Yohanna 4

[Isa Alimasiiwu dutuyinde Somooronka yaxaren ŋa]

da a mugu nan ti Isa Alimasiiwu xaranlenwanqinten nan fuŋu Yahaya xallen ŋa. 2 Isa yinme ken xa ma ɲi sere wanqini xa de : a xaranlenmo ku ya n ɲi a su dabarini. 3 Isa ga da ken mugu, a giri jamaanen ŋa nan saage katta maran ŋa. 4 A waajibi a kanma na jamaanen ya kutu. 5 Ken moxo, a joofe Somooro debe yogo yi, non gaa xiriini Sixaari. Non do Yaaxuba ten ma laato, a ga da te be kini i renme Yuusufu yi nan xaso. 6 Yaaxuba gede ke xa ɲi non ya yi. Terenden tanpiyen maxa, Isa taaxu gede ke xannen ŋa. Ken ɲa katta kinsigan ya yi.

7 Somooronkayaxare yogo xa ri ɲoŋo. Isa sefe a da nan ti : « An haqu toxo, an na in ku ji in gaa minni. » 8 Ken da a ɲi a xaranlenmon daga yigandixobe deben ŋa. 9 Somooronkayaxare ke ti a da : « Manne ? Anke me Yehuudiya ya n tini inke na an ku ji, fo feti in ŋa ma Somooronkayaxare ? » Yaxaren da ke ko ya na a sababun ɲa Yehuudiyanun ga nta a mulla i do Somooronkon nan kafi fo wo fo yi. 10 Isa ti a da : « Alla gaa a mulla na kuye be kini an ŋa, an gan ɲi a tu, a do ke be ga ti an na i ku ji sere be ga ni, an ɲi a tirindini miniji ya, a na ŋalijin kini an ŋa. » 11 Yaxaren ti a da : « Kamanyugo, gede ke gillen ya ni de ! Gaaye xa nta an maxa. An katta ŋaliji ke kitta kan moxo xa yi ? 12 O kisima Yaaxuba be ga da ke gede kini o yi, a yinme do i renmun do i naaburun su ɲi minni a ya yi. An ra wa tini an ya n xoora Yaaxuba yi ba ? » 13 Isa saage tini a da : « Sere su gaa ke gede jin minni, a lagarini daqunu ya. 14 Xa sere su ga na inke ji kininte ke mini, a ntaxa daqunu hari abada. Ken baane fe de, nke gaa ji be kinni a kaman ŋa, a ɲaana jinyaaxa wurunten ya yi ma bireyi duumanten ŋa. » 15 Yaxare ke ti a da kuŋa : « Kamanyugo, ken ji yogo kini in ŋa, kuudo daqu ga ntaxa in ragana, n ga ntaxa riini ɲoŋo yere xadi. » 16 Isa ti a da : « Daga do an kiina yi, an do a nan ri. » 17 Yaxaren ti a da : « Kiine nta in maxa. » Isa ti a da : « An da tonŋu ko an ga ti kiinen nta an maxa. 18 Xa, an demu yaxini ta karago ; an do yugo ke be gaa doome saasa, an kiina fe, an ga da ke be ko, tonŋun ya ni. »

19 Yaxaren ti : « Kamanyugo, n da a tu saasa nan ti ya ni an ŋa. 20 O kisimanu da Alla batu ke gide ya kanma ; axakun xa ti seron nan xawa Alla batta ya yi. » 21 Isa ti a da : « N ma, saxu in ŋa, kootan wa riini, seron ga ntaxa Faaba kallanken batta ke gide kanma do Yerusalaamu su yi. 22 Axakun Somooronko, axa na fon ya batta axa ga nta a tu. O ku Yehuudiyanu kun xa gaa ke be batta, o wa a tu, baawo kisiyen kiteene ti Yehuudiyanun ya yi. 23 Xa kootan wa riini, a kiɲe yinme du, battaana soobon gaa Baaba Alla batta ti Alla gaa tonŋu be koyini, baawo a gaa serandanbu be muurunu, kun ni sero beenu gaa a batta ken moxo ya yi. 24 Alla ni ruuhun ya yi ; ku beenu gaa a batta, i nan xawa a batta ti Fanka Sennen gaa tonŋu be koyini ya. » 25 Yaxaren ti a da : « N wa a tu nan ti Kisindaana ke wa riini, i gaa ke be xilli “  ”. Aken ga na ri bire be, a na fin su ko o da. » 26 Isa ti a da : « Nke be gaa sefene an da, nke ya ni ken ŋa. »

