Luka 11

[Allanbati moxo]

(Mace 6.9-13 ; 7.7-11)

Koota yogo, Isa Alimasiiwu allanbati noqu yogo yi. A ga duguta allanbatiyen ŋa, a xaranlenma yogo ti a da : « Xaranmoxo, o xaranŋundi allanbatiyen ŋa xo Yahaya ga da i xaranlenmon xaranŋundi a yi moxo ke be yi. » 2 Isa ti i da : « Axa ga na ɲi allanbatini, axa na ti :

“ O Faaba Alla, an toxon nan seno seren su maxa.

An tunkaaxun nan ri.

3 O biraadon kini o yi koota su.

4 Yanpa o junuubunun ŋa, baawo oku yinmenu wa yanpana o tooɲondaanan su maxa.

O kisi jaarabiyen ŋa. ” »

5 Isa yille tini i da : « Ayiwa, axa du baananbe ga na giri kaananan ŋa nan daga i menjanŋen fonlaqen konko nan ti a da : “ N menja, buuruyinmu sikki kini in ŋa de, 6 baawo in menjanŋe yogo ya faayi a ga ri yanqa in ŋa saasa, yigande fo wo fo xa nta in maxa in gaa a kinni a yi. ” 7 Menjanŋe ke ga na du toxo konpen noxon ŋa nan ti a da : “ Maxa in tooro ! N da in fonlaqen texe. N do in renmun xa saxu. N ra nta gilli ti in wa buuru kinni an ŋa saasa. ” 8 N na a ko axa da, hari menjanŋe ke ga ma giri na buurun kini a yi ti menjanŋaaxu yi, a ga na bara fatene a yi, menjanŋe ke wa lagarini gilli na a muurifon su kini a yi.

9 « Ken ya ni, n na a ko axa da ti :

Xa ɲaage, Alla na axa ku.

Xa muurundi, axa na kite.

Xa da fonlaqen konko, a na wuɲi axa kaane.

10 Baawo sere wo sere ga na ɲaage,

Alla wa an kuunu ;

sere wo sere ga na muurundi,

an wa kitene ;

sere wo sere ga na konkondi,

raqen wa wuɲiini.

11 « Kan faabe na axa yi, an renmen ga na an ɲaaga ɲexe yi, an gaa samaqen ya kinni a yi ? 12 Walla xa, a ga na an ɲaaga selinxabaane yi, an gaa ɲanton ya kinni a yi ? 13 Axa do axa kame seribonontaaxu su, axa ra wa fo siren kinni axa renmun ŋa, billati Faaba kallanken ken xa. Sero beenu ga na a ɲaaga i ŋa, a wa i kuunu nan xoto axa kuyindimoxon ŋa. »

[Isa kandan giri noqu]

(Mace 12.22-30 ; Maarika 3.22-27)

14 Koota yi, Isa da jinnan xata bakka yugo yogo yi, jinna ke ɲi ga da yugo ke muumundi ya. A ga bogu yugon ŋa, a saage sefene. Ken da jaman kaawafi. 15 Xa sero ku yogonu ti : « A na jinnanun xatana bakka seron ŋa ti toxon ya yi, ken ga ni jinnanxirisen ŋa. » 16 Yogonu xa ɲi a mulla na a xenpe. I ti a da, a na taagumanse yogo dabari na a koyi i ya nan ti a giri Alla ya yi. 17 Xa Isa wa i ŋanniyen tu, a ti i da : « Tunkaaxu wo tunkaaxu ga taxandi, a bono, kaanun xa na kare me kanma. 18 Ayiwa, ga na du taxandi, a tunkaaxun katta sabatini kan moxo ? Axa xa ti in na jinnanun xatana bakka seron ŋa ti Ibiliisa toxon ya yi. 19 Selli inke gaa jinnanun xatana ti Ibiliisa toxon ya yi, axa xaranlenmon xa na i xatana ti ko toxo yi ? I yinmenu na axa kiiti kuŋa. 20 Xa selli in gaa jinnanun xatana ti Allantoxon ya yi, ken wa a koyini ti joofe axa yi.

21 « Senbenten ga na i gajanyokkun wutu na i kan tanga, fo nta a naaburen kitana. 22 Xa sere be ra gaa a da, ken ga na ri xenu a yi, a jikken saxunten gaa gajanyokku ku beenu kanma, a ga na i su boosi a yi, a wa a naaburen taxandini seron naxan ŋa.

23 « Sere wo sere ga feti in xana, a kapa in xonnon ya yi ; sere wo sere ga nta in deemana kafumandini, sanqindaanan ya ni. »

(Mace 12.43-45)

24 Isa ti : « Jinnan ga na bogu seren ŋa, a yaalana do gunjuran ya yi, na tuumara muuru, xa a nta a kitta. 25 Ken falle a na ti : “ Dugu, n nan saage katta in konpen ŋa. ” A ga na ɲi riini, a na a duuron ɲi, a sellanten gemunte. 26 Ken bire, a na daga jinnanu ɲeri tana muuru, kun ga n bura aken yinme yi, a do i na ri, i na ɲa konpe ke yi. A toqo ken moxo ya yi keeta, a lagaru wa tallan bonno. »

27 Isa gaa ken sefe konŋen noxon ŋa, yaxare yogo xanxoore jama ke noxon ŋa a ti : « Wulluliŋontaaxun wa yaxare da, yaxare be ga sigi ti an ŋa, na an saara, na an sugundi ! » 28 Xa Isa da yaxare ke jaabi nan ti a da : « Tonŋu, xa sero beenu gaa Alla Digaamen terinkana na a batu, wulluliŋontaaxun na kun ya da ! »

[ ɲanŋe taagumanse yi]

