[Jinnanun xataye]
5
Isa Alimasiiwu do i xaranlenmon kiɲe Galiile xaaren falle,
Gerasankon maran ŋa.
2 Isa ga yanqa bakka fuuren ŋa tan,
yugo yogo,
jinnan gaa a yi,
a xosi bogu furungoorun ŋa nan ri a gemundi.
3-4 A ɲi bireene furungooru ku ya yi,
sere su ra ntaxa a da.
I demu a roono xarun ŋa na hari a siiti ti surunmun ŋa.
Xa,
a da xarun xoso,
na surunmun kutu.
Beesu konto a siitini.
5 Wuron do kiye,
a wa yaalana furungoorun naxa,
walla gidun kanma.
A gaa xaarunu,
na du joogi ti gidun ŋa.
6 A ga da Isa wari laatoyen ŋa,
a xosi wuru katta a yi nan ri tusi a wure.
7 A ferenpenti nan ti :
« Isa,
Alla wuruginten renme,
an manne ni o maxa ?
N da an ɲaaga ya de,
an na a ɲa Alla da,
an nan maxa in yanganxata ! »
8 A da ke ko ya na a sababun ɲa Isa ga ti :
« Jinna,
bogu ke yugo yi ! »
9 Isa ti a da :
« An toxo ?
» A ti :
« N toxon ni “ Kurunkitte ”,
baawo o nan gaba. »
10 A da a muuru Isa maxa a nan maxa jinnanu ku xata bakka jamaanen ŋa.
11 Ken da a ɲi kaadunfaringijin jama xoore yogo wa yigene gidintan ŋa,
12 jinnanu ku da Isa xanjo nan ti :
« O wara katta kun faringiju yi,
kuudo o nan ro i ya. »
13 Isa duŋe.
Jinnanu ku bogu yugon ŋa,
nan ro faringijun ŋa.
Faringijin kole ke dire gilli giden kanma nan yanqa xaaren ŋa.
A wa wujunu filli faringije bakka,
a su yoole.
14 Faringijinagaanaanon wuru dagana na xibaare ke kiɲandi deben do dabbayun ŋa.
Ke be ga ɲaŋi,
seron ri a fiiduxura.
15 I ga kiɲe Isa yi bire be,
jinnanun ga ɲi yugo ke be yi,
i da a wari a gaa taaxunu,
yiraamun wa a yi,
a do i haqilun xa wa doome.
Sero ku kanu.
16 Kun fiinu ga ɲaŋi sero beenu jon ŋa,
jinnan ga bogu yugon ŋa moxo be,
a do fi be ga ɲa faringijun ŋa,
i da a su laxami seron da.
17 I da a muuru Isa maxa nan ti a nan dangi i jamaanen ŋa.
18 Isa royinte fuuren ŋa,
jinnanun ga ɲi yugo ke be yi,
a da Isa tirindi selli i ra gaa dagana do a yi.
19 Xa Isa ma duŋe,
a ti yugon danŋa ya :
« Daga an kan ŋa :
Kamanen ga hinne an ŋa moxo be,
a do a ga da siroye be ɲa an da,
an na a laxami an kaadunkon da. »
20 Yugo ke daga kuŋa,
Isa ga da fo wo fo su ɲa a da,
na a gansi Debutanmi maran ŋa,
fo wo fo ga ɲi a terinkana,
a su kaawa ken ŋa.
[Furen wundiyen do yaxaren sahande]
21 Ken falle,
Isa ro fuuren ŋa nan saage katta Galiile xaaren kaara baanen ŋa.
Jama xoore da me ɲi do a kaaron ŋa jinlaqen ŋa.
22 Allanxarankan yinmanke yogo riyinten faayi,
a toxon ga ni Yaaro.
A ga da Isa wari tan,
a da du sedi a taanun ŋa.
23 A ti a da :
« N ren yaxarin tugunnen faayi kalla.
Duruxoto an nan ri an sooxen saxu a kanma,
kuudo a nan saha,
a na bire ! »
24 Ken batte su,
Isa daga do a batten ŋa.
Jama xoore sukke do Isa yi,
ma i na a liixi do kaaran su yi.
25 Yaxare yogo wa jama ke yi,
foronjoqen wa a yi siino tanmi do fillo.
26 A tanpi moxoburu,
baawo a kiɲe jaarandaana gabe ya yi.
A naaburen su bono,
fo xa ma bogu a watten ŋa,
fo du ya n kafi a yi.
27 Yaxare ke da Isa xibaaren mugu,
a xosi jaman booxo nan bogu ti Isa falle nan kati a doroken ŋa.
28 A ti i noxoodu :
« N ga na hari kati a doroken ŋa,
n na saha. »
29 Ken sigira su yi,
a foronjoqen sigi.
A yinme da a tu ti i watten saha.
30 Ken sigira su yi,
Isa xa da a tu du yi nan ti bareke yogo bogu i ya.
A xosi i falle faayi jaman ŋa nan ti :
« Ko xa n kati in doroken ŋa ? »
31 A xaranlenmon ti a da :
« An yaaxen wa a yi jaman ga liixi an ŋa moxo ke be,
an wa yillene tini :
“ Ko n kati in ŋa ?
” »
32 Xa,
Isa da i kaaron faayi,
kuudo i na a kaman tu.
33 Yaxaren kanu ma a nan toxo sarallene,
a da a tu ke be ga ɲaŋi i ya.
A xosi ri tusi Isa jon ŋa.
A ga da fo be ɲa,
a da a xurandi a da.
34 Isa ti a da :
« N ma,
an danqanaaxun da an sahandi.
Daga,
xeeri wa do an ŋa,
Hari na an sahanten toxo. »
35 Na Isa toxo sefen ŋa,
sero yogonu giri allanxarankan yinmanken kan ŋa nan ti a da :
« An ren yaxaren kara,
an na xaranmoxo suxulana manne yi xadi ? »
36 Xa,
Isa ma kun digaamu jaate.
A ti allanxarankan yinmanken da :
« Maxa kanu,
saxu a yi tannu ! »
37 I gaa telle allanxarankan yinmanken kan ŋa,
Isa ma duŋe sere su nan daga do i batte,
ganta Piyeeri do Yaaxuba,
a do Yaaxuba waaxi Yohanna.
38 I ga kiɲe allanxarankan yinmanken kan ŋa,
i da sonqon ɲi no,
seron gaa wuunu,
i gaa xaarunu.
39 Isa ro kan ŋa nan ti i da :
« Ke direye do ke wuye xa maana ?
Leminen ma kara,
a xenqene ya ! »
40 Seron soyi a yi.
Ken do i fi su,
Isa da i su bagandi sellan ŋa.
Leminen gaa konpe be yi,
Isa do i xaranlenmo ku sikki do leminen ma do a faaba ro non ŋa.
41 A da lemine ke raga ti kitten ŋa nan ti a da :
« Talita kumi !
» Ken wure ga ni :
« Yaxanne,
n da an ɲaamari,
giri ! »
42 Ken sigira su yi,
a xosi giri nan tere.
A wuyin wa siino tanmi do fillo.
Seron ga da ken wari,
i kaawa ken ŋa buru.
43 Xa,
Isa da a ko i da na a xotondi i maxa nan ti :
« Sere n maxa a tu de !
» A ti i na yigande kini a yi a nan yige.