Yohanna 3

[Isa Alimasiiwu do Nikodeemu xibaare]

yogo ya ni, a toxon ga ni Nikodeemu, Yehuudiyanun xirisen xa ya ni. 2 Wuro yogo, a daga Isa Alimasiiwu sagata nan ti a da : « Xaranmoxo, o wa a tu nan ti Alla ya n da an xayi an na o xaranŋundi, baawo an gaa taagumansi xooro ku be dabarini, sere su do Alla ga nta doome, a ra nta i dabarini. » 3 Isa da a jaabi nan ti : « Tonŋun-tonŋu, n na a ko an da : sere be ga ma saare saareyi kurunba, an ra nta walla. » 4 Nikodeemu ti a da : « Seren xooro falle, a katta saareene kan moxo yi xadi ? A katta saagene i ma noxon ŋa kan moxo nan yille saareene ? » 5 Isa ti a da : « Tonŋun-tonŋu, n na a ko an da, sere be ga ma saare ti jin do Alla ŋa, an ra nta roono Allantunkaaxun noxon ŋa. 6 Fataganken na fataganken ya saarana, Fanka Sennen na yonki ŋalinten ya saarana. 7 N ga na ti an da axa nan xawa saareene saareyi kurunba, ken nan maxa an lasama. 8 Noqu be ga n liŋi fanken da, a telle ti non ya yi. An wa a direyen mukku, xa an nta a girinoqu tu ; an nta a daganoqu tu. Alla Fanka Sennen xa ga da ke be saara, a xa moxon ni kundun ya yi. »

9 Ken bire, Nikodeemu ti Isa da : « Ken katta ɲaana kan moxo ? » 10 Isa ti a da : « Anken be gaa jaman xaranŋundini, an nta ken tu ? 11 Tonŋun-tonŋu, n na a ko an da, o gaa ke be tu, o na ken ya koono. O ga da ke be wari, o seedene ti ken ya yi. Xa ken do i fi su, axa nta o seedannaaxu ke ragana soobe yi. 12 Fiinu beenu ga ni tonŋun ŋa ɲiiɲen kanma, n gaa i koono axa da, axa ga ma saxu kun ŋa ; axa katta saqa in gaa kanmun fiinu be koono axa da kan moxo ? 13 Baawo sere su ma sege kanmun ŋa, a ga ma ɲa inke be ga ni ŋa, n be ga yanqa nan giri kanmun ŋa. 14 Gunjuran ŋa, annabi Muusa ga da samaqen jongi torunten ŋa na a wutu kanmun ŋa moxo be yi de, Seren Renmen xa nan xawa jongini ken moxo baane ya yi nan wuti kanmun ŋa, 15 kuudo sere wo sere ga na i danqanaaxun ro in kanma, ken kaman na bireyi duumanten kita. 16 Baawo, Alla da dunadunko xanu, ma a na i Bajjon kini, kuudo sere wo sere ga na i danqanaaxun ro a kanma, an ga nta bonno, an na bireyi duumanten du ya kitta. 17 Alla ma i renmen xayi katta duna yi, kuudo na dunadunko kiiti, xa i nan kisi ti a yi ya ni. 18 Sere be ga na i danqanaaxun ro a kanma, ken kaman nta kiitiini. Xa sere be ga ma i danqanaaxu ro a kanma, ken kaman kiitini ya na a sababun ɲa a ga ma i danqanaaxu ro Alla Renbajjon ŋa. 19 Ayiwa, kiiti yinmen faayi : xurayen ri duna yi, xa dunarenmun da biten fasu a yi, baawo golliburiɲaŋaanon ya ni. 20 Baawo sere wo sere gaa golliburiɲaŋini ya, a na xurayen xonno ya. A kaman kanna kiɲene xurayen ŋa ya, a golliburun gaa tuyiini. 21 Xa sere be gaa tonŋun gollen ya dabarini, ken kaman nta kanna riini xurayen ŋa, baawo a gaa ke be dabarini, seron wa a tuunu ti a na Alla killen ya kanma. »

[Yahaya digaamuye Isa fin kanma]

22 Ken falle, Isa do i xaranlenmon daga maran ŋa. A do i da wuce ɲa non ŋa, a gaa seron tuubiyinwanqini. 23 Yahaya xa wa seron wanqini ji xoore yogo noxon ŋa Henooni yi, a ga Saalimu kaaran ŋa. Seri gabe wa riini wanqi ken noqu yi. 24 Ken da a ɲi Yahaya ma rage kason ŋa fina. 25 Ayiwa, koota yogo senoyen xibaaren kutanden ro Yahaya xaranlenmon yogo do Yehuudiya yogo naxan ŋa. 26 I daga katta Yahaya yi nan ti a da : « Xaranmoxo, an kiilun wa a yi an ga seede yugo ke be da kaaran ŋa ba ? Ayiwa, a xa faayi seron wanqini ya de, seren su ya n telle katta a yi xa mene. » 27 Yahaya da i jaabi nan ti : « Sere su ra nta du walla golle yi, Alla ya ga ma a wara a yi ga fe. 28 Axa yinmenu wa a seedaaxun ŋa bire su n gaa tini : “ Nke feti ke yi, xa in ware a kaane yi ya. ”

29 « Maaɲuyugon ya fo ni maaɲon ŋa. Xa, maaɲuyugon menjanŋe, ken terinkene ya tan, nan ɲaxali ti a sefon ŋa. Ken me ɲaxaliye ya na inke yi. Ken ɲaxaliye tinme xa. 30 Aken nan xawa tallan darono ya, nke na roxo. »

[Kanmun riyaana]

31 Sere ke be ga giri Alla noqu kanmun ŋa, a ya na a su kanma. Sere ke xa be ga giri ɲiiɲen ŋa, ɲiiɲaganken ya ni, a sefene ti ɲiiɲen fiinun ya yi. Sere be ga giri Alla noqu kanmun ŋa, [a ya na a su kanma.] 32 A ga da fiinu be mugu na i wari, a seedene ti kun ya yi, xa sere su nta a seedaaxun ragana soobe yi. 33 Sere be ga na duŋe ti a seedaaxun ŋa, ken kaman duŋe ti a yi nan ti Alla ya ni tonŋun ŋa. 34 Alla ga da sere be xayi, a na Alla digaamun ya koono, baawo Alla na i Fanka Sennen su ya kinni a yi lewu. 35 Faaben wa Renmen mulla ; a da seyen kini a yi fo wo fo kanma. 36 Sere be ga toŋondi ti a yi, a kaman da bireyi duumanten kita. Sere be ga na bara a yi, ken kaman nta bireyi duumante kitana. Alla butunten du ya n toqo a kaman wure.