Luka 12

[Dukoroosiye munafaxaaxun ŋa]

Ken bire, jama be ga da me ɲi Isa Alimasiiwu noqun ŋa, a wa wujunun jaatun bakka, ma seron gaa ɲaana xo i wa sikki me taanun kanma. Isa joŋa sefene i xaranlenmon fina ya da, a ti i da : « Xa da du koroosi ŋa, ken ga ni i munafaxaaxun ŋa. 2 Fo muxunten su wa bangeene ; gundon su wa tuyiini. 3 Ken ya saabu da, axa ga na fo wo fo ko biten ŋa, a gaa riini mugi kiiranxullen ŋa ; ke be gaa mullinkoniini axa tarun ŋa konpobiten ŋa, a wa gangiini xuben kanma.

4 « N menjanŋu, n na a ko axa da : ku beenu gaa yonkin bagandini faten ŋa, i ra ga ntaxa fo wo fo tana ɲaana ken falle, xa maxa kanu kun ŋa. 5 Axa ga n xawa kanna fo be yi, n na a ko axa da : axa kanu Alla ya yi, aken be ga na an kari, a ra gaa an sedde yi. Yabo, n na a ko axa da : axa n xawa kanna a ya yi.

6 « Yelinmiso karagi nta gaagene godo miso filli yi ba, baawo i nafan roxen ya ni ? Xa ganta Alla ma mungu i du baananbe su yi. 7 Hari axa yinmanyinten su jaaten tuyinten ya ni Alla maxa. Ken kuŋa, xa maxa jooti : axa ya n fasu yelinmisa gabu yi !

8 « Sere wo sere ga na seede ti inke yi seron jon ŋa, sigen koota, nke be ga ni ŋa, n xa wa seedene ti a kaman ni in yogo ya yi, Alla maliikanun jon ŋa. 9 Xa, sere be ga na in nakkari seron su jon ŋa, nke xa wa a kaman nakkarini Alla maliikanun jon ŋa. 10 Sere wo sere ga na sefe bure ko Seren Renmen da, yanpayen wa ɲaana a kaman maxa, xa sere be ga na Alla toxon bonondi, yanpaye nta ɲaana ken kaman maxa.

11 « I ga na axa raga na axa deni ŋa, ma yinmanko, ma fankamanun banŋe, axa ga n xawa du faasana moxo be, ma axa ga n xawa fo be koono, ken jooten nan maxa axa raga, 12 baawo axa ga n xawa ke be koono, Alla Fanka Sennen wa axa xaranŋundini a yi ken sigira yi. »

[Banna haqilanloxen masayila]

13 Yugo yogo da du toxo Isa da jama ke noxon ŋa nan ti : « Xaranmoxo, a ko in gida da ti o faaba ga da naabure be toxo o maxa xaye yi, a na in taqen kini in ŋa. » 14 Isa ti a da : « Yugo ke, sere su ma in taaxundi ti in nan ɲa axa da kiitikutaana yi, walla xa nan ɲa axa da naabure taxandindaana yi. »

15 Ken falle a ti jaman su da : « Xa da du koroosi, xa da du raga bakka naaburen xanuyi moxo buren maxa, baawo haadamarenmen naaburen ga na gabo moxo wo moxo, a naabure ke ra nta a yonkin kisini. »

16 A yille ke xa koono i da ti : « Ke ɲa yugu banna yogo ya yi, soxen ga liŋo a yi moxosiri. 17 A sinme na du tirindi ti : “ Yaala in na manne dabari saasa ? N ga da soxofoonu beenu kita, i marera nta in maxa. ” 18 Ken falle a ti du da : “ N gaa fo be ɲaana saasa, n faayi in maron ya karana nan yille fo xooro tagana, n na in yillen do in kitefon su ro i noxon ŋa. 19 N na a ko du da xadi ti : ‘ N yugo, naaburen gaben wa an maxa a gaa siine gabe dangindini ; du laxafiya, yige an nan mini an nan sanga. ’ ” 20 Xa Alla ti a da : “ Haqilanloxe ke, an wa kalla wuro ke su. Ken kuŋa, anke naabure su, a ɲaana ko xa xalle yi ? ” » 21 Isa ti xadi : « Sere be gaa naaburen gaben kapa me yi duudantaqe yi, a kaman alihaalan na kundun ya yi, xa Alla ken maxa, a kaman feti banna yi. »

