[Isa moxosironde katta i gollen ŋa]
(3.1-4.16)
[Annabi Yahaya gangunde]
3
Waxati dangi falle,
annabi Yahaya¤ gangundi Yehuuda maran gunnen ŋa,
a gaa tini :
2 « Xa tuubi,
baawo Allantunkaaxun tinko ! »
3 Tunka Duumanten da a ko annabi Yesayaahu kitaaben noxon ŋa nan ti :
« Wurugexannen wa gunnen ŋa,
a gaa tini :
“ Xa da Kamanen killen sirondi ;
xa da a killi mison teleŋondi !
” »*
4 Ke Yahaya kundu,
ɲogonyintindoroken ya ɲi a xannen ŋa.
Fatanlapollen wa siitini a naxaanen ŋa.
A bireene buuren do yaagen ya yi.*
5 Yerusalaamunkon do Yehuuda maran taaxaanon su,
ken do i gaa fanŋe ke be xilli « Yarade »,
a xannen taaxaano,
i su wa telle Yahaya sagata.
6 Beesu yinme na xiire ti i junuubunun ŋa a su jon ŋa,
Yahaya na i wanqi Yarade yi.
7 Yahaya ga da Farisigankon do Saduukagankon gabun wari riini wanqi,
a ti i da :
« Ku kooson soxoodinu ku !
Ko n ti axa ra wa kisini Alla yanganxata riyinten ŋa ti wanqiye yi,
tuubiye ga nta do a yi ?
8 Xa da gollu ya dabari,
kun gaa axa durasaageyen koyini.
9 Xa maxa a sinma ti annabi Ibirahiima bonsonŋaaxu ke wa axa kisini,
baawo in na tonŋun ko axa da ti Alla ra wa ku gidu yillana na i ɲa Ibirahiima bonsonŋun ŋa ko !*
10 Ayiwa yiden moxon sironten ya ni yittun xanne maxa de,
a gaa i kuttu ma ɲiime.
Ken kuŋa,
yitte wo yitte ga ma ren sire renmu,
a wa kutiini nan sedi yinben ŋa.
11 Nke ya na axa wanqini ti jin ŋa,
ken gaa axa jikkunun faraaxiyen koyini.
Xa,
ke be gaa riini inke falle,
a wa in do fo wo fo naxa,
n nta xawa ɲaana hari a kome yi,
n gaa a tepunun bagandini a da.
Aken ya n riini axa wanqi ti Alla Fanka Sennen do yinben ŋa.
12 A woyindixollen ya na a maxa,
a gaa funsen do gijen bakka me yi,
na funsen ro maran ŋa,
na gijen buyi ti yinbe be ga nta kalla. »
[Isa wanqiye]
13 Ayiwa,
Isa Alimasiiwu giri Galiile nan ri katta Yahaya yi Yarade kuudo a na i wanqi.
14 Yahaya ma duŋe ;
a ti Isa da :
« Inke ya n xawa dagana an sagata an na in wanqi,
xa anken nan ri inke sagata ! »
15 Isa da a jaabi nan ti :
« Duŋe ke yi fina ;
ken ya n genme o yi kuudo teleŋontaaxun su na tinme.
» Isa ga da kundu ko,
Yahaya duŋe.
16 Isa ga wanqi tan,
a bogu jin ŋa.
Ken sigira su,
kanxotten wuɲi a da ;
a yaaxen wa Alla Fanka Sennen wa yanqana katta du yi xoyi boorinxulle.
17 Sefexanne xa giri kanxotten ŋa nan ti :
« Ke ni in Ren xanan ya yi ;
n sewonten da a ya sugandi. »*