Maarika Linjiili
[Isa Alimasiiwu moxosironde katta i gollen ŋa]
(1.1-13)
[Annabi Yahaya waajunde]
1
Allanlenme Isa Alimasiiwu Xibaari Liŋen jope ke moxo ya yi.
2 A safanten gaa annabi Yesayaahu kitaaben ŋa moxo be nan ti Tunka Duumanten ti :
« Terinke !
N faayi in faaren denne an kaane,
a na an killen sirondi.*
3 Wurugexannen wa gunnen ŋa,
a gaa tini :
“ Xa da Kamanen killen sirondi,
xa da a killi mison teleŋondi.
” »*
4 Annabi Yahaya bange,
a wa seron wanqini gunnen ŋa.
Ken moxo,
a wa seron xilli nan ti :
« Xa ri wanqi,
ken gaa axa tuubiyen koyini kuudo axa junuubunun na xafari. »
5 Yerusalaamunkon do Yehuuda maran taaxaanon su wa telle a sagata.
Beesu yinme na xiire ti i junuubunun ŋa a su jon ŋa,
i gaa fanŋe be xilli « Yarade »,
Yahaya na i wanqi a noxon ŋa.
6 Yahaya yiraamun ni ɲogonyinten ya yi,
a naxaadusiitaaden ni fatanlapollen ya yi.
A bireene buuren do yaagen ya yi.
7 Faare be gaa a raqen ŋa a faayi :
« Nke daga falle,
sere wa riini,
a gaa in do fo wo fo naxa,
n nta xawa ɲaana hari a kome yi,
n gaa jinmi a wure ti in wa a tepunun bagandini a da.
8 Nke da axa wanqi ti jin ya yi,
xa aken na axa wanqini ti Alla Fanka Sennen ya yi. »
[Isa wanqiyen do a jaarabinde]
9 Ken noxoodu,
Isa giri Nasaara yi,
ken ga ni Galiile maran debi xoore yogo yi.
Yahaya xosi a wanqi Yarade noxon ŋa.
10 A gaa bakka jin ŋa tan,
a da kanxotten wuɲinten wari,
Fanka Sennen gaa yanqana katta a yi xoyi boorinxulle.
11 Sefexanne giri kanxotten ŋa nan ti :
« N Ren xanan ya ni an ŋa,
n sewonten da an ya sugandi. »
12 Ken falle,
Fanka Sennen da Isa xata katta gunjuran ŋa.
13 A da tannaxate bito ɲa no,
Ibiliisa gaa a jaarabini.
Isa wa gundufoonun naxa,
maliikanun wa a sorogono.
[Isa golle jaman ŋa]
(1.14-10.52)
[Isa xaranlen fano]
14 Yahaya rage falle kason ŋa,
Isa daga Galiile.
Xibaari Liŋe ke be ga giri Alla yi,
a da a waaju non ŋa.
15 A ti :
« Alla ga da waxati be rakutu,
a tinme.
Allantunkaaxun tinko.
Xa da axa du rasaaga nan danqanaaxu ti Xibaari Liŋen ŋa. »
16 Koota yogo,
Isa gaa terene do Galiile xaaranxannen ŋa,
a da tangaano filli wari,
kun ga ni Simoona do i waaxi Handere yi,
i gaa jalasediini.
17 Isa jaabi nan ti i da :
« Xa sukke do in ŋa,
axa ɲi ɲexon ya tangini ;
saasa axa na saage seron tangini katta Alla yi. »
18 Ken batte su,
i xosi i jalon saxundi, nan sukke do a yi.
19 Isa sukke do i killen ŋa,
kaane fonne,
a da Sebede ren yugun filli wari,
Yaaxuba do i waaxi Yohanna,
i gaa i jalon sirondini fuuren noxon ŋa.
20 Ken batte su yi,
Isa da i xiri.
I xosi sukke do a yi na i faaba Sebede do golliɲaŋaanon toxo fuuren noxon ŋa.
