[Tuumayinkootan xibaare]
12
Tuumayinkoota yogo,
Isa Alimasiiwu do i xaranlenmon bogu ti yillinteenun ŋa.
Dullen da a do i xaranlenmon raga.
I da yillijogodo yogo fata na i tooɲi na i kanbu.*
2 Farisigankon ga da ken wari,
i ti a da :
« Terinke !
Nan golli Tuumayinkootan ŋa,
a kabanten ya ni.
An xaranlenmon faayi gaa a dabarini kuŋa. »*
3 A ti i da :
« Tunka Daawuda ga da ke be ɲa,
axa ma a xara ya ba ?
Bire be dullen ga da a do i teranlenmon raga,
4 a ro allanbatikan noxon ŋa,
na sadaxanbuurun yiga.
Ken buuru ken xa yigeye ma daga aken do i teranlenmo ku su da.
I yigeyen daga sadaxakiɲandaanon baane ya da.*
5 Ma axa ma ke xa xara annabi Muusa Sariyan ŋa nan ti sadaxakiɲandaanon ma Tuumayinkootan daro Allanbatikaxooren noxon ŋa,
sere xa nta i jalagini de ?*
6 N wa a tuyindini axa yi nan ti fo wa yere lenki,
ken ga n xoora Allanbatikaxooren ŋa.
7 Safandi Sennun ti :
“ N na hinneyen ya mulla,
n nta sadaxa mulla.
”*
« Axa gan da ken faamu, axa nta ku sero jalagini gaaren kanma.
8 Baawo inke be ga ni Seren Renmen ŋa,
n ya ni Tuumayinkootan kaman ŋa. »
[Kittikaawanten xibaare]
9 Isa giri nan daga allanxarankan ŋa.
10 Yugu kittikaawante yogo ɲi no.
Farisigankon ti Isa da :
« A daganten ni na sere jaara Tuumayinkootan ŋa ba ?
» I da a xanu na jalagindimaana ya kita a yi.
11 A ti i da :
« Ko ni axa yi jaxanlen baane ya gaa a maxa,
Tuumayinkootan ŋa ken jaxanlenme gaa xenne geden ŋa,
a kanman ga nta telle a bagandi ?
12 Xoyi haadamarenme nta fasu jaxanlenme yi ?
Ken kuŋa,
fisiriɲanŋen daganten ya ni Tuumayinkootan ŋa. »
13 Ken sigira su,
Isa jaabi nan ti yugo ke da :
« An kitten fuutu.
» A ga da i kitten fuutu baane tan,
a saha nan ɲa xoyi kitti baane ke moxo.
14 Ken do i fi su,
Farisigankon bogu nan daga me wari i ra gaa Isa karini moxo be.
[Isa, Alla komo sugandinte]
15 Isa ga da ken mugu,
a daga noqu tana.
A dagante,
seri gabe sukke do a yi.
A da jangiranten su sahandi.
16 A da a xotondi i maxa nan ti sere su n maxa a ko i ga ni ke be yi.
17 Ke su ni ya,
annabi Yesayaahu ga da sefe be ko na tinme,
a ga ti Alla ti :
18 « N ga da in kome be sugandi,
a faayi,
N da a ya xanu na a sugandi,
Ma in ga ri in Fanka Sennen ro a yi,
A na teleŋontaaxun fin tuyindi xabiilan su yi.
19 A do sere nta fanqene ;
A do sere nta manqanŋa ;
Seren nta a xanne mukku do beddun ŋa.
20 A nta sokkitin ɲaaninte xosono ;
A nta ɲooma tiidinte karini,
ma teleŋontaaxun ga n sabati.
21 Xabiilan su na i jikken roono a ya yi. »*
[Isa do Ibiliisa xibaare]
22 Ken falle,
i do jinnagume yogo ri katta Isa yi,
a finkinten ya ni,
a muumunten xa ya ni.
Isa da a jaara ma a gaa fo walla nan sefe.
23 Ken da jaman su kaawafi moxoburu,
i ti :
« Eh !
Xori ke feti Tunka Daawuda renme ke ya yi de ? »
24 Farisigankon ga da ken mugu,
i ti :
« He,
a na jinnanun xatana ti Ibiliisa toxon ya yi sa,
aken be ga ni jinnanxirisen ŋa ! »*
25 Isa ga da ken tu,
a ti i da :
« Tunkaaxu wo tunkaaxu ga taxandi,
tunkaaxun bono.
Debe wo debe ma ka wo ka ga taxandi,
ken nta sabatini.
26 Ken moxo baane ya ni,
Ibiliisa gaa Ibiliisa xatana,
a da du taxandi ;
a sabatini kan moxo yi ?
27 Selli inke gaa jinnanun xatana ti Ibiliisa toxon ya yi,
axa xaranlenmon xa na i xatana ti ko toxo yi ?