27 Ken bire gemu Isa xaranlenmon riyinten ŋa. I ga da Isa do yaxaren wari sefene, i kaawa ken ŋa. Xa i du baananbe su ma katu a tirindini nan ti : « An na manne muurunu a maxa ? » walla nan ti a da : « An do ke sefene manne yi ? » 28 Ken sigira, yaxaren da i ɲoŋoxollen toxo taaxunu nan daga deben ŋa, a gaa tini seron da : 29 « Xa ri ke yugo faayi ya de ! N ga da fo wo fo ɲa, a da a su ko in da. Xori Kisindaana ke ya fe xa ? » 30 Seron bogu deben ŋa nan daga katta Isa yi. 31 Ken noxon ŋa, xaranlenmon xa wa xorotini Isa yi, i wa a yi : « Xaranmoxo, yige ke ! » 32 Xa, a ti i da : « Biraadon wa inke maxa na a yiga, xa axakun nta ken tu. » 33 Xaranlenmon toxo me tirindini nan ti : « Xo sere ya n da yigande kini a yi ? » 34 Isa ti i da : « N biraadon ni na ke be ga da in xayi liŋun su ya dabari. A ga da golle ke be xaliifa in ŋa, n na a su tinmandi. 35 Axa yinmenu ya nta tini : “ Xasu naxati lenki falle, sanjaanen na kiɲe. ” Xa inke wa tini axa danŋa, xa da axa yaaxon wuɲi na teenun faayi : soxofoonun moyi nan duguta, a toxo i nan fate ya. 36 Fataanan wa muson kitana, a wa sanjanfon kapa me yi, sanjanfo kafumanten wa bireyi duumanten kitana, kuudo tipaanan do fataanan su na ɲaxali doome. 37 Ken kuŋa, ke masayila ni tonŋun ya yi, a ga ti : “ Yogo ya na ten tipi, yogo na a fata. ” 38 N ya n da axa wara te fatanden ŋa, axa ga ma tanpi te be golle su yi. Sere tananu ya n da te ke golli, axakun ro a nafan ŋa. »

39 Somooronka gabe ɲi ken debe yi i ga saxu Isa yi na a sababun ɲa yaxare ke ga seede nan ti : « N ga da fo wo fo ɲa, a da a su ko. » 40 Somooronkon ga kiɲe Isa yi, i da a xanjo ti a na fonne ɲa i maxa. A da bito filli ɲa i maxa non ŋa. 41 A digaamun saabu da, seri gabe saxu a yi xadi. 42 I ti yaxare ke da : « An digaame ke baane ma o saxundi a yi keeta de : o yinmenu ga da fiinu be mugu, o da a tu tonŋun-tonŋu nan ti duna su Kisindaanan ya ni. »

[Taagumansi fillandin dabariye Galiile yi]

43 Kun bito filli dangi falle, Isa giri non ŋa nan daga Galiile. 44 A yinme demu nan ti : «  su ma daroye kita i yinme saaredeben ŋa. » 45 A ga kiɲe Galiile yi kuŋa, seron da a gemundi moxosiri, na a sababun ɲa, kun sero xa ga demu dagana sallen ŋa Yerusalaamu yi, i ga da a kaawafi dabarinten su wari. 46 A saage katta Kaana yi xadi, Galiile maran ŋa, a ga demu na jin yilla reesendolo yi debe ke be yi. Ken bire, fankama yogo wa yi, ken xa renmen ma saha. 47 Fankama ke ga da a mugu ti Isa giri Yehuuda katta Galiile maran ŋa, a daga katta a yi na a muuru a maxa ti : « Li, n renmen faayi kalla, an na a sahandi. » 48 Isa ti a da : « Axa nta danqanaaxunu ma axa ga na taagumansun do kaawafi xooron wari. » 49 Xa fankama ke ti a da : « Kamane, ri jawoye saado in renme gaa kalla. » 50 Isa ti a da : « Daga an kan ŋa ; an renmen saha. » Ke yugo saxu Isa diganxannen ŋa nan daga. 51 A gaa do killen ŋa telle, a golliɲaŋaanon ri gemu a yi nan ti a da : « An renmen saha ! » 52 A da i tirindi nan ti : « A saha kan waxati yi ? » I ti a da : « Daaru kinsigan biren ya ni, fatankumun ga da a wara. » 53 Faaben da a tu nan ti a saha bire ke be Isa ga ti i da : « An renmen saha. » Gelli ke, a saxu Isa yi ; a kan xa su saxu a yi. 54 Ke ya ni taagumansa fillandi be Isa ga da a dabari Galiile yi a giri falle Yehuuda maran ŋa.