[Nasaaranko balle Isa yi]
6
Isa Alimasiiwu giri non ŋa nan saage katta i kaara,
a xaranlenmon wa do a yi.
2 Tuumayinkootan ŋa,
a ro allanxarankan noxon ŋa na xaranŋundinden jopa.
A terinkaanan fo gabe kaawa a yi,
i ti :
« Ke moxo giri ke danŋa ti minna yi ?
Ko n da ke fintuwaaxu kini a yi ?
Ke kaawafi su dabarimoxon giri a da ti minna yi ?
3 Sakka yugo ke ya fe gani ?
Mariyaamu renme ke,
Yaaxuba do Yuusufu¤ waaxi ke ya fe gani,
a do Yehuuda do Simoona ?
Xoyi a gidanyaxarun nta o maxa yere ya yi ba ?
» Ke sinme moxo ya n sigi i ga kori saqa Isa yi.
4 Isa ti i da kuŋa :
« Annabinyinmen ma roxe noqu su yi,
ma a ga nta a yinme saaredeben do a sunpun do a kan noxon baane. »
5 Isa ma katu kaawafi su dabarini non ŋa,
a ga ma ɲa na i kitten saxu watunto yogonu kanma i ga saha.
6 I danqanaaxuyinbalaaxun da Isa kaawafi moxoburu.
[Faarun tanmi do fillon xayinde]
Isa da fonkaaradundebun wura kuudo nan xaranŋundindi.
7 A da faarun tanmi do fillon xiri,
na jinnaxateyen kandan kini i ya,
na sero filli-filli xayi.
8 A da i ɲaamari nan ti i do fo wo fo nan maxa ware killen ŋa a ga ma ɲa guma ya yi.
A ti i da :
« Axa do silifanda nan maxa daga ;
axa do fudi n maxa daga ;
axa do xaalisi n maxa daga.
9 Xa da axa tepunun kun rondi,
xa axa do doroko filli n maxa daga.
10 Axa ga na ro ka be yi,
i ga na axa bisimilla,
axa na toxo non ŋa ma axa ga n daga koota be yi.
11 I ga ma axa bisimilla debe be yi,
i ga bara axa terinkana,
axa nan dangi non ŋa ;
axa daganto,
axa na axa taaranɲiiɲon konko na i toxo i maxa non ŋa,
ken na ɲaŋi i da seeda yi. »
12 I daga,
i waajundi tuubiyen fin kanma.
13 I wa jinnan gaben xatana,
na ten joxi watunta gabe xa kanma na i sahandi.
[Annabi Yahaya kalle]
14 Tunka Heroodi da Isa xibaaren mugu,
na a sababun ɲa a toxon ga xooro moxo be yi.
I ti :
« Annabi Yahaya ya n wundi bakka furun naxan ŋa,
ken ya n sigi a ra gaa ku kaawafi xooro dabarini kundu. »
15 Yogonu xa ti :
« Annabi Hiliyaasu ya ni !
» Yogonu xa na ti :
« Annabinyinme yogo ya ni,
a do annabinyin fano ku du baananbe ga n xawa sa. »
16 Xa Heroodi ga da ku sefo mugu,
a ti :
« N ga da Yahaya ke be yinmen kutu de,
a ya faayi ke a ga wundi bakka furun naxan ŋa. »
17-19 Ke Yahaya kundu,
annabinyinmen ya ni.
Heroodi ga da i waaxi Filipu yaqe Heroodiya yaxi,
aken Yahaya ya n ti :
« An waaxin yaqen yaxiyen ma daga an danŋa.
» Heroodiya mome Yahaya wure ke ya yi ;
a da a xanu Heroodi na a kari,
baawo aken yinme ra ma ɲi a karini.
Heroodi da a raga,
na surunmun ro a yi,
na a ro kason ŋa.
20 Ken do i fi su Heroodi wa kanna Yahaya yi,
baawo a wa a tu nan ti Yahaya ni seri teleŋonte ya yi,
a sennen xa ya ni.
Ke saabu da,
a wa a koroosini.
A ga na Yahaya mugu sefene tan,
a ntaxa a tu i ga n xawa ke be ɲaana,
xa,
a wa a mulla na a sefon terinka.
21 Xa Heroodiya xa da koota xerexerente yogo kita i ra gaa Yahaya karini,
ken ga ni Heroodi saarayen siinanyillayen ɲaxan ŋa.
Ken koota,
Heroodi da yigandi xoore soro na deben seri xooron do fankan yinmankon do Galiile seri siren su xiri.
22 Heroodiya ren yaxaren ro dinmen ŋa,
a rege moxosiri.
Ken da Heroodi do jaman faton bogu me yi.
Heroodi ti yaxanne ke da kuŋa :
« Fo wo fo ga n liŋi an da,
a ko.
N wa a kinni an ŋa lenki. »
23 A saage kunana kapa a yi nan ti :
« A ga na ɲa hari in mareye ke taxanden ya yi,
n wa a kinni an ŋa »
24 A bogu dinmen ŋa nan ti i ma da :
« N nan xawa tini in na manne mulla ?
» Saaxen ti a nan ti :
« Yahaya yinkolla. »
25 A wurunten daga katta tunkanyugon ŋa nan ti a da :
« N na a mulla an na Yahaya yinkollan ya ro lafan kanma saasa na a kini in ŋa. »
26 Tunkanyugon suno.
Xa,
a kunaye ke do jama ke saabu da,
a kori balla a da.
