Yohanna 5

[Yugu muruxunten sahandiye]

Wuce dangi falle, Isa Alimasiiwu daga Yehuudiyanun salle yogo ɲa . 2 Ken debe yi, fonlaqe yogo wa no, i gaa xilli « Tanmisanlenmun Fonlaqe », jingunba xoore yogo wa non ŋa, biiru karagi wa yoorini a kaaron ŋa, habaraaninxannen ŋa, i wa a xilli « Beeti-saata. » 3-4 Jangiranta gabe wa saqa biiru ku wure : finkinto, jogooninto, a do muruxunto. 5 Yugo yogo wa non ŋa, tanjikke do siino segi a gaa watten maxa. 6 Isa da a wari saqa. A da a tu ti a dalla saqa non ŋa. A ti a da : « An wa a mulla an nan saha ba ? » 7 Watunte ke ti a da : « Kamanyugo, sere su nta in maxa, jin ga na ɲi dilleene, a kaman gaa in rondini. Nke ga na ti in nan deeri dagana, yogo na in saama. » 8 Isa ti a da kuŋa : « Giri ! An daagon wutu, an nan tere. » 9 Ken sigira su, yugon saha. A da i daagon wutu nan tere.

Xa ke ɲaŋi ya yi. 10 Yehuudiyanun xirisun da yugon xiri nan ti a da : « Lenki ni Tuumayinkootan ya yi, an ma xawa ke daago wuttu. » 11 A da i jaabi nan ti : « Ke be ga da in sahandi, a ya n ti in da : “ An daagon wutu, an nan tere. ” » 12 I ti a da : « Ko n ti an na an daagon wutu nan tere ? » 13 Xa jaman gaboyen saabu da, yugo ke kori Isa tuunu, a sanku a maxa jaman noxon ŋa. 14 Wuce dangi falle, Isa da a gemu Allanbatikaxooren beran ŋa. A ti a da : « An faayi ga saha. Xa duruxoto an nan maxa junuubungolle ɲa keeta, fo nan maxa an kita, fo be ga n xoto ke yi. » 15 Yugon xosi daga a ko Yehuudiyanun xirisun da nan ti Isa ya n da i sahandi.

[Faaben do Renme]

16 Gelli ke, Yehuudiyanun xirisun xenu Isa tooronden ŋa na a sababun ɲa a ga da ku dabari Tuumayinkootan ŋa. 17 Isa ti i da : « Hari saasa, n Faaba do gollen ya na me yi, n xa na ken golle ya yi. » 18 Ke da i tallan wara feera muuriyen ŋa, i ra gaa Isa karini. A ga da Tuumayinkootan sariyan bonondi, ken baane fe de : a gaa Alla xa xilli i faaba, na du do Alla ɲorondi ya ni. 19 Isa ti : « Tonŋun-tonŋu, n na a ko axa da, nke be ga ni Renmen ŋa, n ra nta fo wo fo dabarini ti in du yi. N ga da in Faaba wari fo be dabarini, n na ken baane ya dabarini. Faaben ga na fo be dabari, Renmen xa na ken me ya dabarini, 20 baawo Renmen xanuyen wa Faaben ŋa. Faaben gaa fo wo fo dabarini, a wa a koyini Renmen ŋa. A wa riini fiinu tana dabarinden koyi a yi, kun ga n xoora axa ga da ku beenu wari. Ken ŋa, axa na kaawafi. 21 Baaba gaa furun wundunu na i birandi moxo ke be, Renmen xa na bireyen kinni sere be ga n liŋi a danŋa ken moxo ya yi. 22 Baaba yinme nta sere kiitini, a da a su kiiten kini Renmen ya yi, 23 kuudo seren su na a daro xoyi i gaa a Faaba darono moxo be. Sere be ga nta Renmen darono, a Faaba ke be ga da a xayi, a kaman nta ken ya darono.