(Mace 12.38-42 ; Maarika 1.11-12)

29 Seren gaben da me ɲi Isa banŋen ŋa, a ti i da : « Axakun seran danbu ni seri bononton ya yi, axa ti in na taagumanse ya dabari. Xa, taagumanse tana nta koyini axa yi, annabi xallen ga fe. 30 Baawo Yuunusu ga ɲa taagumanse yi moxo be Niniwenkon da, nke be ga ni Seren Renmen ŋa, n xa ɲaana taagumanse yi kundun ya yi ku seran danbu da. 31 Kiiten koota, banboxu jamaanen tunkanyaxaren xa wa gilli na ke soxoodi bure jalagi, baawo a giri ma duna yinmen ya yi, nan ri Tunka Sulemaanu fontuwaaxun terinka. Ke be gaa yere lenki, ken nan xoora Tunka Sulemaanu yi ! 32 Kiiten koota, Niniwenkon wa gilli na axakun soxoodi buru jalagi, baawo ikun ga da Yuunusu gangunden mugu, i tuubi. Ke be gaa yere lenki, ken nan xoora Yuunusu yi ! »

[Faten lanpa]

(Mace 5.15 ; 6.22-23)

33 Isa ti : « Sere su nta lanpa kunmu na a muxundi, walla xa, na xolle bifindi a kanma. Xa, an na a taaxundini lanpanjongaaden ya kanma kuudo sero beenu gaa roono konpen noxon ŋa, i na xurayen wari. 34 Faten lanpan ni yaaxen ya yi. Sere su yaaxen siren ga ni, an faten danman su na xurayen ya yi. Xa, an yaaxen xulle ga fe, an faten danman su na biten ya yi. 35 Ken kuŋa, an du koroosi xuraye be gaa an faten ŋa, a nan maxa bita. 36 An faten su ga na xurayen kita, bite ga nta a noqu su yi, a su wa xurayen noxon ŋa, xoyi an gaa lanpan xurayen noxon ŋa moxo be. »

[Farisigankon do sariyanxaranmoxonun jalagiye]

(Mace 23.1-36 ; Maarika 12.38-40)

37 Isa ga duguta sefen ŋa bire be, yogo da a xiri yigeyen ŋa. Isa daga a kan ŋa, i taaxu yiganden kanma. 38 Isa yige, a ma laadan dabari, ken ga ni a ga ma i kittun wanqi saado a gaa yigene. Farisiganke ke kaawa ken ŋa. 39 Ken ya ni Kamanyugo ti Farisiganke ke da : « Axakun Farisiganko, axa wa jiranxollon do yigexollon falle wanqini, na a toxo axa sondomun fakkon wa ti fayiyen do bureyen ŋa. 40 Axakun ni bononto ya yi ! Ke be ga da sellan taga, a ya ma noxon xa taga gani ? 41 Xa sadaxindi Alla da ti nuxudunxullaaxu. Ken ya ni, an su na seno.

42 « Bone wa axa da, axakun Farisiganko ! Baawo axa wa jakkan bagandini hari axa naaxon soxofoonun su yi, kun ga ni naanayen do ken me xawaara yi. Xa fo be ga n xoto, axa da ken toxo falle, ken ga ni teleŋontaaxun do Alla xanuyen ŋa. Axa ɲi ga n xawa joŋana ku fina ya yi, ken falle, axa na kutte ke sukka a yi. 43 Bone wa axa da, axakun Farisiganko ! Baawo axa na a mulla nan taaxu sapa kaanankon ya yi noxon ŋa ; axa wa a mulla i na axa darontankuuɲi do beddun ŋa. 44 Bone wa axa da ! Baawo axa na xo xabura muxunton ya : seron gaa terene i kanma, i ga nta a tu ti i wa terene fo kanma, fo be gaa i sobindini. »

45  ku baananbe ti Isa da : « Xaranmoxo, an da o xa ka ya kundu de ! » 46 Isa jaabi ti : « Bone wa axa xa da, axakun sariyanxaranmoxonu ! Baawo likke be wutunden xoten ga ni, axa wa ken taaxunu seron ŋa ; axa nta hari axa kitte kapa i maxa.

47 « Bone wa axa da ! Baawo axa xooxonu ga da beenu kari, axa xa da tageyi faranparon taga i xaburon kanma ! 48 Axa yinmenu seede ti a yi nan ti axa duŋe ti axa xooxonu ɲangollen ŋa, baawo ikun da annabinyinmun kari, axa xa da tageyi faranparon taga i xaburon kanma !

49 « Ken kuŋa, Alla be ga ni tuwaanan ŋa, a ti : “ N wa annabinyinmun do xayifaarun xayini katta i ya, i wa i yogonu karini, i wa i yogonu yanganxatana. ” 50 Ken ya saabu da lenki seron gaa yanganxatayen kitana na a sababun ɲa annabinyinmun karinden ŋa gelli duna sikke, 51 na a wutu karinden ŋa nan ri a wara Jakkariyaawu karinden ŋa, Jakkariyaawu ke be i ga da a kari allanbatikan sadaxindinoqun do a naxa. N wa a koono axa da tonŋun ŋa ti, ku seran meenu wa yanganxatan kitana do ku serikallu batten ŋa !

52 « Bone wa axa da, axakun sariyanxaranmoxonu ! Baawo axa da kisiyen tuwaaxun xarinlenmen wutu ; axa yinmenu ma ro. Ku beenu gaa royen mulla, axa da kun xa kaba roono. »

53 Isa ga giri ken dingira yi nan daga, do Farisigankon da xonnaaxu xote wutu katta a yi, i wa a tirindini tirindinde ke moxonman su yi, 54 na jalon tugu a kaane ma i wa a kitana a na sefe bure ko.