[Muruxunten sahandiye]
2
Bito dangi falle,
Isa Alimasiiwu saage katta Kafarinoomu.
Seron da a mugu ti a wa kan ŋa.
2 Jaman da me kafu non ŋa ma taaxuran gaa kontono hari ganlaqen ŋa.
Isa wa a kanma na Alla digaamen kiɲandi i ya.
3 Sero naxati do muruxunte yogo ri katta a yi.
4 Jaman kasafoyen maxa,
i ma katu a koyini Isa yi.
Isa ga ɲi xube be yi,
i da ken kanma boto,
na muruxunten do i sanbaxan yanqandi katta a yi.
5 Isa ga da sero ku danqanaaxun wari,
a xosi ti muruxunte ke da :
« Ba,
an junuubunun xafari. »
6 Sariyanxaranmoxonu yogonu xa taaxunton ɲi no,
i ti i noxoodu :
7 « Ke yugo katta sefene kan moxo yi kundu,
a gaa du ragana Alla yi ?
Ko n katta junuubu xafarini Alla baane ya ga fe ? »
8 Ken sigira su yi,
Isa da i sinmeyen tu.
A xosi ti i da :
« Manne saabu da ku sinmayin danbu gaa axa sondomun ŋa ?
9 Nan ti muruxunten da :
“ An junuubunun xafari ”,
ma nan ti a da :
“ Giri an na an sanbaxan wutu nan tere ”,
kan nan newu ?
10 Ayiwa ken kuŋa,
axa wa a tuunu nan ti inke be ga ni Seren Renmen ŋa,
ɲaamariyen wa in maxa na junuubunun xafari ɲiiɲen kanma.
» A ti muruxunte ke da :
11 « Giri,
an na an sanbaxan wutu,
daga an kan ŋa. »
12 Yugon giri na i sanbaxan wutu a su jon ŋa nan daga.
A su kaawa ken ŋa,
i da tunkaaxun saaga Alla yi nan ti :
« O ma demu ke ken me walla abada ! »
[Leewi xiriye]
13 Isa saage katta Galiile xaaranxannen ŋa xadi.
Jaman wa riini a sagata,
a wa i xaranŋundini.
14 A danginte,
a da Haalife ren yugo Leewi wari taaxunu sagallitugeran ŋa.
Isa ti a da :
« Sukke do in ŋa.
» Leewi giri nan sukke do a yi.
15 Leewi da Isa xiri yigeyen ŋa i kan ŋa,
sagalliragaanon do junuubuɲaŋaana gabu xa ri taaxu kapa a do i xaranlenmon ŋa yigeyokken kanma,
baawo ken seran danbe gaben ya n ɲi do Isa batten ŋa.
16 Sariyanxaranmoxonu,
ikun be do Farisigankon gaa fi ya,
i ga da a wari a do kun seran danbu gaa yigene doome,
i xosi ti a xaranlenmon da :
« A do sagalliragaanon do junuubuɲaŋaanon xa gaa yigene doome yi kundu ? »
17 Isa da i mugu,
a ti i da :
« Sahante haajun nta jaarandaana yi ;
watunton ya haajun na a yi.
Sero beenu gaa du walla xo seri teleŋonto,
n ma ri kun xiri ;
ku beenu gaa du walla xo junuubunto,
n ri kun ya xiri. »
[Suumen xibaare]
18 Koota yogo,
annabi Yahaya xaranlenmon do Farisigankon ga suumi,
sero yogonu ri Isa tirindi ti :
« Yahaya xaranlenmon do Farisigankon xaranlenmon gaa suumini,
anken xallun xa ga nta suumini ? »
19 Isa ti i da :
« [N na xoyi maaɲuyugon ya yi.]
Yaala maaɲuyugon feddanlenmon ra wa suumini na i do maaɲuyugon toxo doome yi ba ?
I do a gaa doome,
wucen ga laato moxo su,
i ra nta suumini.
20 Xa,
koota wa riini maaɲuyugon gaa wutiini bakka i naxan ŋa,
ken koota ya ni i gaa suumini.
21 « Sere su nta yiran xase betelana ti yiran kurunba yi.
Ken ga na ɲa,
yiran kurunba ke wa yiran xasen tallan buudana.
Booxeyen wa tallan xoorono.¤
22 A wa xo sere su ga nta reesenjin kurunban roono sumalli xasen ŋa.
Ken ga na ɲa,
reesendolon wa sumallen fentindini.
Ken ŋa,
reesendolon do sumallen su wa bonno doome.
Xa,
aayi !
Reesenjin kurunban nan siri roono sumalli kurunban ya yi. »
[Tuumayinkootan kama]
23 Tuumayinkoota yogo,
Isa bogu ti yillinteenun ŋa,
a xaranlenmon wa do a yi.
I xosi yillijogodo yogo fata na i tooɲi na i kanbu.
24 Farisigankon ti Isa da :
« Terinke !
Nan golli Tuumayinkootan ŋa,
a kabanten ya ni.¤
An xaranlenmon xa gaa a dabarini kuŋa ? »
25 A da i jaabi nan ti :
« Tunka Daawuda do i teranlenmon ga ɲi doome,
dullen ga da i raga,
fo wo fo ma ɲi i maxa na a yiga,
i ga da fo be ɲa,
axakun ma ken xara abada ?
26 Habitaari gaa sadaxakiɲandaananyinmankaaxun ŋa bire be,
Daawuda ro allanbatikan noxon ya yi,
sadaxanbuuru be ga ɲi no,
i yigeyen daganten ni sadaxakiɲandaanon baane ya da.
Xa,
a da fo yiga na fo kini i teranlenmon xa yi. »*