Luka 8

[Yaxarun deemande Isa Alimasiiwu do i xaranlenmon da]

Ken falle, Isa Alimasiiwu daga debi xooron do debi lenmun ŋa, na gangu non xa yi. A faaru ku tanmi do fillon wa do a batten ŋa, 2 kafiini yaxaru yogonu yi, ku beenu a ga da jinnanun xata bakka i ya, na i wattun sahandi, xo : Maariya, i gaa tini a da Maariya Magadalanke, ke be jinnanu ɲeri ga xate bakka a yi, do 3 Yanna, aken ga ni tunka kan tangandaana Cuusa yaqen ŋa, do Susaana, do yaxarin gabu tananu. Yaxaru ku da Isa do i xaranlenmon deema ti i naaburen ŋa.

[Soxoodin masayila]

(Mace 13.1-23 ; Maarika 4.1-20)

4 Jama xoore giri debi gabe yi na me ɲi Isa noqu. A da ke ko i da nan ti : 5 « Soxaanan daga i ten sanqi. A gaa sanqindini, soxoodi ke yogo yere killinxannen ŋa, dangaanon tere i kanma ; yeliŋun xa ri na i sagara na i toni. 6 Fo tananu yere gidinnoqun ŋa. I funti, xa a ma dalla i kaawa, baawo mulayi gabe nta non ŋa. 7 Fo xa yere saasinbadagun noxon ŋa. I do badagun su funti doome, xa badagun da i bitta. 8 Ayiwa, fo yere soxoɲiiɲa siren ŋa, kun bogu nan xooro nan kare, ma i me kame. » A yille ferenpentini nan ti : « Taro gaa sere be yi, a nan terinke de ! »

9 Isa xaranlenmon da a tirindi masayila ke wure yi. 10 A ti i da : « Allantunkaaxun gundon tuwaaxun kini axakun ya yi, xa a masayilanman ya ni seron kuttun da, kuudo i na faayindi, xa i nan maxa wari ; i na mugi, xa i nan maxa faami.

11 « Ayiwa masayila ke wure faayi ke : “ Soxoodi ke yinme ” : Alla Digaamen ya ni. 12 “ Killinxanne ke soxoodinu ” : ken ni sero beenu gaa Alla Digaamen mukku ya, xa na ri a xiili bakka i sondomun ŋa kuudo i nan maxa toŋondi i gaa kisiini. 13 “ Gidinnoqu ke soxoodinu ” : ken ni sero ku be gaa Alla Digaamen mukku ya na a raga ti ɲaxaliye yi. Xa, i toŋondiyen ni wucinne ya yi. Jaaraben waxatin ga na ri tannu, danqanaaxun na duguta i ya. 14 Sero ku be gaa Alla Digaamen mukku, xa duna hanmin do a naaburen do a daxanmen na ro i sondomun ŋa, na i danqanaaxun bonondi, ken ni saasinbadagu ku soxoodinun ya yi ; i nta funsunu. 15 “ Soxoɲiiɲa sire ke soxoodinu ” : ken ni sero ku be gaa Alla Digaamen mukku i gaa a ragana ti sondon sire yi ya, sondome be xalasinten ga ni, i gaa tigitini a yi, ken gaa ɲaana sababu yi i gaa Alla sagon batta.

[Lanpan masayila]

(Mace 4.21-25)

16 « Sere su nta lanpa kunmu na xolle bifindi a kanma, walla xa, na a ro xaraxa wure. Xa ganta, an na a taaxundini lanpanjongaaden ya kanma kuudo sero beenu gaa roono konpen noxon ŋa, i na xurayen wari. 17 Fo wo fo muxunten ga ni, a wa riini bogu xurayen ŋa ; fo wo fo ga ni gundo yi, a wa riini bange nan ware xurayen ŋa koota yi. 18 Ken kuŋa, xa da axa terinkemoxon tu de ! Baawo fo gaa sere be maxa, fo wa kafiini a yi, xa fo ga nta sere be maxa, a gaa a jikki ti hari fonne ke be wa i maxa, ken xa wa boosini a yi. »

