. 12 Jaman su yige nan fogu. Isa ti i xaranlenmon da : « Xa da buuru ke kutten sagara, a n maxa bono. » 13 Jaman ga da buuruyinmu ku karagi kutten be toxo, xaranlenmon da i sagara. A gemu kanda fakko tanmi do fillo ya yi. 14 Jaman ga da Isa ken taagumansi xoore wari, i ti : « Sikka yinme nta a yi, ke yugo ni ke be ga n xawa riini duna yi ya. » 15 Isa da a tu nan ti i faayi riini i senbentan ɲa tunkanyugo ya yi. Ken saabu da, a bogu i naxan ŋa, a baane daga giden kanma yi xadi.

[Isa tereye jin kanma]

(Mace 14.22-33 ; Maarika 6.45-52)

16 Wuron gaa roono, Isa xaranlenmon yanqa xaaren ŋa. 17 I ro fuure yogo noxon ŋa nan taŋe yi, xaaren ken kaara baane yi. Wuron ro, xa harisa Isa ma kiɲe i ya. 18 Fanka kasape xa giri, jin wa girinanxenne siri. 19 Ken da a ɲi xaranlenmon da kilonu karagi ma tunmu me wura. Fi falle, i da Isa wari terene jin kanma riini katta i fuuren ŋa. I kanu. 20 Xa Isa ti i da : « Xa maxa kanu de, nke ya ni ! » 21 I ɲi a mulla na a rondi fuuren ŋa. Xa ken noqu su, fuuren xosi kiɲe i ga ɲi a mulla nan daga noqu ke be yi.

[Isa muurunde]

22 Yillen ga kare, ku be ga toxo xaaren ken kaara baane yi, i da a tu ti Isa xaranlenmon ga daga fuure ke be yi ken baane ya n ɲi ga toxo. Isa ken xa ma ro kapa i ya ken fuure noxon ŋa. Xaranlenmon baane ya n daga. 23 Ken da a ɲi, fuuru yogonu ri nan giri Tibeeri deben ŋa, i kiɲe noqu ke be Kamanen ga da Alla tiiga na jaman yigandi. 24 A ga xura jaman da nan ti Isa do i xaranlenmon su daga ya, i ro kun fuuru yi nan daga Isa muuru Kafarinoomu yi.

[Bireyen buuru]

25 Seron ga da a ɲi xaaren ken kaara baane yi, i da a tirindi nan ti : « Xaranmoxo, anken ri yere yi kan bire ? » 26 Isa ti i da : « Tonŋun-tonŋu, n na a ko axa da, axa gaa in muurunu, axa nta in muurunu ti baawo axa da in taagumansun wure tu de, aayi ! Axa ga da buurun yiga nan fogu, axa na in muurunu ti ken ya yi. 27 Dullen gaa yigande be yigeyen falle, axa maxa golli ti ken ŋa ; yigande be yige falle dulle ga ntaxa axa ragana abada, axa golli ti ken ya. Nke be ga ni ŋa, nke ya na ken yigande kinni axa yi, Alla ke be ga na in Faaba yi, a yinme ya n da i senben taagumansen ro in ŋa. » 28 Jaman da Isa tirindi ti : « Ayiwa, o nan xawa kan gollu dabarini, kun gaa genme Alla yi ? » 29 Isa ti i da : « Golle ke be gaa genme Alla yi, ken ni ya nan saxu a ga da ke be xayi. » 30 A ga da ke ko, i ti : « An katta kan taagumansi xoore dabarini kuŋa kuudo o na a wari nan katu saqa an ŋa ? An na manne dabarini ? 31 O kisimanu gaa gunjuran ŋa, i bire mannan ya yi, xoyi a gaa Tawureeta noxon ŋa moxo be nan ti :

“ A da buurun girindi kanmun ŋa i danŋa. ” »

32 Xa Isa ti i da : « Tonŋun-tonŋu, n na a ko axa da, buuru ke be ga ɲi gilli kanmun ŋa, annabi Muusa buuru kininte fe, n Faaba ya buuru kininte ni, buurun haxiixan xa ya ni mene. 33 Baawo, buuru be ga giri Alla yi, ken ni ke be ga yanqa bakka kanmun ŋa ya, na ŋalintaaxun kinni duna su yi. »

34 I ti kuŋa : « Kamanyugo, saage ken buuru kinni o yi bire su ke. » 35 Isa ti i da : « Nke ya ni ken ŋalibuurun ŋa. Sere be ga na ri katta in ŋa, ken kaman ntaxa dullunu hari abada. Sere be ga na saxu in ŋa, ken kaman ntaxa daqunu hari abada. 36 N da a ko axa danŋa xa de, axa da in wari, xa axa ma saxu in ŋa. 37 Baaba gaa sere su kinni in ŋa, a wa ɲaana in xalle yi. Ayiwa, sere xa su ga ri katta in ŋa, n nta a kaman sedde sellan ŋa. 38 Baawo in yanqa yinme ɲiiɲen kanma wure feti na in sagon dabari, xa, ke be ga da in xayi, n na ken ya sagon dabarini. 39 Ke be ken xa ga da in xayi, a liŋun ni ya, baane nan maxa sanku bakka i ga da ku be kini in ŋa. Koota lagaren xa ga na kiɲe, n na i su wundu gilli kallen ŋa. 40 Tonŋu, Baaba liŋun faayi : sere su ga faayindi katta inke be ga ni Renmen ŋa nan saxu in ŋa, ken kaman na bireyi duumanten kita. Koota lagaren ga na kiɲe, n xa na a wundu bakka kallen ŋa. »

