[Saanintuwaanon riye]
2
Isa Alimasiiwu gaa teerini,
a gemu Tunka Heroodi kiyen ya yi.
A teeri Beeti-leheemi ya yi,
Yehuuda maran ŋa.
Saanintuwaano yogonu ya n saage gilli kinbakkan ŋa nan ri Yerusalaamu
2 nan tirindindi ti :
« Yehuudiyanun tunkanyugo ke be ga teeri,
a na ti minna ?
O da a saanen ya wari a ga bange kinbakkan ŋa,
ken ya ni,
o ga ri a batu. »
3 Heroodi ga da ken mugu,
a haqilen bono.
Yerusalaamunko xa su haqilun bono do a batten ŋa.
4 A da sadaxakiɲandaananyinmankon do sariyanxaranmoxon su kafu me yi na i tirindi Kisindaanan ga n xawa bangene dingira be yi.
5 I ti a da :
« A n xawa bangene Beeti-leheemi ya yi,
Yehuuda maran ŋa,
baawo annabi Miixa da ken ya safa,
6 nan ti :
“ Beeti-leheemi !
Anken be gaa Yehuuda maran ŋa,
Debinlenminne feti an ŋa Yehuuda debi xooron naxan ŋa lewu,
Baawo xirise faayi riini bange an ya yi,
a gaa Banisirayilaganko nagaanini,
Ken ga ni in duudan jaman ŋa.
” »*
7 Ken kuŋa,
Heroodi da tuwaano ku xiri na i tirindi gundon ŋa saane ke ga bange bire be.
8 Ken falle,
a ti i da :
« Xa daga Beeti-leheemi,
axa na lemine ke fiiduxura.
Axa ga na a laabunden kita,
axa na ri a ko in da kuudo inke xa yinme na daga a batu. »
9 Tunkanyugon da ke sefe xanne kanma,
i janbandi.
I janbandi falle,
i yaaxen wa saane ke yi kinbakkan ŋa,
a gaa i kaane ma a gaa dagana sigi lemine ke gaa noqu be yi kanmun ŋa.
10 Saane ke sikken da i sewondi ma a gaa dangini haqen ŋa.
11 I ro kan ŋa,
na lemine ke do i ma Mariyaamu ɲi no ;
i tusi na a batu.
I da i yokkun wasa na kuyu sikki kini a yi :
kanŋen do futaade,
ken do kanbare yi.
12 Ken falle,
Alla da a koyi i ya wuraaxun ŋa nan ti i n maxa saage katta Heroodi yi.
Ken kuŋa,
i da kille tana wutu nan saage katta i jamaanen ŋa.
[Yuusufu do i koren wuruye katta Misira]
13 I daga falle,
Tunka Duumanten maliika yogo da du koyi Yuusufu yi wuraaxun ŋa nan ti a da :
« Giri !
An na lemine ke do i ma wutu,
an nan wuru katta Misira yi jawoye.
An na toxo no ma in ga na an ɲaamari ti an nan saage,
baawo Heroodi wa lemine ke muurunu na a kari. »
14 Yuusufu giri wuron kaananan ŋa,
na lemine ke do i ma wutu,
nan daga Misira.
15 I toxo no ma Heroodi gaa kalla.
Ken ɲa ya,
kuudo Kamanen ga da daale be ko annabi Hoseeya da,
ken na tinme,
a ga ti Alla ti :
« Renme ke be ga giri in ŋa,
n da a gangu ti a n bogu Misira yi. »*
[Beeti-leheemi leminun karinde]
16 Heroodi ga da a tu bire be ti tuwaanon lafi i janbana,
a butu ma a gaa dangini haqen ŋa.
A da sorodaasinun wara dagana Beeti-leheemi do i fonkaaradundebun ŋa.
A da i ɲaamari nan ti :
« Na a wutu tuwaanon ga da saane ke bange bire be ko,
nan daga a wara ken siina filla,
ren yugo su ga saare ken noxo,
axa na a su kari. »
17 Ken moxo,
annabi Yirimaahu ga da sefe be ko na tinme,
a ga ti Tunka Duumanten ti :
18 « Sonqo xoore wa Raama¤ deben ŋa,
juuga xote wa no.
Raheli¤ ya na i renmun wuunu.
A ma duŋe wuyen walla,
baawo a renmun da duna wara. »*
[Misira saageyen do Nasaara taaxe]
19 Heroodi kara falle,
Tunka Duumanten maliikan da du koyi Yuusufu yi wuraaxun ŋa na a toxo Misira.
20 A ti a da :
« Giri !
An na lemine ke do i ma wutu,
an nan ware killen ŋa katta Banisirayila ɲiiɲen ŋa,
baawo ku beenu ga ɲi a mulla na lemine ke kari,
i yinme kara. »
21 Yuusufu giri na lemine ke do i ma wutu,
nan ro Banisirayila ɲiiɲen ŋa.
22 Xa,
a ga kiɲe no,
a da a mugu ti Harixeela¤ ya n taaxu i faaba Heroodi falle Yehuuda maran fankan ŋa.
Ken saabu da a kanu toqo no.
Xa Alla da a gongo wuraaxun ŋa,
ken bire i daga Galiile maran ŋa.
23 A taaxu i gaa debe ke be xilli « Nasaara »,
kuudo annabinyinmen ga da sefe be ko na tinme,
a ga ti Alla ti :
« A na saage xiriini “ Nasaaranke.
” »*