Mace 10

[Isa Alimasiiwu faarun tanmi do fillo]

(Maarika 3.13-19 ; Luka 6.12-16)

Ken falle, Isa Alimasiiwu yinme da i xaranlenmon tanmi do fillon xiri. A da kandan kini i ya kuudo i na jinnan xata bakka seron ŋa, i na tooran do watten xabiilan su xa sahandi. 2 Isa ku tanmi do fillon toxonun faayi :

faari fana, ken ni Simoona ya yi, Isa da aken xiri « Piyeeri », a do i waaxi Handere,

Sebede renme do i waaxi Yohanna,

3 Filipu xa do Baritoloome,

Tooma do Mace, ken ga ni yi,

Haalife renme Yaaxuba, ken do Taade,

4 Simoona, i gaa aken xilli « Faabankan maxawasandaana »,

kun do Hisikarooti, ken ya n da Isa janba.

[Isa faarun xayiye]

(Maarika 6.7-13 ; Luka 9.1-6)

5 Isa da ku faaru tanmi do fillo ya xayi na ku digaamu ko i da nan ti : « Xa maxa daga katta xabiila tana su yi Yehuudiyan ya ga fe ; xa maxa daga Somooronkon xa debe yi de ! 6 Xa daga katta ya yi, i be gaa xoyi jaxa sankunto. 7 Axa daganto, axa na waajundi nan ti : “  tinko ! ” 8 Axa na jangiranton jaara, na furun girindi, na fatanwattiburugumun senondi, na jinnanun xata. Axa da ke seye kita xafu ya yi ; axa na a kuyi xafu. 9 Axa ga na ɲi telle, axa do kanŋen n maxa daga, axa do goden n maxa daga. Xa maxa xaalisin moxonma su ro axa jiibon ŋa. 10 Xa maxa hari doroko filli wutu sakkati fudi. Xa maxa tepu wutu. Xa maxa guma wutu, baawo golliɲaŋaanan do yiganden nan xawa.

11 « Axa ga na kiɲe debe su yi, axa na jaatigi sire muuru a ra gaa axa bisimillana ma axa ga n daga koota be. 12 Axa royinto, axa nan kuuɲindi. 13 Ken kaagume ga na axa bisimilla, Alla na axa kuuɲinden ɲaŋi a da xeeri yi. Selli a ga ma axa bisimilla, axa kuuɲinden xeerin wa saageene katta axa yi. 14 Ka be walla debe be ga na bara axa bisimillana, ma i ga na bara axa terinkana, axa bogunto, xa da axa taaranɲiiɲon konko ; axa nan bogu non ŋa. 15 Tonŋu, n na a ko axa da : kiiten koota, ken debe gaa yanganxata be walla, hari debu, i nta ken me walla.

[Isa faarun toorakiteye]

(Maarika 13.9-13 ; Luka 21.12-17)

16 « Ken kuŋa, n wa axa xayini xoyi jaxanlenmu, turuŋun naxa, axa nan ɲa haqilanto yi xoyi samaqe, nan ɲa nooxu xa yi xoyi boore. 17 Xa da du koroosi seron ŋa : i wa axa kiitini, na axa katu ti gaɲan ŋa i noxon ŋa. 18 I wa axa xiilini katta fankamanun do tunkanyugun ŋa. Ken su na do inke ya batten ŋa : axa na seede in da ti axa gaa ke be tu, ikun do xabiilan tanan su jon ŋa. 19 I ga na axa xiri kiite yi, xa maxa kanu sefene ; xa maxa hanmi axa gaa ke be koono. Axa ga n xawa na ke be ko, Alla wa ken roono axa raqun ŋa ken sigira su yi, 20 baawo axa gaa ke be koono, axakun sefe fe, axa Faaba Alla ya na sefon roono axa raqun ŋa.