41 Yehuudiyanu yogonu xenu xuumu-xuumuyen ŋa ti a yi kuŋa, baawo a ti : « Nke ya ni buuru be ga giri kanmun ŋa. » 42 I toxo tini : « Axa yaaxen nta a yi, keti Isa ya fe ga ni, Yuusufu renme ke ? O wa a ma do a faaba su tu ! Saasa, a katta tini kan moxo ike giri kanmun ya yi ? » 43 Isa ti i da : « Axa fate xuumu-xuumunu me naxa ! 44 Sere su ra nta riini katta inke yi, Baaba yinme be ga da in xayi ya ga ma sere be xiri, ken falle, n na a kaman wundu gilli furun naxa koota lagaren ŋa. 45  da a safa nan ti :

“ Alla wa a tuwaaxun kinni a su yi. ”

« Sere su ga da Baaba sefon terinka, a kaman ga duŋe ti a xaranŋundinden ŋa, a wa riini katta inke yi. 46 Sere su ma Baaba wari abada, a ga ma ɲa sere be ga giri Alla banŋe, ken ken da Baaba wari. 47 Tonŋun-tonŋu, n na a ko axa da : sere su ga danqanaaxu, ken kaman wa bireyi duumanten kitta, 48 Nke ya ni ŋalibuurun ŋa. 49 Axa kisimanu da mannan yiga gunjuran ŋa, xa ken ma sigi i ga ma kara. 50 Ke buuru ken xa giri kanmun ŋa ya, kuudo sere wo sere ga na a yiga, a nan maxa kara. 51 Nke ya ni ŋalibuuru, nan giri kanmun ŋa, sere wo sere ga na ke buuru yiga, ken kaman wa bireyi duumanten kitta. N gaa duna birandini ti ke buuru be yi, n fatantiyen ya ni in gaa a kinni i ya. »

52 Ku sefo falle, Yehuudiyanun manqa, manqan xote nan ti : « Ke katta i fatantiyen kinni o yi kan moxo o gaa a yigana ? » 53 Isa ti i da kuŋa : « Tonŋun-tonŋu, n na a ko axa da, axa ga ma Seren Renmen fatantiyen yiga na a foren mini, axa nta bireye kitana axa yonkinun ŋa. 54 Sere be ga na in tiyen yiga na in foren mini, bireyi duumanten na ken kaman ya da, n na a kaman wundu koota lagaren ŋa. 55 Tonŋu, n fatantiyen ni biraadon haxiixan ya yi ; n foren xa ni minifon haxiixan ya yi. 56 Sere be ga na bire in tiyen do in foren ŋa, n na sabati a kaman ŋa, a kaman xa na sabati in ŋa. 57 Baaba be ga da in xayi, bireyen na a ya yi, a ya na in birandini. Ken moxo baane ya ni, sere be ga na i biraadon ɲaŋi inke ya yi, a kaman bireene ti in ya yi. 58 Ke ya ni buurun ŋa, a ga giri kanmun ŋa, a do axa kisimanu ga da buuru be yiga nta baana. Ikun kara, xa sere be ga na ke buuru yiga, a wa toqo bireene ma abada. »

59 Isa da ke ya xaranŋundi seron ŋa Kafarinoomu noxon ŋa.

[Bireyi duumanten sefo]

60 Isa ga da ke ko, a sukkanlenmon fo gabe ti : « Ku sefo xaxacun ya ni buru, sere katta toqo ke terinkana kan moxo ? »

61 I gaa xuumu-xuumunu ti ku sefo yi, Isa da a tu, ken ya ni a ga ti i da : « Ken da axa sufa ya ba ? 62 Axa ga na Seren Renmen segenten wari katta a ga giri noqu be yi xa, axa ɲaana kan moxo ? 63 Alla ya na bireyen kinni. Faten feti fo wo fo yi. N ga da sefo ku be ko axa da, i giri Fanka Sennen ya yi, i gaa birandindini. 64 Xa sero wa kapa axa yi i ga ma toŋondi. » Ke su, gelli fin joŋaaru, Isa ken wa a tu ku be ga nta riini saxu i ya ; ke be gaa riini a janba, a wa ken xa tu. 65 A ti xadi : « Ken yinme ya saabu da in ga ti axa da : sere su ra nta riini katta in ŋa, Baaba ya ga ma a xiri. »

66 Gelli ke, a sukkanlenmon fo gabe da i falle koyi a yi, na a teranlenmaaxun wara. 67 Isa tiirinbe katta faarun tanmi do fillon ŋa na i tirindi ti : « Ayiwa axakun xa, axa na a mulla nan daga ya ba ? » 68 Xa Simoona Piyeeri ti a da : « Kamanyugo, o telle katta ko yi ? Bireyi duumanten sefon ya na an maxa. 69 Oku kun da o danqanaaxun su ro an ya kanma, o wa a tu xa nan ti an ya ni Alla seri senni xayinten ŋa. » 70 Isa ti : « Xoyi inke ya ma axa sero tanmi do fillon sugandi ? Xa, baane wa kafiini axa yi, xa ya ni de ! » 71 A da Simoona Hisikarooti renme taagumansa ti ku digaamu ya yi. A ya ni faaru ku tanmi do fillon du baananbe be gaa riini Isa janba.