[Isa ma do a waaxinun riye a xanta]

(Mace 12.46-50 ; Maarika 3.31-35)

19 Isa ma do a waaxinun ri a banŋen ŋa, xa jaman gaboyen saabu da, i ma katu nan joofe a yi. 20 I ti Isa da : « An ma do an waaxinun faayi sikki sellan ŋa ; i wa a mulla i do an na me wari. » 21 Isa ti i da : « Sero beenu gaa Alla Digaamen terinkana na a batu, kun ya ni in ma do in waaxinun ŋa. »

[Isa fankaxoorasiginde jin kanma]

(Mace 8.23-27 ; Maarika 4.35-41)

22 Koota yogo yi, Isa do i xaranlenmon ro fuuren ŋa, a ti i da : « Xa ri o n kare. » I janbandi. 23 Na i toxo jin kanma telle, xenqon da Isa wutu. Fanka xoore xosi giri xaaren kanma ; jin jope roono fuuren noxon ŋa ma a gaa ɲaana xoyi i wa yoolene. 24 Xaranlenmon tinko Isa yi ken ya yi na a wundu, i gaa luukene ti : « Xaranmoxo, xaranmoxo, o kara de ! » A giri nan doxo fanken do banbuusi xooron ŋa, i su sigi nan mulo. 25 Ken falle a ti xaranlenmo ku da : « Axakun danqanaaxun na minna yi keeta ? » I kanu siri, nan kaawa a yi, i ti me da : « Manne seran danbe xa ni ke yugo yi, a gaa hari fanken do jin kandana, i gaa a ɲaamariyen batta ! »

[Jinnanun roye faringijun ŋa]

(Mace 8.28-34 ; Maarika 5.1-20)

26-29 Ken falle i joofe Gerasankon maran ŋa, xaaren kuta baanen ŋa. Non do maran wa me jonkonmen ŋa. Isa ga yanqa bakka fuuren ŋa tannu, yugo yogo ri katta a yi, jinnanun gaa a yi. Yugo ke ni ken debe seren ya yi. Yugo ke fata duuron dalla terene, a fode furungoorun ya yi nan bara kaanun ŋa. I ɲi surunmen ya roono a kittun do a taanun ŋa, kuudo a nan sabati noqu baane. Xa a na a su kutunu ya ; jinna ke na a kanda katta gunnen ŋa.

Ayiwa, a ga da Isa wari, a luuke na du maxayanqa a da, na du wara a taanun ŋa nan ferenpenti ti : « An manne ni o maxa, Alla wuruginten renme ! N da an xanjo, maxa in yanganxata ! » Yugo ke da ken ko ya baawo Isa na jinna ke ɲaamarini ya a nan bogu a yi. Jinna ke demu a ragana ta gabe. 30 Ayiwa, Isa da a tirindi, nan ti a da : « An toxo ? » A ti : « N toxon ni “ Kurunkitte. ” » A da ken ko ya baawo jinnan jaman ya na a yi. 31 Jinnanu ku da Isa ɲaaga, ti a nan maxa i deni ŋa. 32 Ken da a ɲi, kaadunfaringijin jama xoore yogo wa yigene giden kanma non kaaran ŋa. Jinnanu ku da Isa xanjo, ti a na i wara i nan daga ro faringiju ku yi. A duŋe i da. 33 Jinnanun bogu yugon ŋa ken ya yi, nan daga ro faringiju ku yi. Faringiju ku xosi wuru yanqana giden ŋa, nan ro xaaren ŋa, nan yoole. 34 Faringijinagaanaanon ga da ken wari, i wuru dagana na xibaare ke kiɲandi deben do dabbayun ŋa. 35 Seron bogu nan daga xibaare ke fiiduxura. I ga kiɲe Isa yi, i da a ɲi jinnanun ga bogu yugo ke be yi, a wa taaxunu Isa kaaran ŋa ; yiraamun wa a yi, a do i haqilun xa wa doome. Sero ku kanu. 36 Ku beenu ga seede fi ke su yi, i da jinnagume ke sahamoxon laxami sero ku da.

