Yohanna Linjiili
[Joŋaaru : Alla Daale]
(1.1-18)
[Alla Daalen do a seeda]
1
1 Joŋaarun ŋa,
a ke be ga ɲi du yi,
ken ni Daalen ya yi,
a do Alla ga ɲi me kaaran ŋa.
Aken yinme ni Alla ya yi.
2 Joŋaarun ŋa,
a do Alla ɲi me kaaran ya yi.
3 A su tage ti a ya yi.
Fo wo fo ma tage,
a ga ma tage ti a ya yi.
4 Bireyen ɲi a ya yi.
Ken bireye ya n na haadamarenmun noorondini.
5 Nooron wa ɲelunqene biten ŋa,
biten ma a toni xa.
6 Yugo yogo bange,
Alla ga da a xayi,
a toxon ya ni Yahaya.
7 A ri ya,
kuudo nan seede ti ken nooro yi,
kuudo haadamarenmun su na saxu nooro ke yi ti a sababun ŋa.
8 Aken yinme feti nooro ke yi,
xa a xayimaanan ni nan ɲa nooro ke ya da seeda yi.
9 Nooro haxiixan ya ni,
a ga ri duna yi kuudo haadamarenmun su na nooro.
10 Ke be ga ni Daalen ŋa,
a ɲi duna yi nan xaso ;
duna tage ti a ya yi,
xa duna ma a tu.
11 A ri i yinme seron ŋa,
xa i ma a bisimilla.
12 Xa ken do i fi su,
yogonu da a bisimilla nan saxu a yi.
Fo wo fo ga saxu a yi,
a da seyen kini i ya kuudo i nan katu ɲaana allanlenmu yi.
13 Ken renmaaxu,
haadamarenme saareye fe,
yugo do yaxare kapanlenmaaxu fe,
yugo xa liŋu fe,
xa Alla yinme ya golle ni ken renmaaxu yi.
14 Ke be ga ni Daalen ŋa,
a ɲa fataganke nan ri ɲa o noxon ŋa.
O da a darontaaxun wari na a laaba.
Bajjo ke da ken darontaaxu kita baawo Baaba renmen ya ni.
Tonŋun do neema xoore dunke ya ni.
15 Yahaya seede ti a yi,
a xanxooren ti :
« N da ke ya fin ko axa da,
a faayi ke,
bire ke be in ga ti :
“ Ke be gaa riini inke falle,
a ya n dara in ŋa,
baawo inke gaa bangene bire be,
ken da a ken ɲi du yi ya. ” »
16 O su da fo kita a bannaaxun ŋa,
a da i neeman joxi o du baananbe su kanma,
neema gaa neema kanma.
17 Alla da sariyan kini o yi ti annabi Muusa ya yi,
neeman do tonŋun ken kini o yi ti Isa Alimasiiwu ya yi.
18 Sere ma Alla wari abada.
Ke be ga ni Bajjon ŋa,
Alla ya ni,
a sabatinten ga faaben bunbun ŋa,
a ya n da Alla tuyindi o yi.
[Isa gollen jopaadu]
(1.19-51)
[Yahaya seedannaaxu]
19 Yahaya seedannaaxun faayi bire be Yehuudiyanun xirisun ga da sadaxakiɲandaano yogo do Leewikaaranko yogo girindi Yerusalaamu nan ti i nan daga a tirindi ti :
« Ko ni an ŋa ? »
20 A da tonŋun xullen ya ko i da,
a ma fo muxundi i ya.
A da i jaabi na a xurandi i da nan ti :
« Nke feti Kisindaana ke yi de ! »
21 I ti a da :
« Ken kuŋa,
annabi Hiliyaasu ya ni an ŋa ba ?
» A ti :
« Aayi,
nke feti ken ŋa.
» I ti a da xadi :
« Annabinyinme keb ya ni an ŋa ba ?
» A ti :
« Aayi. »
22 Xa lagarun ŋa,
i ti a da :
« Ko ni an ŋa kuŋa ?
O do jaabu ya nan xawa telle katta ku be ga da o xayi.
Anken yinme maxa,
ko ni an ŋa ? »
23 A ti i da :
« Nke ya ni :
“ Wurugexannen wa gunnen ŋa,
a gaa tini :
‘ Xa da Kamanen killen sirondi !
’ ” »c
Annabi Yesayaahu da ke ya ko nan xaso.
24 Yogonu ɲi Yehuudiyanun diinadunkon ŋa,
i wa tini i da « Farisiganko »,
i xa kafunton ɲi faaru ku yi.
25 I jokki do a tirinden ŋa nan ti :
« Kisindaana ke ga feti an ŋa,
Hiliyaasu feti an ŋa,
annabinyinme ke feti an ŋa,
manne ni kuŋa,
an gaa tuubiyinwanqindini ? »
26 A ti i da :
« Nke,
n na axa wanqini jin ya noxon ŋa,
xa sere wa axa noxon ŋa,
axa nta a tu.
27 A wa riini inke falle,
xa in nta xawa ɲaana hari a kome yi,
n gaa a tepunun bagandini a da. »
28 I gaa fanŋe ke be xilli « Yarade »,
ke ɲa a kinbakkan ya yi,
Beyitaani yi,
Yahaya ɲi wanqindini non ya yi.