21 « Waaxin wa i waaxin roono kittu yi kuudo a n kara ; faabe wa i renmen roono kittu yi ; renmun wa riini giri i saaraanon xanne maxa na i ɲamallexu. 22 Seren su wa xonnaaxun wuttu katta axa yi inke saabu da, xa sere be ga na muɲi ma fin lagaru, ken kaman ya n kisini. 23 I ga na axa tooro debe be yi, axa wuru bakka no, axa n daga debe tana yi. Tonŋu, n na a ko axa da : axa ra nta Banisirayila debun su ɲamana yere do gaa riini.

24 « Xaranlenma su nta i xaranmoxo kanma ; kome xa su nta i kaman kanma. 25 Xaranlenman ga da i xaranmoxo baga, a wase. Komen xa ga da i kaman baga, a wase. Seron ga da koren xirisen xiri , i na a koren xilli fo ya yi a ga n xoto Ibiliisa yi.

[Alla ya ni kanufo]

(Luka 12.2-7)

26 « Ken kuŋa, xa maxa kanu sere yi de ! Fo wo fo gaa biten ŋa, a riini xura ya ; fo wo fo gaa gundon ŋa, ma a ga ri tuyi. 27 N gaa ke be koono axa da biten ŋa, xa da a ko xurayen ŋa ; ke be gaa mullinkoniini axa tarun ŋa, xa da a gangu xuben kanma. 28 Xa maxa kanu axa karindaanon ŋa, baawo kun katta axa karini baane ya ; i ra nta fo wo fo ɲaana axa yonkinun ŋa. Alla be ra gaa faten do yonkin su buyini yi, xa kanu ken ya yi. 29 Xoyi sere nta yelinmiso filli gaagana godo baane yi ba ? A xa de, yelin baane ra nta gilli sonkan ŋa nan yere, axa Faaba Alla ga nta a tu. 30 Axakun be ga ni, hari axa yinmanyinten su jaaten tuyinten ya ni Alla maxa. 31 Ken kuŋa, xa maxa jooti : axa ya n fasu yelinmisa gabu yi !

[Toŋondiye ti Isa yi]

(Luka 12.8-9)

32 « Sere wo sere ga na seede ti inke yi seron jon ŋa, ma in xa ga seede an da in Faaba kallanken jon ŋa. 33 Xa sere be ga na in nakkari, n xa wa a kaman nakkarini in Faaba kallanken jon ŋa.

[Seron fateye]

(Luka 12.51-53 ; 14.26-27)

34 « Xa maxa a sinma nan ti in ri ti genmen ya yi seron naxa. Aayi, n ri ti me sooxiyen ya yi seron naxa. 35 Tonŋu, n ri ren yugon do i faaba ya sooxindi me yi, na ren yaxaren do i ma sooxindi me yi, na yaxaren do i kiina ma sooxindi me yi. 36 An kaadunkon wa ɲaana an da xonne yi.

[Na an du su kini Isa yi]

37 « Sere su gaa i saaxa ma i faaba ya mulla diinanta inke yi, a kaman ma xawa in batta. Sere wo sere xa gaa i renmun ya mulla diinanta in ŋa, ken kaman xa ma xawa in batta. 38 Sere wo sere ga nta i wuttu nan sukke do in ŋa, ken kaman ma xawa in batta. 39 Sere wo sere ga da i yonkin tanga, a wa bonno, xa sere wo sere yonkin ga bono inke ya saabu da, a wa a kitana.

[Jaatigaaxun baraaje]

(Maarika 9.41)

40 « Sere be ga na axa bisimilla, a kaman da inke yinme ya bisimilla mene ; sere be ga na inke bisimilla, a da Alla ke be ga da in xayi ya bisimilla. 41 Sere be ga na bisimilla ti baawo xayifaaren ya ni, a wa ken xayifaaraaxu muson me kitta. Sere be ga na seri sire bisimilla ti baawo seri siren ya ni, a wa serisiraaxun muson me kitta. 42 Tonŋu, n na a ko axa da : sere wo sere ya ga da kaasi baane haqe miniji kini in xaranlenmon su fo maxayanqanten ŋa n xaranlenmaaxun saabu da, ken kaman muson nta bonno. »