37 Gerasa maran seron su da a muuru Isa maxa, ti a nan dangi i noqun ŋa, baawo xibaare ke da i su kanundi. Isa ro fuuren ŋa nan saage do i falle yi. 38 Jinnanun ga bogu yugo ke be yi, a da Isa ɲaaga ti a na i wara i nan toxo do a batten ŋa. Xa Isa da a wara dagana nan ti a da : 39 « Saage katta an seron ŋa. Alla ga da fo be ɲa an da, an nan daga a su laxami i da ! » Yugon daga kuŋa. Isa ga da fo wo fo ɲa a da, a da a laxami deben su da.

[Yaaro ren yaxaren furen wundiye]

(Mace 9.18-26 ; Maarika 5.21-43)

40 Isa ga giri xaaren kuta baanen ŋa, jaman da a gemundi baawo a su ya n ɲi a dukku. 41 Yugo yogo ri katta a yi ken noqu yi, a toxon ga ni Yaaro. yinmanken ya ni. A da du wara Isa taanun ŋa na a ɲaaga, ti a nan ri i kan ŋa. 42 Baawo ren yaxarin baane be gaa a maxa, a wuyin gaa siino tanmi do fillo yi, a do yonkinbakken wa me yi.

Isa daganten ŋa yugo ke kan ŋa, a wa jaman naxan ŋa, i gaa a yonto-yontono telle. 43 Yaxare yogo wa jama ke yi, siino tanmi do fillo foronjoqen gaa a yi. A da i naaburen su ro jaaranden taara, xa sere su ma katu a sahandini. 44 A xa ri sigi do Isa falle, nan kati a doroken kanpen ŋa. Ken sigira yi, a foronjoqen sigi. 45 Isa tirindindi ti : « Ko xa n kati in ŋa ? » A su ti i ke fe, Piyeeri ti : « Xaranmoxo, an na jaman ya naxa i gaa an yontono. » 46 Isa ti : « Tonŋu, xa yogo kati in ŋa, baawo in da a tu in du yi ti bareke yogo giri in ŋa. » 47 Yaxaren ga da a tu ti i ga da fo be ɲa a tuyi, a sarallanten ri Isa jon ŋa, nan tusi, na a ko a su jon ŋa maana be ga sigi i ga kati a yi, do i ga saha sigira baanen ŋa moxo be. 48 Isa ti a da : « N ma, an danqanaaxun da an sahandi. Daga, xeeri wa do an ŋa. »

49 Na Isa toxo sefen ŋa, yogo do faaren ri nan giri allanxarankan yinmanke ke kan ŋa nan ti a da : « An ren yaxaren kara, maxa xaranmoxo suxula keeta. » 50 Isa ga da ken sefe mugu, a ti Yaaro da : « Maxa kanu, saxu a yi tannu. An ren yaxare ke wa sahana. » 51 Isa ga joofe kan ŋa, a ma duŋe sere tana gaa roono do i ya, a ga ma ɲa Piyeeri do Yohanna do ya yi, kafiini leminen ma do a faaba. 52 A su wa lemine ke wuunu, i gaa wurugene. Isa ti i da : « Xa maxa wu. A ma kara, a xenqene ya. » 53 I soyi a yi, baawo i saxunten wa a yi nan ti lemine ke kara ya. 54 Isa xosi yaxanne ke raga ti kitten ŋa, na i xannen do a wutu kanmun ŋa nan ti : « Lemine, giri an nan sigi ! » 55 Ken sigira yi, yonkin saage yaxannen ŋa, a giri nan sigi. Isa ti i na yigande kini a yi a nan yige. 56 A saaraano ku kaawa ken ŋa siri. Isa ti i da i nan maxa fi ke laxami sere su da.