[Isa Alla jaxanlenme]
29 Ken yillakara,
Yahaya yaaxen wa Isa yi riini,
a ti :
« Alla jaxanlenmen faayi,
ke be gaa dunadunko junuubun wuttu bakka i kanma !
30 N da ke ya fin ko axa da,
a faayi ke,
bire be in ga ti :
“ Ke be gaa riini inke falle,
a ya n dara in ŋa,
baawo inke gaa bangene bire be,
ken da a ken ɲi du yi yad. ”
31 Hari inke yinme ma ɲi a tu nan ti a ya ni,
xa in ga ri wanqindi jin noxon ŋa,
ken ni na a ya tuyindi Banisirayila jaman ŋa. »
32 Yahaya seede ti ke yi nan ti :
« N da Alla Fanka Sennen wari yanqana gilli kanxotten ŋa xoyi boorinxulle,
nan yanqa a kanma.
33 Nke ma ɲi a tu nan ti a ya ni,
xa Alla ke be ga da in xayi riini wanqindi ti jin ŋa,
a ɲi ga ti in da :
“ An wa Fanka Sennen walla a gaa yanqana yugo yogo kanma ;
a ya n riini wanqindi ti Fanka Sennen ŋa. ”
34 Nke yinme da ken wari.
N seeda a yi nan ti aken ni Allanlenmen ya yi. »
[Isa xaranlen fano]
35 Ken yillakara,
Yahaya do i xaranlenmo filli yogo gaa ken noqu baane yi xadi,
36 a da Isa danginten wari,
a ti :
« Alla jaxanlenmen faayi ! »
37 Yahaya xaranlenmo ku filli ga da a ken sefe mugu,
i sukke do Isa yi.
38 Isa da i falle faayi,
a da a tu nan ti i wa sukkene do i ya,
a da i tirindi nan ti :
« Axa na manne mundunu ?
» I ti a da :
« Rabbi,
an daaxanten na minna ?
» (« Rabbi » wure ya ni « xaranmoxo. »)
39 A ti i da :
« Xa ri,
axa na non wari.
» I da a daga doome a daaxanten gaa noqu be,
i da non wari.
Ken da a ɲi laxasarane toxo fonne,
i do a da kiyen kutten ɲa doome.
40 Handere,
ken ga ni Simoona Piyeeri waaxin ŋa,
sero ku filli be ga da Yahaya ken sefe mugu,
i ga sukke do Isa yi,
i du baananbe ya ni.
41 Aken Handere daga katta i waaxi ke fina ya yi,
ken ga ni Simoona,
nan ti a da :
« Oku da Alimasiiwu ke wari !
» (Ken wure ga ni « Kisindaana,
Tunka Sugandinte ».f)
42 Ken falle,
a do a daga doome Isa noqu.
Isa da Simoona faayi siri,
a ti a da :
« Yohanna renme Simoona ya ni an ŋa.
Ayiwa,
an wa saagene xiriini Keefa.
» (Ken wure ga ni « gidindunga. »)
[Filipu do Nataneeli xibaare]
43 Ken yillakara,
Isa kande saagayen katta Galiile yi.
A do Filipu ga gemu,
a ti a da :
« Sukke do in ŋa ! »
44 Filipu ni Beeti-saayidanken ya yi,
Handere do Piyeeri ga bakka debe ke be yi.
45 Filipu xa daga katta Nataneeli nan ti a da :
« Annabi Muusa ga da sere ke be fin ko Tawureeta noxon ŋa,
g annabinyinmun xa ga da a kiɲandi,
o da a wari :
Isa Nasaaranke ya ni,
Yuusufu renme ke. »
46 Nataneeli da du toxo ti :
« Nasaara ?
Fo sire bakka Nasaara xa yi kan moxo ?
» Filipu ti a da :
« Li,
an yinme na a wari ti an yaaxen ŋa. »
47 Isa ga da Nataneeli riyinten wari,
a da a fin ko nan ti :
« Banisirayilaganka sooben faayi ke yinme ya yi,
sikka ga nta sere ke be jikkun ŋa. »
48 Nataneeli ti Isa da :
« An da in tu minna ?
» Isa ti a da :
« Katta Filipu gaa an xilli,
an ga ɲi dinden wure bire be,
n da an wari. »
49 Nataneeli ti :
« Xaranmoxo,
Allanlenme ke ya ni an ŋa,
Banisirayila tunkanyugo ke ya ni an ŋa. »
50 Isa da a jaabi nan ti a da :
« N ga ti in da an wari dinden wure,
an toŋondi ti ken ya yi ba ?
An wa riini fi gabe tana wari,
i ga n xoora ke yi. »
51 A saage tini xadi :
« Tonŋun-tonŋu,
n na a ko axa da,
axa nan saxu a yi nan ti axa wa riini kanmun raqen wuɲinten wari Alla maliikanun gaa segenanyanqana ti in sababun ŋa,
nke be ga ni Seren Renmen ŋa. »h