24 « Tonŋun-tonŋu, n na a ko axa da, n gaa fiinu ku be koono axa da, sere su ga na i terinka nan saxu in Faaba ke be ga da in xayi, bireyi duumanten wa a kaman maxa. Ayiwa, a kaman ntaxa kiitiini xa mene, a du bogu kallen ya yi nan ro bireyen ŋa. 25 Tonŋun-tonŋu, n na a ko axa da : kootan wa riini, a kiɲe yinme, waxati be furun gaa saagene xannen mukku. Ayiwa, ku beenu ga na a terinka, i wa bireene. 26 Baaba bireyen gaa a yinme yi moxo ke be yi de, a da a denindi renmen xa da nan ti a xa bireyen nan ɲa a yinme yi ken moxo baane ya yi. 27 Faaben da ɲaamariyen xa kini a yi a nan kiiti baawo ya ni. 28 Xa maxa kaawafi de ! Kootan wa riini, fure su gaa xaburan noxon ŋa, a gaa Seren Renmen xannen mukku. 29 Ayiwa, i ga na a mugu, i wa wundini : ku beenu ga da golli sirun dabari, i wa bireyi duumanten kitana ; ku beenu ga da golli buren dabari, i wa yanganxateene. 30 Nke yinme be ga ni, n ra nta fo wo fo ɲaana ti in yinme yi. N Faaba ga da in ɲaamari moxo be, n kiitini kundun ya yi. Ayiwa, n kiiten xa teleŋonten ya ni, baawo in nta in liŋu dabarini ; ke be ga da in xayi, n na ken ya liŋun dabarini. »

[Allanlenmen seedaano]

31 « Selli inke yinme ya ga na in yinme seedan ŋa, n seedaaxun nta wasene. 32 Xa seeda tana wa in ŋa. Ayiwa, n wa a tu a seedene in da ti tonŋu ya yi. 33 Axakun yinmenu ya n da faarun wara katta Yahaya yi na a tirindi, a seede ti tonŋun ŋa. 34 Nke yinme ke, n haaju nta sere seedaaxu yi, xa in da ken ko ya kuudo axa ya na kisi. 35 Yahaya ɲi xoyi lanpa kumunten ya yi, a gaa xurayen kinni axa yi. Axa duŋe ɲaxalini ti xuraye ke yi waxati lamaane ya yi tan. 36 Xa seeda wa in ŋa, ke be ga n xoora Yahaya yi. Ken ni in Faaba ga da gollu be kini in ŋa in na i dabari ya. Yabo ke, n gaa gollu ku be dabarini, kun na a koyini nan ti Baaba ya n da in xayi. 37 Ken baane xa fe de : Baaba be ga da in xayi, a yinme seede in danŋa. Xa, axa ma a xanne mugu abada ; axa ma a yeeson wari abada. 38 A digaamun sabatinton nta axa sondomun ŋa, baawo a ga da ke be xayi, axa nta saqa a yi. 39 Axa wa Safandi Sennun jagana, baawo axa sinmeyen ŋa, axa na bireyi duumanten kitana ti i ya yi. Na a ɲi xa, kun safandu yinmenu ya n seede ti inke yi. 40 Xa, axa ma duŋe riini katta in ŋa kuudo axa na bire. 41 N nta do seron nan sooxo in ŋa. 42 Ganta, n wa axa tu : xanuyen nta axa maxa katta Alla yi. 43 Nke ri ti in Faaba toxon ya yi, axa ma duŋe in ŋa. Xa sere tana ga na ri ti i yinme toxon ŋa, axa wa duŋeene ken ŋa ! 44 Axa katta danqanaaxunu kan moxo, na a ɲi axa yinmenu wa sooxono me yi ; darontaaxu be gaa gilli Alla baane yi, axa nta ken muurunu ? 45 Xa maxa a sinma nan ti inke ya n riini axa jalagi Baaba danŋa de ! Aayi, axa ga da axa jikken ro annabi Muusa Sariya ke be kanma de, aken annabi Muusa yinme ya n riini axa jalagi Baaba danŋa. 46 Na a ɲi xa, axa gan n saxu Muusa yi tonŋun ŋa, axa ɲi saqa in xa yi, baawo a seede ti in ŋa Tawureeta noxon ŋa. 47 Axa ga ma saxu a kitaaben ŋa, axa katta saqa inke sefon ŋa kan moxo ? »