[Danqanaaxu]

(Mace 6.25-34 ; 19-21)

22 Ken falle Isa ti i xaranlenmon da : « Ken saabu da, n wa a koono axa da ti : xa maxa hanmi axa bireyen ŋa, xa gaa fo be yigana. Xa maxa hanmi do axa faton ŋa, axa gaa fo be rondini. 23 Baawo bireyen ya n xoto biraadon ŋa ; faten ya n xoto feetufataadon ŋa. 24 Xa da yelinxaaxun faayi : i nta tifini, i nta fatene ; konpen nta i maxa naxafa gaa a noxon ŋa ; mara nta i maxa, xa Alla wa i naxafana. Axa ya n fasu yeliŋun ŋa buru ! 25 Ko na axa yi, hanmi saabu da, an ra gaa hari subure kapa an wuyin ŋa ? 26 Axa ra ga nta fo da fi bucinnen ŋa, manne xa saabu da axa gaa hanmini do fi xoore yi ? 27 Xa da gunnen sokkun faayi, i gaa funtini nan fuugu moxo be : i nta gollini, sakkati i na miri. N na a ko axa da nan ti : hari tunka Sulemaanu do i kame bannaaxu, a ma demu yiran faranpare rondini, a gaa sokku ku baananbe fuugen faranparoyen bakka. 28 Gunnen sokkun be ga ni ku yi lenki, Alla ga da i feetufata, xunbane i sediini yinben ya yi. A nta axakun ya feetufatana diinanta sokku ku yi ba ? Axa danqanaaxun roxen ni de ! 29 Ken kuŋa, axa gaa ke be yigana ma axa gaa ke be minni, xa maxa hanmi ma axa haqilun ga bono. 30 Duna renmun ya hanmini ku fiinu muurunden ŋa waxati su. Xa, axa Faaba Alla wa a tu axakun haajun gaa fo be yi. 31 Xa, xa da a tunkaaxun ya muuru fina ; a na ke su kafu axa maxa.

32 « Axa beenu ga sukke do in ŋa, axa maxa kanu. A da axa Faaba saga na i tunkaaxun kini axa yi. 33 Xa da axa naaburun gaaga na i jonkon sadaxi misikiinun ŋa. Xa da xaalisiroofo ya kita fo be ga nta bonno ; xa da naaburen kafu me yi kanxotten ya yi Alla banŋen ŋa. Axa naabure nta sankunu non ŋa abada : fayaana kitte ra nta a kitana ; xaase xa ra nta a bonondini. 34 Baawo an naaburen gaa noqu be yi, an sondomen xa na non ya yi.

[Isa dugunde]

35 « Axa naxaanun siitinton nan ɲi, na axa lanpanun kumunton toxo axa maxa. 36 Xa ɲa xo sero beenu gaa i kamanyugon dukku a gaa gilli ɲaxan ŋa, kuudo a ga na ri na baafen konko tannu, i na fonlaqen wuɲi a da. 37 Wulluliŋontaaxun wa komo da, ku beenu, i kamanyugon ga na yille riini, a gaa i ɲiini i yaaxon ŋa. N wa a koono axa da tonŋun ŋa, a wa i naxaanen siitini na i moxon sirondi yigeyen xanne maxa, na yiganden kini i ya. 38 A riyen ga na gemu hari wuron taxandi filla ma a taxandi sikkan ya yi, na i ɲi i yaaxon ŋa, wulluliŋontaaxun wa i da.

