[Isa golle jaman ŋa, a do taagumansi xooron ɲeri]
(2.1-12.50)
[Isa Alimasiiwu taagumansi fana]
2
Bito filli dangi falle,
yexu yogo ɲa Kaana deben ŋa,
Galiile mara.
Isa saaxa teye.
2 Isa Alimasiiwu xa do i xaranlenmon xiri yexu ke yi.
3 Reesendolon konto kuŋa.
Isa saaxa ti a da :
« Reesendolo ntaxa i maxa ko. »
4 Isa da a jaabi nan ti :
« N ma,
xoyi fo wa inke da ke yi ba ?
N kootan ma kiɲe fina. »
5 Saaxen ti golliɲaŋaanon da :
« A ga na fo wo fo ko axa da,
xa da ken dabari. »
6 Gidinwaatu tunmi ɲi non ŋa,
Yehuudiyanun ga i farilansenoyun dabarini ti i ya.
Waati baane su ra wa tansege ma kame liitara wuttu.
7 Isa ti golliɲaŋaanon da :
« Xa da ku waatu faga jin ŋa.
» I da i faga ma raqe.
8 A ti i da :
« Xa da fo wutu nan daga a kini ɲaxanxirisen ŋa.
» I da ken ɲa.
9 Ɲaxanxirisen da jin temu,
a da a ɲi a yille nan ɲa reesendolon ŋa.
A nta a tu ken reesendolo ga giri noqu be,
xa golliɲaŋaano ku kun wa a girinoqun tu,
baawo i ya n da ji ke ɲoŋo.
A da maaɲuyugon xiri karama
10 nan ti a da :
« A ga n gaba,
reesendolo siren ya n taxandini fina,
ken be liŋen ga ni.
Seron ga na mande,
ken bire reesendolon na taxandi,
ke be ga ma liŋo.
Xa,
fosiren ya n finna anken maxa ! »
11 Ke ya ni Isa taagumansi fanan ŋa,
a ga da a dabari.
A ɲaŋi Kaana ya yi,
Galiile maran ŋa.
A da i nooron koyi kundu ya yi,
a xaranlenmon ga saxu a yi.
12 Ken dangi falle,
Isa do i ma do i waaxinun do i xaranlenmon yanqa katta Kafarinoomu yi.
Xa,
i da bita lamaanu ya ɲa non ŋa tannu.
[Isa dagaye Allanbatikaxooren ŋa]
13 Yehuudiyanun Pesaxansallen ga tinko bire be,
Isa daga Yerusalaamu yi.
14 A da gunbugaagaanon do digigaagaanon do sadaxanboorigaagaanon ɲi Allanbatikaxooren tagayen noxon ŋa.
Xaalisi wocindaanon xa taaxunton wa i taabalinun ŋa.
15 Ken noqu su,
Isa da kacun ɲa jaane na i do i digun do i gunbunun xata bakka Allanbatikaxooren ŋa,
na wocindaanon taabalinun xenundi,
na i xaalisinun sedi ɲiiɲen ŋa.
16 Ken falle,
a ti boorigaagaano ku da :
« Xa da ke wutu bakka yere !
N Faaba kan ya ni ;
axa maxa a ɲa gaageka yi keeta ! »
17 Ken noqu,
a xaranlenmon xosi sinme do Jabuuri ke sefeta nan ti :
« Eh Alla !
Xanuye be ga in maxa katta an ka ke yi,
a nta kutte su toqo in ŋa. »*
18 Yehuudiyanun xirisun ti a da :
« Kan taagumanse na an maxa,
an gaa a koyini o yi,
ken gaa a koyini ti ke golle ɲaamariyen wa an maxa ? »
19 Isa ti i da :
« Xa da Allanbatikaxoore ke guruja,
n na a kurunbaaxu bito sikki noxo. »
20 I ti :
« Ke Allanbatikaxoore be seron ga da tannaxate do xaaxu tunmi ɲa a taganden kanma,
anken katta ken kurunbaaxunu bito sikki yi kan moxo ? »
21 Na a ɲi xa,
Isa ga ti « Allanbatikaxoore »,
a na do i yinme xuntura ke ya yi.
22 Ken ya saabu da,
bire be Isa ga wundi bakka furun naxan ŋa,
a xaranlenmon haqilen ga yanqa a yi nan ti a demu nan sefe a kanma.
I saxu Safandi Sennun do Isa digaamun ŋa.
[Seron ŋanniyen tuyiye]