27 Ken sigira su yi,
a da ɲaamariyen kini sorodaasi yogo yi ti a nan daga Yahaya yinmen kutu do a nan ri.
Sorodaasi ke daga Yahaya yinmen kutu kason ŋa.
28 A do yinkollan ri lafan kanma na a kini yaxanne ke yi,
ken xa da a kini i ma yi.
29 Yahaya xaranlenmon ga da ken mugu,
i ri a wutu nan daga a firindi.
[Buurun gaboye]
30 Isa faarun meɲi a banŋe,
i ga da fo wo fo su ɲa,
a do i ga da fo wo fo xaranŋundi,
i bogu ti a su yi na a ko a da.
31 Isa ti i da kuŋa :
« Axa ri senbe fonkaaran ŋa xa na tuuma.
» Seren gaboyen saabu da,
hari i ma katu yigene.
32 I da fuuren wutu kuŋa,
nan laato bakka seron ŋa nan daga noqu xiidinte yi.
33 Seri gabe da i daganton wari,
na i tu xa mene.
I tere i taanun ŋa,
nan giri do kaaran su yi nan wuru na Isa do i xaranlenmon saama i gaa telle noqu ke be yi.
34 Isa ga bogu fuuren ŋa,
a yaaxen wa jama xooren ŋa.
A hinne i ya,
baawo i ɲa xoyi nagaana ga nta jaxo be yi ya.
Ken sigira,
a xosi i xaranŋunden jopa fi gabe yi.
35 Wuron ga ro,
a xaranlenmon tinko a yi nan ti a da :
« Yere ni gunjuran ya yi :
waxatin ken xa faayi ga laato,
36 yanpa seron maxa i n daga yigandimuuri debun do dabbaayun ŋa. »
37 Xa Isa jaabi i da :
« Axa yinme na yigande kini i ya ke !
» I xa da a jaabi nan ti :
« Anke na a mulla o n daga kamo filli godoxulle¤ ya ro i danŋa buuru yi na a kini i ya i nan yige ba ? »
38 Isa ti i da kuŋa :
« Buuruyinmu manime na axa maxa ?
Xa daga non faayi.
» I ti :
« Buuruyinmu karagi do ɲexenlenmu filli ya na o maxa. »
39 Ken noqu,
Isa ti i na jaman taaxundi sokkinxayen kanma sapa ti sapa.
40 I da sapon taaxundi a yogo kame,
a yogo tankarage.
41 A da buuruyinmu ku karagi do ɲexenlenmu ku filli wutu,
a da i dellen wutu katta kanmun ŋa na Alla tiiga.
Ken falle,
a da buurunu ku kutu-kutu na i kini xaranlenmon ŋa ti i na i kini jaman ŋa.
A da ɲexenlenmu ku filli xa taxandi a su naxa.
42 A su yige nan fogu.
43 I do kanda fakko tanmi do fillo ya n ri buuru dunŋen do ɲexen kutte be ga toxo.
44 Wujunu karagi yugo xa ya n yige de.
[Isa tereye jin kanma]
45 Ken falle,
Isa da i xaranlenmon rondi fuuren ŋa,
i n janbandi i kaane waxen ŋa katta Beeti-saayida yi,
katta a yinme gaa yanpana jaman maxa.
46 A ga yanpa jaman maxa bire be,
a sege giden kanma na Alla batu.
47 Wuron ga ro,
fuuren kiɲe xaaren naxaanen ŋa.
Isa ga fe,
sere su ma toxo doŋan ŋa.
48 A ga da a tu nan ti i xaranlenmon tanpi sunbanden ŋa na a sababun ɲa i do fanken gaa genme,
katta lafajiri,¤
a tere jin kanma na i fanpa.
Fonne ya n toxo a na dangi i ya.
49 I yaaxen gaa a yi terene jin kanma riini,
i da a sinma jinnan ya yi,
i toxo xaarunu.
50 I haqilun bono,
baawo i su da a wari ya.
Xa,
Isa jawo sefene i da nan ti :
« Xa da axa haqilun taaxundi !
Nke ya ni,
axa maxa kanu. »
51 Ken falle,
a ro kapa i ya fuuren ŋa,
fanken sigi.
Ken da xaranlenmon kaawafi moxoburu.
52 Baawo buurunu ku xibaaren xa,
i ma katu fo wo fo faamunu,
baawo i haqilun beexinton ya ni.
[Watunton sahande Kinereeti yi]
53 I ga da xaaren kutu,
i sege katta Kinereeti na i fuuren joofa bologaanen ŋa.
54 Gelli i ga yanqa bakka fuuren ŋa baane tan,
non seron da a tu ti Isa ya ni.
55 Seron wuru do jamaanen noqun su yi kuŋa,
i ga na a mugu nan ti Isa wa noqu su yi,
i do watunton na ri i gaa i saxufoonun kanma.
56 A ga na ɲi noqu su yi,
debi xooron do debinlenmu,
kafiini dabbaayu,
seron do i watunton wa riini bera xooren ŋa na a muuru a maxa nan ti a nan duŋe i na hari kati a dorokokanpen ŋa.
Sere wo sere ga kati a dorokokanpen ŋa,
a kaman saha.