(Mace 24.42-51)

39 « Xa da a faamu siri nan ti kaagumen gan n ɲi fayaanan ri waxatin tu, a nta fayaanan walla roono i kan ŋa nan fayi. 40 Axa xa na axa moxon sirondi, baawo axa nta du do Seren Renmen ri biren taaxunu. »

41 Ken falle Piyeeri ti a da : « Xaranmoxo, an da ke masayila ko oku baane ya da ba, ma an da a ko seren su ya da ? » 42 Kamanyugo ti a da : « Golliɲaŋaana fontuwaana duntenŋen ni ko baane yi ? Ken ni sere ke be kamanyugon ga da i kan xaliifa a yi, a ga ti a na a koroosi, a na yiganden kini i komo kuttun xa yi i waxatin ŋa. 43 Ken golliɲaŋaana ni wulluliŋonten ya yi, selli a kamanyugon ga ri na a ɲi ken golle kanma. 44 Tonŋu, n na a ko axa da : a kamanyugo ke wa riini i kittidufoonun su xaliifa a yi. 45 Xa, selli golliɲaŋaana ke ga na du toxo nan ti : “ N kamanyugon leele riini ”, nan xenu komo yugun do komo yaxarun ŋa na i katu, nan yige, nan mini ma a ga mande, 46 kamanyugo ke xosi ri koota be a ga ma du do a taaxu, a do waxati be a ga nta a tu, a wa a yanganxatana, yanganxateye be danqanaaxuntanbalinun do a ga n xawa.

47 « Kome be gaa i kamanyugon liŋun tu, a ga bara liŋu ke dabarini, ken katijaanen wa gaboono. 48 Xa kome be ga nta i kamanyugon liŋun tu, a ga na katigolle dabari, a katijaanen nta gaboono. Fo gabe ga kini sere be yi, fo gabe muuriini a kaman ya maxa. Fo gabe ga na xaliife sere be yi, fo gabe muuriini a xa ya yi.

[Seron baraye me yi do Isa batte]

(Mace 10.34-36)

49 « N ri ti yinbe yogo ya yi ɲiiɲen yaaxen kanma, yinbe ke gan kumi a ya n ɲi ga n liŋa in da siri ! 50 Toora xote nan xawa in kitana. N na hanmi xoore xa ya noxon ŋa, o do toora ke gaa in kitana koyi ! 51 Axa da a sinma ti in ri ti genmen ya yi duna yi ba ? Aayi, n ma ri ti genme yi, n ri ti me waaliyen ya yi. 52 Baawo keeta, sero karagi gaa ka yi, seron sikki do fillon wa me waalini. 53 Yugon do i ren yugon wa me waalini ; ren yugon do i faaba wa me waalini ; yaxaren do i ren yaxaren wa me waalini ; ren yaxaren do i ma wa me waalini ; yaxaren do i ren yugon yaqen wa me waalini ; yaxaren do i kiina ma wa me waalini. »

(Mace 6.2-3)

54 Isa yille tini jaman da : « Axa ga na tabullen wari a ga bogu kinxennan ŋa, axa na xosi ti : “ Kanmen wa texeene ”, kanmen texeene xa ya mene. 55 Axa ga na fanken wari gilli ti banboxun ŋa, axa na ti : “ Tewoyen wa bakka ”, tewoyen bakka ya xa. 56 Ku allankananbalinu ku ! Axa wa kanmun do ɲiiɲen alihaalanun tu ; ayiwa manne xa saabu da o gaa waxati ke be yi saasa, fiinu beenu gaa a kanma nan ɲaŋi, axa ga ma i faamu ?

(Mace 5.25-26)

57 « Manne saabu da axa yinmenu ga nta jaatiragayen ɲaana na fi teleŋonton dabari ti du yi ? 58 Ayiwa, sere be nda an xiri kiite, duruxoto an do a na me faamu saado axa gaa joofene kiitikutiran ŋa, ken ga fe, a nan maxa an kini kiitikutaanan ŋa, kiitikutaanan gaa an kinni polisinun ŋa, kun xa gaa an roono kason ŋa. 59 N na a ko an da, an nta bakka kason ŋa na hari tanma baane tanbon toxo an xannen ŋa an ga ma a tuga. »