I yinmenu na axa kiiti kuŋa.
28 Xa selli in gaa jinnanun xatana ti Alla Fanka Sennen ya yi,
ken wa a koyini ti Allantunkaaxun joofe axa yi.
29 « Ko n katta roono Ibiliisa me senbente kan ŋa,
an gaa a karana,
na a ɲi an ma joŋa a yinme ya ragana na a yetu fina ?
An ga na a yetu ya ni,
ken bire,
an na a kan kara pewu.
30 Sere wo sere ga feti in xana,
a kapa in xonnon ya yi ;
sere wo sere ga nta in deemana kafumandini,
sanqindaanan ya ni.
31 Ke ya saabu da,
n gaa tini axa da :
seren ga na yango do toxonbononde su ɲa Alla yi,
a ra wa a xafarini nan yanpa a yi.
Xa,
seren ga na Fanka Sennen toxon bonondi,
Alla nta ken xafarini abada.
32 Sere xa be ga na diganbure ko Seren Renmen da,
ken wa xafarini ;
xa sere be ga na diganbure ko Fanka Sennen da,
ken nta xafarini abada.
[Sefen do ɲanniye]
33 « Yitte be sahanten ga ni,
a ya renmen nan sirono ;
yitte xa be jangiranten ga ni,
a renmen nta sirono.
Yitten tuyini ti i renmen ya yi.
34 Ku kooson soxoodinu ku !
Axa maɲa !
Axa katta fo sire koono kan moxo ?
Ke be gaa seren sondomen ŋa,
ken ya na an raqen ŋa.
35 Seri siren golli xalasinten gilli a sondon xalasinten ya yi ;
seri buren xa golli buren gilli a sondon buren ya yi.
36 Tonŋu,
n na a ko axa da ti :
Seren ga da diganxafu su ko,
kiiten koota,
Alla wa an tirindini a yi.
37 Alla na an kiitini ti an yinme digan koninton ya yi,
ma an na kisi,
ma an na toxi. »
[Taagumansen dabariye]
38 Ken falle,
sariyanxaranmoxonun do Farisigankon yogonu ti Isa da :
« Xaranmoxo,
taagumanse koyi o yi ! »
39 A ti i da :
« Axakun seran danbu,
axa bononton ni de !
Ku laayidu bonondaano ku.
Axakun ya na inke tirindini taagumanse yi ?
Annabi Yuunusu xalle ke ma wase taagumanse yi gani ?
40 Yuunusu ga da kiyu ku sikki do wuru ku sikki ɲa geeji ɲexe xooren noxon ŋa moxo ke be,*
Seren Renmen xa na kiyu sikki do wuru sikki ɲaana ɲiiɲen wure kundun ya yi.
41 Kiiten koota,
Niniwenko¤ wa gilli na axakun soxoodi buru jalagi,
baawo ikun ga da Yuunusu gangunden mugu,
i tuubi.
Ke be gaa yere lenki,
ken nan xoora Yuunusu yi !
42 Kiiten koota,
banboxu jamaanen tunkanyaxaren xa wa gilli na ke soxoodi bure jalagi,
baawo a giri ma duna yinmen ya yi,
nan ri Tunka Sulemaanu fontuwaaxun terinka.*
Ke be gaa yere lenki,
ken nan xoora Tunka Sulemaanu yi ! »
[Jinnan saagaye]
43 Isa jaabi nan ti i da :
« Jinnan ga na bogu seren ŋa,
a yaalana do gunjuran ya yi,
na tuumara muuru,
xa a nta a kitta.
44 Ken falle a na ti :
“ Dugu,
n nan saage katta in konpen ŋa.
” A ga na ɲi riini,
a na a duuron ɲi,
a sellanten gemunte.
45 Ken bire,
a na daga jinnanu ɲeri tana muuru,
kun ga n bura aken yinme yi,
a do i na ri,
i na ɲa konpe ke yi.
A toqo ken moxo ya yi keeta ;
a lagarun wa tallan bonno.
Ke soxoodi bure xa na kundun ya yi. »
[Isa ma do a kaadunko]
46 Isa gaa finna sefene jaman da,
ma a ma do a waaxinun faayi ku sikki fonlaqen ŋa,
i gaa a mulla nan sefe a da.
47 {Yogo xosi i xanne toxo a da ti :
« An ma do an waaxinun faayi sikki fonlaqen ŋa de !
I wa a mulla nan sefe an da. »}¤
48 Isa jaabi nan ti a kaman da :
« Ko do ko ni in ma do in waaxinun ŋa ? »
49 A koore katta i xaranlenmon ŋa,
a ti :
« N ma do in waaxinun faayi.
50 Sere be gaa in Faaba kallanken sagon dabarini,
ken ya ni in ma ;
ken ya ni in maaren yugo ;
ken ya ni in maaren yaxare. »