[Isa fankan do a waajunde]
21 Isa do i xaranlenmon daga doome Kafarinoomu deben ŋa.
Tuumayinkootan ŋa,
Isa ro allanxarankan noxon ŋa na seron xaranŋunden jopa.
22 A terinkaanon kaawa a xaranŋundinden ŋa,
baawo a ma ɲi i xaranŋundindini xoyi sariyanxaranmoxonun moxo,
xa a ɲi i xaranŋundindini ti kandan ya yi.
23 Jaxa yugo yogo wa i allanxaranka ke noxon ŋa,
jinnan gaa a yi.
A xosi luuke
24 nan ti :
« An manne ni o maxa,
Isa Nasaaranke ?
An ri o halaki ya ba ?
N wa a tu an ga ni ke be yi :
Alla seri sennen ya ni an ŋa ! »¤
25 Isa xiribe a yi nan ti :
« An raqen raga !
An nan bogu yugon ŋa ! »
26 Jinnan xosi yugon gijigiji,
nan xaaru,
nan bogu a yi.
27 Seron su lasame ma i gaa tini me da :
« Ke xa ni manne yi ?
Xaran kurunba ya ni ke yi ba a gaa xareene ti kandan ŋa ?
Hari jinnanun xa wa ke yugo ɲaamariyen batta ! »
28 Isa toxon xooro Galiile noqun su yi.
29 Isa bogu falle allanxarankan ŋa,
a do Yaaxuba do Yohanna daga Simoona do Handere kan ŋa.
30 Simoona yaqen ma wa saqa fatankumun maxa.
Isa ga joofe,
i xosi a fin ko a da.
31 Isa tinko a yi na a raga ti i kitten ŋa,
a da a girindi na a taaxundi.
Ken batte su yi,
fatankumun da a wara,
a giri nan sigi i danŋa.
32 Kiyen xenu falle,
futuron ŋa,
seren su do i jinnagumun do i watunton daga Isa sagata.
33 Deben seren su da me ɲi ganlaqen ŋa.
34 Isa da watunta gabe sahandi,
a da jinna gabe xa xata.
A ma ɲi duŋene jinnan nan sefe,
baawo ikun wa a tu a ga ni ke be yi.
35 A yillakaran fajiri,
Isa baane giri nan daga noqu xiidinte yogo yi na Alla batu.
36 Simoona do i kapanlenmon daga a muuru.
37 I ga da Isa wari bire be,
i ti a da :
« Seren su wa an muurunu. »
38 Isa ti i da :
« Xa ri o n daga fonkaaradundebun ŋa.
N nan xawa waajundini debi kuttun xa yi ya,
baawo in ri yinmen ni ken ya yi. »
39 Isa daga Galiile maran su yi,
a gaa waajundini do i allanxarankaanun ŋa na jinnanun xa xata.
40 Fatanwattiburugume yogo daga Isa sagata nan tusi a jon ŋa.
A da a ɲaaga nan ti :
« An ga na duŋe,
an ra wa in senondini. »
41 Saafinte ke hinneyen xosi Isa raga,
a da i sooxen fuutu nan kati a yi nan ti :
« N duŋe.
Seno ! »
42 Yugon xosi saha,
nan seno ken sigira su yi.
43 Isa da a wara dagana i kan ŋa na a ko a da na a xotondi a maxa
44 nan ti :
« Daga,
an nan tigiti an raqen ŋa ;
maxa fo ko sere su da,
xa an na daga an du koyi sadaxakiɲandaanan ŋa,
ken ŋa,
annabi Muusa Sariyan ga da sadaxa be ko senoyen fin kanma*,
an na ken bagandi kuudo a na xura seron su da nan ti an seno. »
45 Xa,
yugon ken ga bogu tan,
fi be ga ɲaŋi a da,
a da a laxami noqun su yi,
a da a ko seren su da.
Ken saabu da,
Isa maxa katu na du koyi debe su noxon ŋa keeta,
a toxo noqu xiidinte ke yi.
Ken do i fi su,
seron wa gilli banŋe wo banŋe nan daga a sagata.